‘Outou Uma o Ona Tagata Amio Atua, ia Alolofa iā Ieova’
E Faamanatuina le Maliu o Iesu iā Aperila 4
1 I tausaga ua mavae a o pulea Ukraine e Komunisi, na mataʻituina ai uso e tagata sa i tulaga maualuluga o le malo— aemaise lava pe a latalata atu i le aso o le faamanatuina o le Talisuaga Afiafi a le Alii, ona e latou te faamoemoe o le a iloa ai le nofoaga e faia ai a latou sauniga. Sa avea lenei tulaga ma faafitauli masani, ona sa iloa e i latou sa i tulaga maualuluga le aso o le faamanatuga. O le ā le mea na faia e uso? Sa toʻa le vai i le potu pito i lalo o le fale o se tasi o tuafafine. Ona e leʻi manatu tagata maualuluga o le malo e mafai ona potopoto ai ni tagata i inā auā sa toʻa ai le vai, na fauina ai e uso se fola laupapa i luga aʻe o le vai lea e oo i tuli le loloto. E ui lava e tatau ona latou nonofo faanoʻunoʻu i luga o le fola laupapa i lalo ifo o le faalo maulalo o le fale, ae e leai se isi na faalavelave iā i latou a o faamanatuina ma le fiafia e le faapotopotoga le Faamanatuga.
2 O le naunautaʻi o o tatou uso Ukraine e usitaia le faatonuga e faamanatu le maliu o Iesu, o se faailoaga mataʻina lea o lo latou alofa i le Atua. (Luka 22:19; 1 Ioa. 5:3) Po o fea lava le taimi e tatou te fesagaʻi ai ma toʻatugā i o tatou olaga, tau ina ia tatou maua faalaeiauga mai i na faaaʻoaʻoga, ma ia maumauaʻi ia iai i inā e maimoaina le Talisuaga Afiafi a le Alii iā Aperila 4. O le faia faapea, e tatou te faaali atu ai e tutusa o tatou lagona ma le faisalamo o lē na pese e faapea: “O outou na uma lava o ona tagata amio Atua, ia outou alolofa atu iā Ieova.”—Sala. 31:23.
3 Fesoasoani i Isi ia Tupu Aʻe lo Latou Alofa mo le Atua: O le alofa i le Atua e uunaʻia ai foʻi i tatou e valaaulia isi e auai faatasi ma i tatou i le faamanatuga. O loo faalaeiauina i tatou i le faaopoopoga o La Tatou Faiva o le Malo o Fepuari, e faia se lisi o i latou o loo tatou fuafua e valaaulia i le Faamanatuga. Po o e naunau e mulimulitaʻia lenā fuafuaga i le valaaulia lea o tagata uma taʻitoʻatasi o loo i lau lisi? Ia faaalu se taimi e faamatala lelei ai i tagata le tāua o le faamanatuga iā i latou. Ia faamanatu i ai i se auala agalelei le aso ma le taimi o le Faamanatuga ma afai e talafeagai, ia fai i ai e te alu atu tou te ō mai faatasi, atonu o le faia faapea e faalaeiau ai i latou ina ia auai mai.
4 I le taimi o le faamanatuga, ia faia ni taumafaiga faapitoa e faafeiloaʻi i latou ua taliaina la tatou valaaulia, ma ia latou lagona o loo talileleia i latou. E faapefea ona e fesoasoani iā i latou ia tupu aʻe lo latou alofa mo Ieova? Ia faaavanoa atu oe e tali ni a latou fesili. Ia mataalia e ofo atu se suʻesuʻega faale-Tusi Paia pe a talafeagai ai. Valaaulia i latou e auai i a tatou sauniga faalevaiaso. E tāua i toeaina ona uaʻi faapitoa atu i Kerisiano ua lē o toe talaʻi o loo auai i le Faamanatuga. E mafai ona faatulaga e asiasi atu iā i latou na, ma faalaeiau i latou ina ia toe amata ona faifaimea faatasi ma le faapotopotoga, ma e ono ati aʻe i latou e faavae i manatu na maua i le lauga o le Faamanatuga.—Roma 5:6-8.
5 Ia Faaloloto lo Tatou Lava Alofa mo Ieova: O le manatunatu i le meaalofa o le togiola, e mafai ona faalolotoina ai lo tatou alofa mo Ieova ma lona Alo. (2 Kori. 5:14, 15) Sa faapea mai sē ua tele tausaga o auai i le Faamanatuga: “E tatou te tulimataʻia le taimi o le Faamanatuga. E tāua tele iā i tatou i tausaga taʻitasi. Ou te manatua loʻu tū i le mea sa fai ai le sauniga o le maliu o si oʻu tamā i le 20 tausaga ua mavae, i le vaai atu i le pusa maliu o si oʻu tamā pele, na ou matuā lagona ai le loto talisapaia mo le togiola. A o leʻi maliu loʻu tamā sa avea ua na o se mataupu o le aʻoaʻoga sa ou malamalama lelei i ai. Sa ou iloa uma lava mau ma le auala e faamatalaina ai! Peitaʻi ina ua ou lagona aafiaga na oo mai ona o le oti, na ou lagona le olioli o loʻu loto i le mea o le a faataunuuina e ala i le tāua o le togiola.”—Ioa. 5:28, 29.
6 A o latalata mai le aso o le Faamanatuga i lenei tausaga, ia faaalu se taimi e sauniunia ai lou loto mo lea aso. (2 No. 19:3) Mafaufau loloto i le Faitauga Tusi Paia faapitoa o le Faamanatuga, lea o loo faatulaga mai i le tusi mau Iloiloina o le Tusi Paia i Aso Taʻitasi—2004 ma le 2004 Calendar. E fiafia isi e toe autalu mataupu e 112-116 o le tusi Le Tagata Silisili a o faia a latou suʻesuʻega faaleaiga. O isi e faia a latou suʻesuʻega loloto faaopoopo i le faaaogāina o isi fesoasoani mo suʻesuʻega ua saunia e ala mai i le vasega o le auauna faamaoni ma le mafaufau. (Mata. 24:45-47) E mafai e i tatou uma lava ona taʻua le meaalofa o le togiola i a tatou tatalo mai le loto. (Sala. 50:14, 23) Ioe, i lenei vaitaimi o le Faamanatuga, seʻi o tatou faaauau ona manatunatu i le alofa o Ieova mo i tatou ma saʻilia auala e faaalia ai lo tatou alofa mo ia.—Mare. 12:30; 1 Ioa. 4:10.