Ua Faateleina Galuega i le Vaitaimi o le Faamanatuga
1. O ā aafiaga na iai o “tausamiga” iā Ieova i tagata Isaraelu matataʻu i le Atua?
1 I taimi patino o le tausaga, na faamanatuina ai e tagata Isaraelu anamua ia “tausamiga iā Ieova.” (Levi. 23:2) O le faaalu o se taimi e manatunatu loloto ai i le lelei o lo latou Atua, na maua ai le fiafia tele, ma uunaʻia ai i latou e maelega mo le tapuaʻiga mamā.—2 No. 30:21–31:2.
2, 3. Aiseā e talafeagai ai le faateleina o a tatou galuega faaleagaga i le vaitaimi o le Faamanatuga, ma o afea le Faamanatuga?
2 I aso nei, i le vaitaimi o le Faamanatuga i tausaga taʻitasi, e faateleina ai la tatou galuega fiafia faaleagaga. O le taimi lea e tatou te mafaufau loloto ai e uiga i le taulaga lē mafaatusalia na faia e Ieova mo i tatou, e ala i lona Alo pele e toʻatasi. (Ioa. 3:16; 1 Pete. 1:18, 19) Pe a tatou manatunatu i le alofa o Ieova ma lona Alo, ua uunaʻia ai i tatou e vivii atu iā Ieova ma finafinau ai foʻi e faia lona finagalo.—2 Kori. 5:14, 15.
3 I le tausaga lenei, o le a faamanatuina ai le Talisuaga Afiafi a le Alii i le Aso Tofi, Mati 24, pe a goto le lā. E faapefea ona faateleina so tatou sao i le talaʻiga i masina o Mati, Aperila, ma Me?
4, 5. (a) O le ā na fesoasoani i nisi ia toʻatele nisi e oo atu i ai ma le tala lelei? (e) O le ā le auala ua e iloa e taulau i la outou oganuu?
4 Ia Oo Atu i Tagata e Toʻatele: Ia suʻe ni avanoa e oo atu ai i tagata e toʻatele i le talaʻiga. Pe mafai ona e auai i le galuega mai lea fale i lea fale i le taimi e toʻatele ai tagata e iai i aiga, e pei o le afiafi? Afai e iai nisi i la outou suʻesuʻega tautusi e fia talaʻi a o leʻi amataina le suʻesuʻega a le vaega, e mafai e le ovasia o le suʻesuʻega ona feiloaʻi puupuu mo le talaʻiga i se oganuu e latalata ane.
5 O le isi auala e oo atu ai i le toʻatele o tagata, o le molimau atu lea i nofoaga faitele. Sa manaʻo se tuafafine i Iapani e faia sana paeonia lagolago e ui lava sa faigaluega o ia. Sa fautuaina o ia e se toeaina e faapea, i aso taʻitasi a o leʻi alu atu i le galuega, e mafai ona ia molimau atu i magāala e latalata ane i le nofoaga o le nofoaafi. I le taimi muamua na matamuli o ia ma popole ina neʻi ulagia o ia e tagata. Ae na ia lototele ma talaʻi atu iā i latou ma na ia maua ni tagata se toʻa 40 na fai ma ana alāmekasini, na aofia ai ni tagata pasese, tagata faigaluega i le nofoaga o nofoaafi, ma tagata e ona faleoloa na latalata ane. Sa ia tufaina atu le tusa ma le 235 mekasini i le masina. I le talanoa puupuu ma tagata i ni manatu faale-Tusi Paia i aso taʻitasi, na mafai ai ona ia amataina ni suʻesuʻega faale-Tusi Paia se ono.
6. E faapefea ona faateleina e talavou a latou galuega faaleagaga?
6 Avanoa e Molimau Atu Ai: A o faagasolo le tausaga e iai vaitaimi e tuua ai aʻoga. O vaitaimi lelei na mo tamaiti aʻoga e avea ai ma paeonia lagolago. E lē gata i lea, e mafai e talavou Kerisiano ona faateleina a latou galuega e ala i le molimau atu i le aʻoga. Atonu e te maofa ona o loo fia iloa e tamaiti o lau vasega ou talitonuga. Aiseā e lē faaaogā ai taimi e faia ai talanoaga a le aʻoga po o le tusia o ni tala pupuu, e avatu ai se molimau? Ua faia faapena e isi e ala i le faaaogāina o vitiō a Molimau a Ieova. Ua amata e nisi ni suʻesuʻega faale-Tusi Paia ma a latou uō i le vasega ma fesoasoani iā i latou ina ia agaʻigaʻi i luma i le tuuina atu ma le papatisoga. O auala lelei nei e “vivii atu [ai] i le suafa o Ieova.”—Sala. 148:12, 13.
7. (a) Na faapefea ona faaaogā e le tasi uso le avanoa e molimau atu ai i isi? (e) Pe na tupu se mea fiafia faapena iā te oe?
7 A o faia au feʻau masani, ia taumafai ona talanoa atu i tagata e uiga i lo tatou Atua ofoofogia ma ana folafolaga matagofie. O se tasi uso, o lē e ō faatasi i le nofoaafi i aso uma ma isi tagata faigaluega, e masani ona ia molimau atu i ai pe a talafeagai. O se faaaʻoaʻoga, a o faatali mo le nofoaafi, sa ia molimau atu ai i se tasi tamāloa talavou mo le lima minute i aso taʻitasi. O le iʻuga, na malilie lenei tamāloa talavou ma lana uō e faia se suʻesuʻega faale-Tusi Paia. Sa faia le suʻesuʻega faale-Tusi Paia i luga o le nofoaafi a o latou faimalaga. Mulimuli ane sa talosaga atu se tinā matua o lē sa faalogologo i a laʻua talanoaga mo se suʻesuʻega faale-Tusi Paia. Ua fiafia foʻi le tinā matua i lana suʻesuʻega ua faia i luga o le nofoaafi. I lenei auala, na suʻesuʻe ai le uso ma tagata eseese e toʻa sefulu i luga o le nofoaafi.
8. O le ā le auala e mafai ona faateleina ai se sao i le talaʻiga o i latou ua tapulaa mea latou te mafaia ona o tausaga matua, po o faafitauli o le soifua mālōlōina?
8 Ae faapefea pe a faatapulaa mea e mafai ona e faia ona o lou tulaga matua po o ni faafitauli o le soifua mālōlōina? E iai pea auala e mafai ona faateleina ai lou viia o Ieova. Pe na e molimau atu i le telefoni? Afai e te lē mautinoa i le auala e faia ai lenei molimau atu, ia faailoa atu i la outou ovasia o le suʻesuʻega tautusi. Atonu e mafai ona ia faatulaga ni tagata talaʻi o ē e masani i lenei talaʻiga ina ia galulue ma oe. O le galulue taʻitoʻalua, e mafai ai ona e aʻoaʻoina ma fesoasoani ai le tasi i le isi e avatu se molimau lelei. E mafai ona maua fautuaga lelei i le faia o le molimau atu i telefoni i La Tatou Faiva o le Malo o Fepuari 2001, itulau 5-6.
9. E faapefea ona tatou fesoasoani i tagata suʻesuʻe o le Tusi Paia ina ia agavaa e faia se sao faatasi ma le faapotopotoga i le talaʻiga?
9 O le auai i le Faamanatuga, atonu e uunaʻia ai tagata fou ina ia faateleina lo latou viia o Ieova. E mafai ona e fesoasoani iā i latou ina ia manumalo mai le fefe e faia se sao i le galuega talaʻi, e ala i le faamatala atu o ni mea na tutupu i le talaʻiga e faalaeiauina ai. Ia aʻoaʻo foʻi i latou ina ia faamatala mai aʻoaʻoga faale-Tusi Paia ma ia saunia ni tali e uiga i lo latou faatuatuaga. (1 Pete. 3:15) Afai e taʻua e se tagata aʻoga o le Tusi Paia se faanaunauga e fia talaʻi, ia talanoa atu i le ovasia taʻimua. O ia na te fuafuaina se talanoaga ma le tagata aʻoga ina ia iloa ai po ua agavaa o ia e faia sona sao faatasi ma le faapotopotoga i le talaʻiga. Maʻeu le fiafia o le finagalo o Ieova i le silasila mai ua lagolagoina e tagata talaʻi fou lana pule silisili ese!—Faata. 27:11.
10. (a) E faapefea ona fesoasoani iā i tatou se faasologa lelei ina ia paeonia lagolago ai? (e) Pe sa mafai ona e paeonia lagolago i le vaitaimi o le Faamanatuga i le tausaga ua mavae? Na faapefea?
10 Pe e Mafai Ona E Paeonia Lagolago? E 50 itula e manaʻomia e le paeonia lagolago, ma e lē tatau ona manatu māmā i ai. (Mata. 5:37) O lona uiga, e fuafua e talaʻi e tusa ma le 12 itula i vaiaso taʻitasi. Pe e talafeagai ma ou tulaga se faaaʻoaʻoga o le faasologa mo le auaunaga paeonia lagolago o loo i le itulau e 5? Afai e leai, pe mafai ona e faatulaga se faasologa ina ia paeonia lagolago iā Mati, Aperila, po o Me? Tatalo atu iā Ieova e faamanuia mai au taumafaiga ina ia faateleina lou sao i le auaunaga.—Faata. 16:3.
11. E faapefea ona lagolagosua toeaina ma auauna o le faiva iā i latou o loo auauna o ni paeonia lagolago?
11 O le a lagolagosua ia toeaina ma auauna o le faiva i a outou taumafaiga ina ia avea lenei vaitaimi o le Faamanatuga ma taimi faapitoa e vivii atu ai iā Ieova. Atonu o le a paeonia lagolago foʻi le toʻatele o i latou. O le a fuafua e toeaina ina ia faia nisi feiloaʻiga faaopoopo mo le talaʻiga, e pei o afiafi o aso taʻitasi o le vaiaso pe afai e talafeagai. Ina ia fuafua po o fea e fetaui ai, ma o ai o le a avanoa e taʻitaʻia, e mafai ona talanoa atu toeaina iā i latou o faia ni fuafuaga maʻoti e paeonia po o i latou o loo mafaufau e faia faapea. O le a taumafai toeaina e faia fuafuaga ina ia iai nisi tagata talaʻi e tou te galulue i aso ma taimi ua e faatulaga mo le talaʻiga. I lenei auala, e mafai ona faamautū lelei ai ni fuafuaga, ma o le a tele ai ni mea lelei e faataunuuina.—Faata. 20:18.
12. O le ā ua uunaʻia ai i tatou e vivii atu iā Ieova i taimi uma lava?
12 Ia Faia le Mea Aupito Sili E te Mafaia: Pe afai ua lē mafai ona e paeonia lagolago ona o lou tulaga, ia manatua, e talia e Ieova a tatou taumafaiga ua faia ‘e tusa ma mea ua iā i tatou, a e lē tusa ma mea e lē o iā i tatou.’ (2 Kori. 8:12) E anoanoaʻi mea e ao ona tatou faafetai atu ai iā Ieova. O lea na tusi ai Tavita: “Ou te faafetai iā Ieova i aso uma lava; e lē aunoa ona viiga i loʻu gutu.” (Sala. 34:1) Seʻi o tatou faia lenā mea i lenei vaitaimi o le Faamanatuga.
[Pusa i le itulau 3]
E Faapefea Ona E Faateleina Lau Galuega?
◼ Talaʻi atu pe a iai tagata i o latou aiga
◼ Molimau atu i nofoaga faitele
◼ Molimau atu i le galuega po o le aʻoga
◼ Molimau atu i telefoni
◼ Auauna o se paeonia lagolago
[Siata i le itulau 5]
Faasologa mo le Paeonia Lagolago—Auala e Maua ai le 12 Itula i le Galuega Talaʻi i Vaiaso Taʻitasi
Taeao o Aso Gafua e Oo i le Aso Toonai
E mafai ona e galue i le Aso Sa e sui ai se isi aso.
Aso Taimi Hours
Aso Gafua Taeao 2
Aso Lua Taeao 2
Aso Lulu Taeao 2
Aso Tofi Taeao 2
Aso Faraile Taeao 2
Aso Toonai Taeao 2
Aofaʻi o Itula: 12
Aso Atoa e Lua
E pule oe i ni aso se lua e filifilia i le vaiaso. (Atonu e 48 le aofaʻi o itula o lenei faasologa, e fua i aso ua e filifilia.)
Aso Taimi Itula
Aso Lulu Aso Atoa 6
Aso Toonai Aso Atoa 6
Aofaʻi o Itula: 12
Afiafi e Lua ma le Aso Toonai ma le Aso Sa
Ia filifili ni afiafi se lua o le vaiaso.
Aso Taimi Itula
Aso Gafua Afiafi 1 1⁄2
Aso Lulu Afiafi 1 1⁄2
Aso Toonai Aso Atoa 6
Aso Sa Afa Aso 3
Aofaʻi o Itula: 12
Aoauli e Tolu ma le Aso Toonai
E mafai ona e galue i le Aso Sa e sui ai se isi aso.
Aso Taimi Itula
Aso Gafua Aoauli 2
Aso Lulu Aoauli 2
Aso Faraile Aoauli 2
Aso Toonai Aso Atoa 6
Aofaʻi o Itula: 12
Laʻu Faasologa o le Galuega Talaʻi
Ia fuafua pe fia itula e galue ai i aso taʻitasi.
Aso Taimi Itula
Aso Gafua
Aso Lua
Aso Lulu
Aso Tofi
Aso Faraile
Aso Toonai
Aso Sa
Aofaʻi o Itula: 12