Le Tāua o le Poto e Maua Mai i le Iloa o le Atua
1 Ua manatu nisi tagata e faapea, e tatau lava i Molimau a Ieova ona taulaʻi saʻo atu la latou fesoasoani i le taumafai e faaitiitia faafitauli ia o loo fesagaʻi ma le fanau a tagata i aso nei. Ae e lē o iloa e na tagata le matuā tāua o la tatou galuega, o le aʻoaʻo atu lea o le Tusi Paia. E pei lava ona tusia e le aposetolo o Paulo e faapea: “Auā o le mataupu i le satauro, o le valea lea i ē o malaia; a o le mana o le Atua iā te i tatou o loo faaolaina.” (1 Kori. 1:18) Ioe, ua tatou iloa, o le faiva faa-Kerisiano, o le galuega aupito sili lea ona tāua ua faia i le lalolagi i aso nei.
2 Se Olaga e Sili Ona Lelei i Aso Nei: E itiiti lava ni iʻuga lelei ua mafaia e taumafaiga a tagata ina ia foʻia faafitauli o le fanau a tagata i aso nei. Ua lē mafaia e le ʻaufaitulafono ona taofia le faateleina o solitulafono. E lē o mafaia e maliega na sainia o le filemu ma vaegaau mo le tausia o le filemu ona faaiʻuina taua. Ua lē mafai foʻi e polokalame ua fuafuaina mo le soifua lelei o tagata ona aveesea le mativa. (Sala. 146:3, 4; Iere. 8:9) I se faatusatusaga, ua suia e le feʻau o le Malo olaga o le faitau miliona o tagata e ala i le fesoasoani atu iā i latou ina ia oofu i le tagata fou, o se mea e fiafia i ai le Atua. (Roma 12:2; Kolo. 3:9, 10) O le faia faapea, ua latou olioli ai i le taimi nei ona ua faaleleia o latou olaga.—1 Timo. 4:8.
3 Se Lumanaʻi Fiafia: E lē gata ua fesoasoani lea iā i tatou ia taulau manuia ai i le faafetaiaʻia o mea faigatā i le olaga, ae o le poto mai le Atua, ua mafai ai ona tatou faia ni fuafuaga aogā mo le lumanaʻi. (Sala. 119:105) Ua taofia ai i tatou mai le faia o ni taumafaiga iʻuvale ia toe atiina aʻe le faiga o mea o loo iai nei. (Fai. 1:15; Roma 8:20) Maʻeu lo tatou loto faafetai ona e lē o faamaʻimauina o tatou olaga i le tuliloaina o ni sini e lē mafai ona faataunuuina! Na i lo o lea, e faaautū a tatou taumafaiga i le folafolaga mautinoa a Ieova e uiga i le “lagi fou ma le lalolagi fou,” lea na ia folafola mai, o le a mau ai lē amiotonu. Pe a oo mai le aso o le faamasinoga a Ieova, e mautinoa lava, o i latou na faalagolago i le poto mai le Atua, ua latou faia se filifiliga saʻo.—2 Pete. 3:10-13; Sala. 37:34.
4 E ui lava e foliga mai e lē aogā le poto o le Afioga a le Atua iā i latou o loo matuā saʻili atu i le “poto o lenei lalolagi,” ae o le mea moni, e na o le pau lava lea o le auala aogā e tatau ona mulimuli ai. (1 Kori. 1:21; 2:6-8) O lea, seʻi o tatou faaauau pea ona folafola atu i le lalolagi aoao le feʻau mai le Atua ‘poto e toʻatasi.’—Roma 16:27.