“Molimau Atoatoa i le Tala Lelei”
1. O ā vala o le tala lelei e mafai ona tatou faailoa atu?
I lenei lalolagi e seāseā faalogo i se tala lelei, ua iā i tatou le faaeaga o le “molimau atoatoa i le tala lelei o le agalelei faifua o le Atua.” (Galu. 20:24) E aofia ai le faailoa atu i tagata, o nei “aso e gata ai” o le a toeitiiti ona aveesea lea e le lalolagi fou a Ieova, lea o le a ‘mavae atu ai mea muamua.’ (2 Timo. 3:1-5; Faaa. 21:4) O le a lē toe iai ni maʻi i lenā taimi. (Isa. 33:24) O le a toetutū mai ē pele mai le tuugamau, ma toe feiloaʻi ma aiga ma uō. (Ioa. 5:28, 29) O le a avea le lalolagi atoa ma parataiso matagofie. (Isa. 65:21-23) E lē na o le pau na o vala o le tala lelei e mafai ona tatou tufa atu!
2. Aiseā ua avea ai le taimi o le Faamanatuga ma avanoa lelei e molimau atu ai le tala lelei?
2 O le a tatou maua ni avanoa lelei e folafola atu ai na tala lelei i masina o Mati, Aperila, ma Me. A o faagasolo na masina, o le a lelei le tau ma tuai le taimi i le tele o atunuu o le lalolagi, ina ia tatou faaaluina ai se taimi tele i le galuega talaʻi. E lē gata i lea, o le faatasiga e sili ona tāua i le tausaga, o le Faamanatuga, lea o le a faia i le lalolagi atoa pe a goto le lā i le Aso Toonaʻi, Mati 22. O se taimi lelei la lenei e amata sauniuni ai e faateleina se sao i le galuega talaʻi.
3. O le ā o le a mafai ai e o tatou aiga ona faateleina se sao i le talaʻiga?
3 Paeonia Lagolago: Pe e mafai ona fetuunaʻi au mea e fai ina ia mafai ona e paeonia i se masina se tasi, pe lua, pe tolu foʻi? E lelei pe a tou talanoa faatasi o se aiga a o fai le tou suʻesuʻega, e tusa o lea tulaga. O le galulue faatasi, o le a mafai ai ona paeonia lagolago se tagata o le aiga, pe sili atu foʻi. (Faata. 15:22) Ia tatalo iā Ieova e tusa ma lea tulaga, ma iloa ai lona faamanuiaina o a outou taumafaiga. (Faata. 16:3) Afai foʻi e leai se isi o le aiga e mafai ona paeonia lagolago, e mafai lava e le aiga atoa ona fai ni sini ina ia faateleina se sao i le talaʻiga a o galulue ma isi paeonia.
4. E tusa lava pe faigaluega, e faapefea ona faatulaga o tatou taimi ina ia avea ma paeonia lagolago?
4 E tusa lava pe e te faigaluega, ae mafai lava ona e paeonia lagolago pe a lelei lau faasologa. Atonu e mafai ona e talaʻi i taimi o mālōlōga i le galuega. Po o le faia foʻi o sau lava oganuu e lata ane i lou fale po o le falefaigaluega, ina ia talaʻi ai mo se itula a o leʻi amata pe manava foʻi galuega. E mafai foʻi ona faaavanoa se taimi i lau faasologa e ala i le tuu o mea e lē tāua tele i se isi masina, ae talaʻi i faaiʻuga o vaiaso. O nisi ua fai ni o latou aso mālōlō ina ia faateleina se sao i le talaʻiga.
5. E mafai faapefea ona e fesoasoani i ē matutua ma ē lē malosi le tino ina ia paeonia lagolago?
5 Afai o oe o se tagata matua pe lē malosi le tino, atonu e mafai ona e paeonia lagolago e ala i le faaalu o se taimi itiiti e talaʻi ai i aso taʻitasi. Ia ōle atu iā Ieova e foaʻi mai iā te oe le “mana lea e sili atu i le malosi o tagata.” (2 Kori. 4:7) Sa mafai e se tuafafine ua 106 tausaga ona paeonia lagolago! Sa mafai ona ia talaʻi, faia toe asiga ma suʻesuʻega faale-Tusi Paia, ma faia se sao i isi vala o le auaunaga ona o le fesoasoani a ona tauaiga i le upu moni, ma isi o le faapotopotoga. Na ia fesoasoani i le amataina o suʻesuʻega faale-Tusi Paia ma tagata e toʻasefulu. Na ia faapea mai, “A o oʻu toe manatunatu i le faaeaga matagofie o le avea ma paeonia lagolago, na faateleina ai loʻu alofa ma loʻu talisapaia o Ieova ma lona Alo, faapea ma Lana faalapotopotoga agalelei. Ou te fia faapea atu ma loʻu lotoatoa, ‘Faafetai tele Ieova!’”
6. E mafai faapefea ona paeonia lagolago talavou ua uma ona papatiso ae o loo aʻoʻoga?
6 Pe afai o oe o se talavou ua papatiso ae o loo aʻoga, e ono mafai ona e paeonia lagolago. E pei o i latou e faigaluega, e mafai foʻi ona e talaʻi i faaiʻuga o vaiaso. Atonu i nisi aso, e lelei foʻi pe a talaʻi mo se itula pe a tūʻua le aʻoga. Pe e mafai ona e paeonia lagolago pe afai o mālōlō aʻoga? Talanoa ma ou mātua pe a fia fai sau paeonia lagolago.
7. O le ā e ono fai e toeaina ina ia atiaʻe le naunau i le talaʻiga a o faagasolo le vaitaimi o le Faamanatuga?
7 Ia Atiaʻe le Naunau: E mafai ona atiaʻe le naunau o le faapotopotoga, e ala i faaaʻoaʻoga a toeaina. (1 Pete. 5:2, 3) Atonu latou te faatulaga nisi faatasiga faaopoopo mo le galuega talaʻi, mo ē fia talaʻi i le taeao pō, pe a tūʻua aʻoga, po o le manava foʻi o galuega. E ao i le taʻimua o le auaunaga ona faamautinoa ua agavaa uso ua tofia e taʻitaʻia le faatasiga mo le talaʻiga, ma ia lava le oganuu, ma ia lava foʻi mekasini ma isi lomiga e ofo i na masina o le galuega faapitoa.
8. O le ā ua tatou aʻoaʻoina mai le mea na fai e se tasi faapotopotoga?
8 I se tasi o faapotopotoga, na faalaeiauina e toeaina le faapotopotoga ia paeonia lagolago a o leʻi taitai oo i le vaitaimi o na masina faapitoa. Na latou faailoa atu pea i le faapotopotoga i vaiaso taʻitasi, le aofaʻiga o tagata talaʻi ua mafai ona paeonia lagolago. Na mafai e lenā tulaga ona faamautinoa iā i latou e naunau e faateleina so latou sao i le talaʻiga, o le a mafai ona iai nisi latou te galulue faatasi. Na faatulaga foʻi ni faatasiga faaopoopo mo le talaʻiga i le taeao pō ma le afiafi. O le iʻuga, e 53 tagata talaʻi na mafai ona paeonia lagolago iā Aperila, ma e toetoe lava o le ʻafa o le faapotopotoga atoa!
9. Aiseā ua avea ai le vaitaimi o le Faamanatuga o se taimi lelei, mo ē ua agavaa, e amata ai ona talaʻi?
9 Fesoasoani i Isi e Talaʻi: Ia valaaulia tagata fou ma ē talavou ua agavaa, e amata ona talaʻi faatasi ma ē ua masani i le talaʻiga. O le a maua le avanoa e faia ai faapea i le vaitaimi o le Faamanatuga auā o le a toʻatele nisi i le faapotopotoga o le a faateleina le taimi e talaʻi ai. Po o iai se tagata o loo lua suʻesuʻe ua agaʻigaʻi i luma, ma ola e tusa ma taʻiala lelei atoatoa a Ieova? Po o lelei le tulaga o lau fanau ma agaʻigaʻi i luma, ae leʻi avea ma tagata talaʻi? Pe afai ua latou mananaʻo e avea ma tagata talaʻi e leʻi papatisoina, ma ua agavaa, ia faailoa atu i se toeaina. O le a faia e le ovasia taʻimua se fuafuaga e tou te talanoa faatasi ma toeaina e toʻalua ma lau suʻesuʻega, po o lou alo foʻi.
10. O le ā e fai e toeaina ina ia fesoasoani ai iā i latou e lē o toe talaʻi?
10 E talafeagai foʻi na masina mo ē e lē o toe talaʻi ina ia toe faaauau ona latou galulue ma le faapotopotoga. E tatau i taʻimua o suʻesuʻega tautusi ma isi toeaina ona taumafai e asi i latou ua lē o toe talaʻi, ma faalaeiauina e galulue faatasi ma i latou i le talaʻiga. Pe afai ua latou lē toe talaʻi mo se taimi umi, e ao ona latou talanoa ma ni toeaina se toʻalua e vaai po o agavaa pea e talaʻi.—km-SM 11/00 itu. 3.
11. O le ā le auala sili ua faaalia mai ai le “agalelei faifua o le Atua”?
11 Ia Sauniuni mo le Faamanatuga: O le taulaga togiola, o le auala sili lea ua faaalia mai ai le “agalelei faifua o le Atua.” (Galu. 20:24) E faitau miliona tagata loto talisapaia i le lalolagi aoao o le a faapotopoto faatasi i le Aso Toonai, Mati 22, pe a goto le lā, e faamanatuina le maliu o Keriso. E tatou te fia valaaulia ma fesoasoani i ē uma e fiafia ina ia auai i lenei aso tāua, lea e faamaonia ai le agalelei faifua o Ieova i tagata.
12. O ai tatou te valaaulia i le Faamanatuga?
12 Ia fai se lisi o tagata e te manaʻo e valaaulia. Tusi uma i lalo ou aiga, tuaoi, ma ē masani i aʻoga ma galuega, o ē na suʻesuʻe muamua po o loo suʻesuʻe i le taimi nei, ma isi o loo masani ona e asia. Pe afai e fia malamalama nisi i le Faamanatuga, e aogā ona tou talanoa i le faaopoopoga o le tusi o Aʻoaʻoga a le Tusi Paia, itulau 206-208, i le mataupu, O le Talisuaga a le Alii. Atonu e ono amata ai foʻi se suʻesuʻega faale-Tusi Paia, ona o lea o le a faaali i ai le tusi o loo faaaogā mo suʻesuʻega faale-Tusi Paia.
13. E faapefea ona faamanuiaina e Ieova taumafaiga a ni tagata talaʻi se toʻalua, ina ia valaaulia isi i le Faamanatuga?
13 Na fai e se tuafafine se lisi e valaaulia ai aiga e toʻa 48 i le faamanatuga. A o ia tufa atu ana valaaulia, na ia faailoga ma tusi le aso na valaaulia ai i latou. Sa ia fiafia tele ina ua auai atu tagata e toʻa 26 i le Faamanatuga! Na valaaulia e se uso sana tagata faigaluega lea sa avea muamua ma patele. Ina ua auai atu lenā tamāloa, sa ia faapea mai, “E tele atu mea ua ou aʻoaʻoina mai le Tusi Paia i lenei taimi puupuu, nai lo le 30 tausaga o oʻu lotu i le Katoliko.” E leʻi leva talu ona uma le Faamanatuga, ae faia loa sana suʻesuʻega i le tusi o Aʻoaʻoga a le Tusi Paia.
14. O le ā le tauiviga o le a amata iā Mati 1 lea e faia i le lalolagi aoao?
14 Tauiviga: E amata atu i le Aso Toonai, Mati 1 seʻia oo iā Mati 22, o le a tufatufaina ai i le lalolagi atoa le valaaulia faapitoa o le Faamanatuga. O le a fai se taumafaiga tele a tagata talaʻi uma i lenei tauiviga tāua. E lelei pe a tuu i le tagata o le aiga le valaaulia, ae aua le faataatiaina i luma o le faitotoʻa o le fale. Afai e telē la outou oganuu, atonu e faia e toeaina se fuafuaga, e ao i tagata talaʻi ona faautauta i le auala e tuu ai le valaaulia pe a leai se isi i le fale. O le a ofoina ai foʻi ma mekasini i faaiʻuga o vaiaso.
15. O le ā le auala e ofoina ai le valaaulia o le Faamanatuga?
15 Talu ai e lē umi se taimi e tufa ai le valaaulia, e lelei pe a faapuupuu lau taulimaga. Ia faaalia uiga fiafia ma le māfana. E mafai ona e faapea atu: “Matou te fiafia lava e valaaulia oe, ma lou aiga, ma au uō, e auai i la matou sauniga faapitoa e faia iā Mati 22, ma o lau valaaulia lea. O loo tusia ai le nofoaga ma le taimi e faia ai.” Atonu e iai se mea o le a fia malamalama ai lē e ona le fale, pe tali mai foʻi o le a ia auai. Ia fai ni faamaumauga ma toe foʻi e asi.
16. O le ā se mea na tupu e faaalia mai ai le tāua o le valaaulia o tagata i le Faamanatuga?
16 I le tausaga ua mavae, na maua ai e se fitafita se valaaulia i lalo o le faitotoʻa o lona fale. Sa fia auai, ae e tatau ona ia faanoi i lona taʻitaʻi. Ina ua ia faaali i lana taʻitaʻi le valaaulia, na lē tautala o ia mo sina taimi ona faapea mai lea, o ona mātua o ni Molimau a Ieova, ma e masani ona ia auai faatasi ma i laʻua i sauniga. E lē gata na ia faataga le fitafita e auai i le Faamanatuga, ae sa ia auai foʻi!
17. O le ā le auala e faaalia ai tatou te lē o misia le fuafuaga o le agalelei faifua o le Atua?
17 Ia Faaalia le Talisapaia: A o lata mai le vaitaimi o le Faamanatuga o le 2008, tau ina ia tatou manatunatu i le agalelei faifua o Ieova mo i tatou. Na tusi Paulo e faapea: ‘Ua matou ʻaiʻoi atu foʻi iā te outou, e aua neʻi talia le agalelei faifua o le Atua, ma misia ai lona fuafuaga.” (2 Kori. 6:1) E faapefea ona tatou faaalia e lē o misia le fuafuaga o le agalelei faifua o le Atua? Na tali foʻi Paulo e faapea: “Ae i mea uma ua matou faailoa atu ai i matou o ni auauna a le Atua.” (2 Kori. 6:4) O lea la, tatou te faaalia lo tatou talisapaia o le meaalofa a Ieova e ala i la tatou amiolelei, ma le talaʻia o le tala lelei ma le maelega. O le a maua se avanoa lelei i lenā vaitaimi o le Faamanatuga e faateleina ai la tatou galuega o le molimau atoatoa i le tala lelei.
[Pusa i le itulau 3
O Ai e Mafai Ona Paeonia Lagolago?
◼ O aiga
◼ O i latou e faigaluega
◼ O ē lē malolosi ma ē matutua
◼ O ē aʻoʻoga
[Pusa i le itulau 4]
Pe a Tufatufaina Valaaulia o le Faamanatuga:
◼ Ia faapuupuu ma māfana le talanoaga
◼ Ia fai faamaumauga o ē fiafia ma toe foʻi e asi
◼ Ia ofo mekasini i faaiʻuga o vaiaso