Ia Taʻu Atu Pea Galuega Matagofie a Ieova

1. O ā nisi o galuega matagofie a Ieova e faapitoa ona e faatāuaina?

¹ E leai se tasi e pei o lo tatou Atua silisili o Ieova! Na tusi Tavita e faapea: “E tele lava mea ua e faia, o ou vavega [“galuega matagofie,” NW] ma ou manatu iā te i matou, e lē mafai ona laulauina atu ai iā te oe.” (Sala. 40:5) O galuega matagofie a Ieova e aofia ai le foafoaina o le vateatea aoao, le Malo Faa-Mesia, gaoioiga o le alofa agalelei i ona tagata, ma le talaʻiga i le lalolagi aoao. (Sala. 17:7, 8; 139:14; Tani. 2:44; Mata. 24:14) O le alofa mo Ieova ma le loto faafetai i mea uma ua ia faia, e uunaʻia ai i tatou e taʻu atu i isi e faatatau iā te ia. (Sala. 145:5-7) O loo iai se avanoa iā Mati, Aperila, ma Me e tatou te faia atoatoa ai faapea.

2. E faapefea ona aogā iā i tatou lava le paeonia lagolago?

² I le Avea ma Paeonia Lagolago: Pe mafai ona e faatulaga lau faasologa ina ia faaalu itula e 50 i le faiva i se masina se tasi pe sili atu foʻi o nei masina o gaoioiga faapitoa? E mautinoa o le a aogā so o se fetuutuunaʻiga e te faia i lau faasologa. (Efe. 5:16) Ua iloa e le toʻatele e faapea, ua fesoasoani le paeonia lagolago iā i latou e faaleleia ai le uigā o la latou faiva. Ua sili atu foʻi ona latou toʻa pe a talanoa atu i le fale, ma ua tele avanoa e maua e faaaogā ai le Tusi Paia. O le tele o le taimi e faaalu i le faiva, e faigofie ai ona fesoasoani i tagata loto fiafia na maua, ma o nisi e leʻi faia muamua se suʻesuʻega faale-Tusi Paia, ua amataina se suʻesuʻega faale-Tusi Paia a o auai i le galuega o le paeonia lagolago. Ona o le paeonia lagolago e aofia ai lo tatou taumafai e fesoasoani i isi, o se galuega la e aumaia ai le fiafia.—Galu. 20:35.

3. Ua mafai faapefea e nisi ona paeonia lagolago e ui lava i tulaga faigatā?

³ Aua neʻi vave ona faia sau faaiʻuga faapea e lē mafai i lou tulaga ona faia se paeonia lagolago. O se tasi o toeaina o se faapotopotoga e iai sana fanau e toʻalua ma se galuega faataimi atoa, sa paeonia lagolago i le tausaga ua teʻa. Na faapefea e lenei uso pisi ona faia faapea? Ona e faigaluega i le vaiaso, e na te faatulagaina la e talaʻi mo ni taimi uumi i le faaiʻuga o vaiaso, ma e amata ona molimau atu i luga o ala tele i le ta o le 7 i taeao o Aso Toonaʻi. O nisi i le faapotopotoga e talitutusa o latou tulaga na latou paeonia foʻi, ma na latou felagolagomaʻi ma faalaeiau le tasi i le isi. I se isi faapotopotoga, sa filifili ai se tuafafine e 99 ona tausaga e paeonia iā Me ina ua valaaulia e lana tama teine e la te paeonia. Sa fesoasoani isi i le faapotopotoga i lenei tuafafine matua a o galue mai lea fale i lea fale, faapea ma suʻesuʻega faale-Tusi Paia i le tuleia o lona nofoa faataavalevale. Sa molimau atu foʻi o ia e ala i le telefoni, i ala tele, ma le tusia o tusi. Na ia taʻutino mai e faapea, na te leʻi faia i sona lava malosi, ae o le fesoasoani mai iā Ieova na mafai ai.—Isa. 40:29-31.

4. O ā vala e tatou te ono mafaufauina pe a faatulaga se faasologa ina ia mafai ona paeonia lagolago?

⁴ Taumafai e fai sau faasologa e fetaui lelei ma lou tulaga. Atonu e aogā tele faasologa faataʻitaʻi o loo iai i lenei faiva. Pe e te faigaluega faataimi atoa pe e te aʻoga? O se faasologa e faaaogā atoa ai faaiʻuga o vaiaso, atonu e sili atu ona talafeagai mo oe. Afai e iai ni faalētonu i lou soifua mālōlōina ma e lē fetaui ma lou malosi le galue i le aso atoa i le faiva, e sili atu la se faasologa e faaalu ai se taimi itiiti i aso uma. Talanoa i isi e faatatau i lou faanaunauga e paeonia lagolago. Atonu o le a avea ai foʻi le paeonia lagolago ma o latou sini.

5. O ā ni sini e mafai ona faatulaga e talavou iā Mati, Aperila ma Me?

⁵ Auala e Mafai ai Ona Auai Talavou: E fiafia Ieova pe a taʻu atu e talavou ana galuega matagofie. (Sala. 71:17; Mata. 21:16) Afai o oe o se talavou ua papatiso, atonu e mafai ona e paeonia lagolago i se masina e tuua ai aʻoga. Afai e lē mafai ona e auauna o se paeonia lagolago, pe e mafai ona e faatulaga ni ou sini patino e faatele le taimi e te auai ma faaleleia atili le uigā o lau faiva i nei masina? Afai o loo outou auai ma ou mātua i le faiva ae e leʻi avea lava oe ma tagata talaʻi e leʻi papatisoina, o le taimi lelei lenei e taumafai ai ia e agavaa. E lē manaʻomia ona e lagona faapea e tatau ona avea oe ma tagata poto i le taliina o fesili faale-Tusi Paia, pe faapea foʻi e tatau ona e iloa le tele o mea e pei o tagata ua uma ona papatiso. Po ua e malamalama i aʻoaʻoga faavae a le Tusi Paia? Po o e tumau i tapulaa mamā tau amio a le Tusi Paia? Pe e te manaʻo e mātaulia oe o se tasi o Molimau a Ieova? Ia e talanoa i ou mātua e faatatau i lenā mea. E mafai ona la faatulaga e tou te feiloaʻi ma toeaina e vaai po ua e ausia mea e manaʻomia.—Tagaʻi i le tusi La Tatou Faiva, itu. 98-99.

6. E faapefea ona tatou fesoasoani i tagata aʻoga o le Tusi Paia e avea ma tagata talaʻi o le tala lelei?

⁶ Fesoasoani i Isi e Talaʻi: O tagata aʻoga o le Tusi Paia ua agaʻigaʻi i luma, e mafai ona agavaa e aufaatasi ma i tatou i masina o loo lumanaʻi o gaoioiga faapitoa. Afai o loo iai sau tagata aʻoga o le Tusi Paia o loo faia se agaʻigaʻi lelei i luma, ia fesili mo se fesoasoani a lo outou ovasia o suʻesuʻega tautusi po o le ovasia o le auaunaga. E mafai ona auai se tasi o i laʻua ma oe i le suʻesuʻega, ina ia iloa ai le agaʻigaʻi i luma o le tagata aʻoga. Afai ua agavaa le tagata aʻoga ma ua naunau e avea ma tagata talaʻi, ona faatulaga lea e le ovasia taʻimua ni toeaina se toʻalua e feiloaʻi ma oe ma lau tagata aʻoga. (Tagaʻi i Le Olomatamata Iuni 1, 1989, itulau 29.) O le taimi lava e faamaonia ai le tagata aʻoga, ia vave loa ona amata ona toleni o ia i le faiva.

7. E faapefea ona fesoasoani i tagata talaʻi e iai masina e lē talaʻi ai ma ē ua lē o toe talaʻi?

⁷ E tatau i ovasia o suʻesuʻega tautusi ona uaʻi faapitoa atu i se tasi o la latou vaega ua lē o toe talaʻi pe e iai masina e lē talaʻi ai. Valaaulia i latou e tou te galulue faatasi i le faiva. Afai ua loa e lē o toe talaʻi, e fautuaina le talanoa muamua ma toeaina se toʻalua e iloa ai po o agavaa. (Tagaʻi i le Pusa Fesili i La Tatou Faiva o le Malo o Novema 2000.) O le maelega o le faapotopotoga i nei masina o gaoioiga faapitoa, e faagaeeina ai i latou e toe avea ai le faiva ma vala masani o o latou olaga.

8, 9. O le ā e mafai ona fai e toeaina e ati aʻe ai lagona aasa mo le galuega faapitoa?

⁸ Sauniuni Nei mo Galuega Faateleina: Toeaina, ia amata nei ona ati aʻe le aasa mo le paeonia lagolago i le faapotopotoga. E tele ni mea e te mafaia ona fai e ala i au upu faalaeiau ma se faataʻitaʻiga lelei. (1 Pete. 5:3) O le ā le tumutumuga o paeonia lagolago a le faapotopotoga sa iai talu ai? Pe mafai ona faateleina i lenei tausaga? E tatau i ovasia o suʻesuʻega tautusi ma a latou fesoasoani, ona saʻilia auala e faalaeiau ai i tagata uma i le vaega e faateleina la latou galuega. E mafai ona faatulaga e le ovasia o le auaunaga ni feiloaʻiga faaopoopo mo le auaunaga i le fanua. Ia vave logo le faapotopotoga i fuafuaga ua faataatia. Ia faamautinoa ua tofia tagata talaʻi agavaa e taʻimua i feiloaʻiga mo le auaunaga, ma e tatau ona amata ma faaiʻu i le taimi tonu. (Tagaʻi i le Pusa Fesili o La Tatou Faiva o le Malo o Setema 2001.) E tatau foʻi ona faatulaga e le ovasia o le auaunaga ina ia lava oganuu, mekasini, ma lomiga e faaaogā.

⁹ I le tausaga ua mavae, na vave amata lava ma le aasa e toeaina o se tasi faapotopotoga ona timaʻi tagata ina ia paeonia lagolago, ma o le toʻatele o i latou na faatumu a latou talosaga mo le paeonia. Sa latou faatulaga ni feiloaʻiga faaopoopo mo le auaunaga i le fanua—o le tasi i le 5:30 a.m. mo le molimau atu i ala tele, o le isi i le 3:00 p.m. mo i latou i le tuua o aʻoga, ma le feiloaʻiga lona tolu i le 6:00 p.m. mo i latou i le mānava o galuega. E lē gata i lenā, e tolu foʻi taimi na faatulaga mo le feiloaʻiga mo le auaunaga i le fanua i Aso Toonaʻi. Na tali lelei ane le faapotopotoga e ala i le auai o le toʻa 66 i le paeonia lagolago iā Aperila!

10. E faapefea ona sauniuni aiga mo le faateleina o la latou galuega talaʻi?

¹⁰ Aiseā e lē fuafua ai se taimi i le isi suʻesuʻega a le tou aiga e faatulaga ai ni sini talafeagai mo masina o loo lumanaʻi? O le lelei o le lagolagosua faapea ai ma le lelei ona fuafua, e mafai ai ona paeonia lagolago nisi po o tagata uma foʻi o le aiga. Afai e lē talafeagai lenā tulaga, ia faatulaga sini ina ia faateleina au gaoioiga e ala i le faaumiumi atu o le taimi i le auaunaga po o le faaopoopo foʻi o taimi e talaʻi ai. Ia avea lenā tulaga ma mataupu o tatalo a le aiga. E mafai ona outou mautinoa o le a faamanuia Ieova iā outou taumafaiga.—1 Ioa. 3:22.

11. (a) O ā mea matagofie na faataunuuina ona o le taulaga a Keriso? (e) O le ā le taimi ma le nofoaga e faia ai le Faamanatuga?

¹¹ O Galuega e Sili Ona Matagofie a le Atua: O le faailoaga e aupito silisili o le alofa o Ieova o le meaalofa o lona Alo, lea na fai ma togiola mo i tatou. (1 Ioa. 4:9, 10) O le taulaga togiola ua saunia ai le faavae faaletulafono mo le togiolaina o tagata mai le agasala ma le oti. (Roma 3:23, 24) O le toto masaa o Iesu ua faamaonia ai le feagaiga fou, ma ua mafai ai e tagata lē lelei atoatoa ona avea ma atalii fai o le Atua ma le faamoemoe e pule i le Malo faalelagi. (Iere. 31:31-34; Mare. 14:24) O le mea e sili ona tāua, o le usiusitai atoatoa o Iesu ua faapaiaina ai le suafa o Ieova. (Teu. 32:4; Faata. 27:11) I le Aso Sa, Aperila 4, pe a mavae le goto o le lā, o le a Faamanatuina ai le maliu o Keriso i le lalolagi.

12. E faapefea ona maua e tagata loto fiafia aogā i le auai i le faamanatuina o le Talisuaga Afiafi a le Alii?

¹² O le faamanatuina o le Talisuaga Afiafi a le Alii, e faamamaluina ai galuega matagofie a Ieova. O le lauga, o le a ati aʻe ai lo tatou talisapaia mo mea ua faia e Ieova i le saunia o le togiola. O le a mātauina e tagata loto fiafia o le a auai, isi galuega matagofie a le Atua. O le a latou vāai i le autasi ma le alofa māfana ua aʻoaʻo e Ieova ona tagata e faaalia. (Efe. 4:16, 22-24; Iako. 3:17, 18) O le auai i lea fuafuaga tāua, e iai sona aafiaga moni i le auala e mafaufau ai se tagata, o lea e tatou te mananaʻo ia tele ni tagata e mafai ona auai mai.—2 Kori. 5:14, 15.

13, 14. O ai e tatau ona tatou valaaulia i le Faamanatuga, ma e faapefea?

¹³ Valaaulia Isi ia Auai: Ia amata nei loa ona sauniuni e ala i le faia o se lisi o i latou e valaaulia. E tatau ona aofia i lau lisi ia tagata lē talitonu o lou aiga, tuaoi, aumea i galuega po o aʻoga, o tagata suʻesuʻe o le Tusi Paia sa iai muamua, i latou o loo suʻesuʻe i le taimi nei, ma i latou uma o loo e toe asiasi i ai. E tatau ona aofia i le lisi a ovasia o suʻesuʻega tautusi ia so o se tagata talaʻi ua lē o toe talaʻi.

¹⁴ Faaaogā le pepa valaaulia e lolomi pe tusi faalelei ai le taimi ma le nofoaga e faia ai le Faamanatuga. A lē o lenā, atonu e te manaʻo e faaaogā le valaaulia o loo i tua o le Olomatamata o Mati 15, 2004. A o latalata mai Aperila 4, ia toe faamanatu iā i latou o loo i lau lisi, a lē o le asiasi atu i ai, ia po o le telefoni foʻi i ai.

15. E faapefea ona tatou faaalia uiga talimālō i le pō o le Faamanatuga?

¹⁵ I le Faamanatuga: Taumafai e vave taunuu i le pō o le Faamanatuga. Ia faaalia uiga talimālō e ala i le faafeiloaʻia o tagata fou. (Roma 12:13) E iai sou tiute tauave faapitoa i au mālō na valaaulia. Ia lagonaina e au mālō o loo talileleia i latou, ma faafeiloaʻi atu i latou i isi o le faapotopotoga. Atonu e mafai ona e fesoasoani iā i latou ina ia faanonofo i ni nofoa i ou talaane. Afai o nisi o i latou e lē o iai ni a latou Tusi Paia po o ni tusipese, fesoasoani i ai e ala i lo outou faaaogā faatasi o lau Tusi Paia ma le pese, pe faatulaga se tasi e fesoasoani i ai. Pe a māeʻa le faamanatuga, ia faaavanoa oe e tali so o se fesili latou te fai mai. Afai o le taimi muamua lea ua auai mai ai nisi o i latou, fesili i ai pe e latou te mananaʻo e aʻoaʻoina atili e faatatau i le Afioga a le Atua ma ana fuafuaga. Ofo i ai e te faia se suʻesuʻega faale-Tusi Paia ma i latou.

16. O le ā e faia e fesoasoani ai iā i latou na auai i le Faamanatuga e faia se agaʻigaʻi i luma faaleagaga?

¹⁶ Faaauau Ona Fesoasoani i Ē na Auai: I vaiaso e sosoo ai ma le Faamanatuga, atonu e manaʻomia atili e i latou na auai se fesoasoani. E aofia ai ma ē sa iai se taimi na auai e lē aunoa i sauniga ae o lea ua tau lē toe auai faatasi ma le faapotopotoga. O le a mataala toeaina ina ia vaai e lē o lafoaʻia i latou na ma saʻilia māfuaaga na taofia ai lo latou faia o se agaʻigaʻi i luma faaleagaga. Ia taumafai e tāmau i o latou mafaufau le puupuu tele o le taimi o loo totoe. (1 Pete. 4:7) Fesoasoani iā i latou uma e iloa le aogā o le usitaia o le timaʻiga faale-Tusi Paia ia auaufaatasi e lē aunoa ma tagata o le Atua.—Epe. 10:24, 25.

17. Aiseā e tatou te taʻu atu ai pea galuega matagofie a Ieova?

¹⁷ E matagofie naʻuā galuega a Ieova, e lē faigofie ai ona tatou malamalama atoatoa i ai e tusa lava pe tatou te ola e faavavau. (Iopu 42:2, 3; Fai. 3:11) O lea la, o le a lē mafai lava ona faapea e leai se mea e tatau ona tatou viia ai Ieova. I lenei vaitaimi o le Faamanatuga e mafai ona tatou faaalia lo tatou loto faafetai i galuega matagofie a Ieova, e ala i le faia o ni taumafaiga faapitoa e faateleina ai la tatou faiva.

[Siata i le itulau 5]

Pe Mafai Ona E Paeonia Lagolago e Faaaogā ai se Tasi o Nei Faasologa?

Mati S G* L* L* T F T Aofaʻiga

Aso Taʻitasi 2 1 1 1 1 1 5 51

Lua Aso 0 5 0 5 0 0 0 50

Faaiʻuga o Vaiaso 5 0 0 0 0 0 8 52

Aperila S G* L* L* T F T Aofaʻiga

Aso Taʻitasi 2 1 1 1 1 1 5 50

Lua Aso 0 0 0 0 5 5 0 50

Faaiʻuga o Vaiaso 5 0 0 0 0 0 8 52

Me S G* L* L* T F T Aofaʻiga

Aso Taʻitasi 2 1 1 1 1 1 4 51

Lua Aso 0 5 0 0 0 0 5 50

Faaiʻuga o Vaiaso 3 0 0 0 0 0 7 50

* Lima i le masina