Tauiviga Faapitoa mo le Tufaina Atu o le Polosiua Fou
1 E toʻatele tagata i aso nei ua pagatia i tulaga o le lalolagi ua iai, ae e toʻaitiiti lava i latou e malamalama i le māfuaaga ua faapea ai le tulaga o mea, atoa ma le lumanaʻi, ma le mea e tatau ona latou fai ina ia faasaoina ai i le faamasinoga o loo sau. (Eseki. 9:4) Ina ia fesoasoani iā i latou ia iloa le uiga o o tatou taimi, o le a faia ai se tauiviga faapitoa e tufatufaina atu le polosiua fou Ia Faaauau Ona Mataala! mai le Aso Gafua, Oketopa 18, seʻia oo i le Aso Sa, Novema 14.
2 E mafai ona ofo le polosiua a o auai i le faiva i le fale i le fale, po o le faia o toe asiga, pe a molimau atu lē fuafuaina, pe i so o se mea e feiloaʻi ai ma tagata lautele. Ae peitaʻi, e lē tatau ona tufaina faasoloatoa le polosiua Ia Faaauau Ona Mataala! i se tulaga lē magafagafa. Na i lo lenā, o le a ofo atu polosiua iā i latou e faaalia le fiafia i mea o loo fai mai ai le Tusi Paia e faatatau i le uiga o mea o loo tutupu i le lalolagi. O i latou e itiiti sina fiafia e faaalia i le feʻau, e ono ofo i ai se savali.
3 E te ono faapogaia le uaʻi mai o se tagata i le faapea atu:
◼ “E toʻatele tagata ua popole i faafitauli matuiā ma mea ua tutupu e gatete ai o loo taatele i aso nei. [Ia taʻua se faataʻitaʻiga e iloa e tagata o lenā vaipanoa.] Pe e te silafia na folafolaina mai nei mea i le Tusi Paia? [Faatali mo se tali. Ona faitau lea o se mau e fetaui ma le faataʻitaʻiga na taʻua, e pei o le Mataio 24:3, 7, 8; Luka 21:7, 10, 11; po o le 2 Timoteo 3:1-5.] Ua faailoa mai e le Tusi Paia le uiga o mea o loo tutupu i o tatou aso ma le mea o loo taatia mai i le lumanaʻi mo tagata. Pe e te fia silafia atili e faatatau i lea tulaga? [Faatali mo se tali. Ofo le polosiua pe a faaalia le naunau moni.] E mafai ona e maua le polosiua e aunoa ma se totogi. Ae afai e te manaʻo e fai sina foaʻi itiiti i la matou galuega i le lalolagi aoao, e matou te taliaina ma le fiafia.”
4 O le isi lenei taulimaga atonu e aogā:
◼ “E toʻatele ua matuā faanoanoa i mea e matuā faateʻia ai o loo tutupu i le lalolagi po o ni mala mataʻutia foʻi ua oo i le tagata lava ia. E tau mānatu nisi pe aiseā ua lē faalaa mai ai le Atua e taofia nei mea mai le tutupu. Ua faamautinoa mai e le Tusi Paia iā i tatou faapea, ua toeitiiti nei ona gaoioi loa lea o le Atua e aveesea puapuaga o tagata. Mātau faamanuiaga o le a aumaia e le Atua i tagata. [Faitau le Salamo 37:10, 11.] Pe e te fia silafia atili e faatatau i nei mea?” Ia faaiʻu e pei ona faatulaga i luga.
5 Taumafai e maua le suafa ma le tuatusi o tagata taʻitoʻatasi na taliaina se kopi o le polosiua, ma fai se fuafuaga e toe foʻi e ati aʻe le fiafia lea na faaalia. O fautuaga i le auala e faia ai, o le a iai i La Tatou Faiva o le Malo o Novema 2004. Pe a faaalia e le tagata le fiafia moni i le uluaʻi asiasiga, e mafai la ona e amata se suʻesuʻega faale-Tusi Paia i le taimi lava lenā i le faaaogāina a lē o le polosiua Ia Faaauau Ona Mataala! o se isi lomiga, e pei o le Manaomia.
6 O le a maua kopi o le polosiua fou pe a uma le Sauniga o le Auaunaga lea e talanoaina ai le mataupu lenei. E fautuaina tagata talaʻi ma paeonia e ave muamua na o ni nai polosiua e manaʻomia mo uluaʻi aso o le tauiviga. Tau ina ia faamanuia Ieova i nei gaoioiga faapitoa mo sona viiga, ma maua ai e i latou i so o se vaipanoa e faamaoni o latou loto, ia aogā o lenei tauiviga faapitoa.—Sala. 90:17.