Molimau Atu ma le Uigā i Nofoaga Faitele
1. I le faataʻitaʻi atu i Kerisiano i le uluaʻi senituri, o faapefea ona molimau atu Kerisiano i aso nei i nofoaga faitele, ma o ā iʻuga ua maua mai ai?
1 I le pei o uluaʻi soo o Iesu, ua faapea foʻi ona saʻili e Kerisiano i aso nei avanoa e tufa atu ai le tala lelei i tagata po o fea lava e maua ai. (Galu. 16:13; 17:17; 20:20, 21) O iʻuga o a latou taumafaiga e molimau atu i nofoaga faitele, ua latou maua ai tagata fiafia o ē na semanū e lē mafai ona maua i le talaʻiga mai lea fale i lea fale.
2. Aiseā e manaʻomia ai le faautaga poto pe a molimau atu i nofoaga faitele, ma e faapefea ona tatou saosaolaumea i le maopoopo o lenei fuafuaga?
2 E manaʻomia ona iai le faautaga poto pe a talaʻi atu i nofoaga faitele. O le tulaga masani, e sili atu ona lelei le galulue i se tulaga e lē o matilatila atu i le vaaiga a tagata. O se faaaʻoaʻoga, afai e toʻatele naʻuā le ʻautalaʻi e molimau atu i se vaipanoa e tasi, po o le asiasi uma atu foʻi i ni pisinisi i se nofoaga lava e tasi, e lagona ai e nisi le matamumuli ona o lo tatou soona tumutumu atu i lenā nofoaga. O lea tulaga, e aveesea ai le mamalu o la tatou galuega, ma ono faaitiitia ai le aogā o la tatou galuega. O le ā e fai ina ia ʻalofia ai le tupu o lenei mea? O nisi o faapotopotoga ia e tele vaipanoa e molimau atu ai i le lautele, ua latou iloa le lelei o le faatulaga o ia nofoaga e avea o ni oganuu taʻitasi. (1 Kori. 14:40) E lē gata i lea, e mafai ona tatou saosaolaumea i le maopoopo lelei o faatulagaga, i lo tatou galulue i le oganuu ua tofia i ai la tatou faapotopotoga seʻi vaganā, ua faia ni faatulagaga patino e ala i le Komiti o le Auaunaga a le Faapotopotoga e fesoasoani ai i se isi faapotopotoga.—Tagaʻi i La Tatou Faiva o le Malo o Novema 1998, itu. 6, pala. 18-19.
3. O le ā le auala e talanoa atu ai, ua iloa e nisi le uigā pe a latou molimau atu i nofoaga faitele?
3 Talanoa Atu i Tagata: Ina ua talanoa atu Iesu i se fafine i se vaieli, sa ia amata i se faamatalaga puupuu, ona faasolosolo lea ona faaumiumi atu le talanoaga a o faaalia mai lona fiafia. (Ioa. 4:7-26) O lenei auala o talanoaga o loo uigā lava foʻi i nisi o tulaga patino i aso nei. Ua iloa e nisi o tagata talaʻi faapea, ina ia uigā atili i le molimau atu i nofoaga faitele, e aogā le faaalu o ni nai minute e faafeiloaʻia ai le tagata, ma faailoa atu le naunau iā i latou a o leʻi tauaaoina atu le tala lelei o le Malo. O le talanoa atu o le tagata talaʻi i mea o loo naunau i ai tagata i le oganuu, e masani lava ona tataʻi ai i se talanoaga. A o faailoa mai e nisi o latou popolega, e latou te faalogologo lelei atu. E lē umi lava se taimi ae latou talanoa atu i faamāfanafanaga mai le Afioga a le Atua.—Roma 15:4.
4. E faapefea ona tatou ati aʻe le fiafia o le tagata ua tatou maua?
4 Ati Aʻe le Fiafia: O taimi taʻitasi e tatou te faia ai ni talanoaga lelei ma tagata, e ao ona tatou taumafai e faia ni fuafuaga ina ia ati aʻe ai le fiafia lea ua faaalia. E faapefea ona tatou faia lenei mea? A o lata atu le talanoaga i le faaiʻuga, ona avaʻe lea i luga o lau tamaʻi api mo faamaumauga ma faapea atu: “E ese loʻu fiafia i la ta talanoaga. Faamata e iai se isi taimi e mafai ona faaauau ai la ta talanoaga?” Po o le faapea atu foʻi: “Ou te manaʻo e te faitau i se mataupu ou te manatu o le a e fiafia i ai. Pe e mafai ona ou aumaia iā te oe i lou aiga po o le ofisa?” O isi tagata talaʻi e na ona faapea atu lava: “O le ā le numera o lau telefoni?” E masani lava ona talilelei mai e le tagata.
5. O le ā lo tatou sini pe a molimau atu i nofoaga faitele?
5 O le toʻatele o tagata na muamua lava fesootaʻi i ai i nofoaga faitele ua latou taliaina ni suʻesuʻega faale-Tusi Paia. E mafai ona faia na suʻesuʻega i le aiga o le tagata, i le mea o loo faigaluega ai, i se nofoaga faitele e talafeagai, po o luga foʻi o le telefoni. Seʻi fai ma o tatou sini le amata o ni suʻesuʻega faale-Tusi Paia e uigā, a o tatou talaʻi atu i nofoaga faitele.