Auala Fou e Talaʻi ai i Nofoaga Faitele
1. O le ā le faaaʻoaʻoga na faataatia e Kerisiano i le uluaʻi senituri?
1 E lē na o le talaʻiga mai lea fale i lea fale na faia e Kerisiano i le uluaʻi senituri. Sa latou talaʻi foʻi i le lautele. (Galu. 20:20) O se faaaʻoaʻoga, sa latou ō i le malumalu ona na toʻatele tagata e maua ai i inā. (Galu. 5:42) A o iai Paulo i Atenai, sa ia talaʻi i aso uma i tagata sa iai i le maketi. (Galu. 17:17) O le auala autū e tatou te folafola atu ai le tala lelei i aso nei, o le talaʻiga mai lea fale i lea fale. Peitaʻi, e tatou te talaʻi foʻi i tagata e maua i so o se nofoaga, e pei o mea e paka ai taavale, nofoaga o pisinisi, paka e tafafao ai, magāala e pisi ma isi nofoaga. Ua faalaeiauina tagata talaʻi uma ina ia talaʻi i nofoaga faitele pe afai e talafeagai. Ona o lea, e toʻatele la o le a maua le avanoa e auai ai i ni auala fou se lua e talaʻi ai i nofoaga faitele.
2. O le ā le auala fou na amata ona faataʻitaʻi iā Novema 2011?
2 Talaʻiga Faapitoa i Nofoaga Faitele: Ua taʻua i le Tusi Tausaga o le 2013, itulau e 16, 17 e faapea, iā Novema 2011, na faataʻitaʻi ai i le aai o Niu Ioka se auala fou e talaʻi ai i nofoaga faitele. Sa fola mekasini ma tusi i luga o laulau ma fata e iai uili e toso ai, ma faatutū i nofoaga e toʻatele tagata e fepasiaʻi solo ai. E faitau afe tagata e pāsia nei nofoaga i aso taʻitasi. E aofia ai i latou e nonofo i falemautotogi e lē mafai pe e lē faatagaina ona ō atu iai nisi, ma ē e masani ona lē maua atu i o latou fale. E mataʻina le tali mai a tagata. I se masina talu ai nei, e 3,797 mekasini ae 7,986 tusi na mafai ona ofoina. E toʻatele ē na pasia nei nofoaga na mananaʻo e fai ni a latou suʻesuʻega faale-Tusi Paia. Talu ai o le fuafuaga autū ina ia amata ni suʻesuʻega faale-Tusi Paia, o tuatusi uma la a tagata fiafia na maua, sa vave ona lafo atu i faapotopotoga e iai tonu nei tuatusi, ina ia toe asia na tagata fiafia.
3. Ua faapefea ona faalautele atu lenei auala fou na faataʻitaʻi?
3 Ona e mataʻina iʻuga lelei o lenei auala fou na faataʻitaʻi, o lea ua faalautele atu ai i le lalolagi aoao i isi vaipanoa e toʻatele ma tumutumu ai tagata. O le a faailoa atu e le ofisa o le lālā o le atunuu vaipanoa e talafeagai ona faaaogā. E masani lava o nei vaipanoa e iai ni nofoaga o fetaulaʻiga o magāala, ofisa ma fale tetele a le malo, ma e toʻatele tagata e feoaʻi solo ai. E lafo atu e le lālā tusi i faapotopotoga o le a auai i lenei galuega, ma tuu atu i ai nisi faatonuga atili. E masani lava ona faaaogā paeonia sauatoa ma paeonia faapito, ae o nisi taimi e mafai foʻi ona faia ai se sao o paeonia lagolago.
4. E faapefea ona fai le talaʻiga faapitoa i nofoaga faitele?
4 Auala e Talaʻi Atu Ai: O i latou e auai i le talaʻiga faapitoa i nofoaga faitele, e masani ona faatalitali mo se tasi e afe atu i le laulau po o le fata o loo faaali ai mekasini ma tusi. Pe a afe atu, ona fai lea i ai e mafai ona ia ave so o se lomiga e manaʻo i ai. E faaaogā e paeonia le Tusi Paia e tali ai so o sana fesili e lāgā. Afai e ave ni ana lomiga, e lē taʻuina i ai e paeonia le fuafuaga i meaalofa tauofo. Ae afai e fesiligia pe faapefea ona faatupe le galuega, e ono faamatala i ai e mafai ona lafo atu lana meaalofa i se tuatusi o loo taʻua i le lomiga. Pe a talafeagai, e mafai ona fesili i le tagata: “Pe e te manaʻo e asiasi atu se tasi ia te oe i lou maota?” pe “Pe e te silafia e mafai foʻi ona matou faia ni talanoaga faale-Tusi Paia e aunoa ma se totogi?”
5. Na faapefea ona tauia se ulugalii ona o le faia o so la sao i lenei auala fou na faataʻitaʻi?
5 Na matuā tauia ē na faia se sao i lenei auala fou na faataʻitaʻi. Na taʻua e se tasi ulugalii: “A o ma tutū i le laulau ma mātauina le faitau afe o tagata e fepasiaʻi solo i aso taʻitasi, na matuā faagaeetia o ma loto i galuega fitā ua faia ina ia talaʻi i tagata mai i so o se vaega o le lalolagi. O le vaai atu i le toʻatele o tagata ma mafaufau i le naunau moni mai o Ieova i so o se tasi, na matuā faamalosia ai la ma filifiliga ia faamuamua pea le talaʻiga i o ma olaga. E ma te faaāta Ieova o loo ia iloiloina loto o tagata uma e pāsia le laulau, ma saʻili mo ē ua tatau iai le feʻau. Ua ma iloa ai le moni o le iai o le taʻitaʻiga a agelu i le galuega talaʻi.”
6. (a) O le ā le isi auala fou ua faatulaga i le tele o faapotopotoga, ma e faapefea ona ese mai i le talaʻiga faapitoa i nofoaga faitele? (e) E faapefea ona felagolagomaʻi faapotopotoga pe a auai i le talaʻiga i nofoaga faitele? (Tagaʻi i le pusa.)
6 Talaʻiga i Nofoaga Faitele e Faatulaga e le Faapotopotoga: E ese mai i le talaʻiga faapitoa i nofoaga faitele, ua iai se isi auala fou ua faatulaga e le toʻatele o le ʻautoeaina i oganuu a o latou lava faapotopotoga. E faaaogā e le ʻautalaʻi se laulau po o se fata e toso solo e faaali ai lomiga, i se nofoaga e toʻatele tagata e fepasiaʻi solo ai, i le oganuu a le latou lava faapotopotoga. O lenei auala e ese mai i le talaʻiga faapitoa i nofoaga faitele, lea e faaaogā ai tagata talaʻi mai i faapotopotoga eseese, ina ia talaʻi i nofoaga e tumutumu ai tagata i vaipanoa ua filifilia e le ofisa o le lālā.—Tagaʻi i le pusa “Ia Lelei Fesootaʻiga.”
7. E faapefea ona faatulaga e le ʻautoeaina le talaʻiga i nofoaga faitele a le latou faapotopotoga?
7 E iloilo e toeaina pe e iai ni nofoaga i le oganuu a le faapotopotoga e tumutumu ai tagata, ma pe mafai ona faatulaga e talaʻi ai. E aofia ai nofoaga faitele, fetaulaʻiga o magāala, paka e tafafao ai, magāala e pisi, faleoloa, nofoaga o kolisi ma iunivesite, malaevaalele, ma nofoaga e faia ai ni faatasiga po o sauniga faapitoa. E tāua ona iai se laulau i le nofoaga lava lenā, i aso ma taimi e masani ai. Ua mātauina le tele o iʻuga lelei e maua mai i laulau e faatutū i fale e tele faleoloa e iai, nai lo o se laulau e faatū i se faleoloa patino se tasi e lē toʻatele ni tagata e ō atu i ai. I nofoaga e pisi i tagata e savavali solo, atonu e sili ona lelei le faaaogā o se tamaʻi fata e toso solo e faaali ai tusi ma mekasini. Ua iai foʻi ni ata faapitoa o Le Olomatamata, Ala Mai! ma le tusi Aʻoaʻoga a le Tusi Paia, ua saunia faapitoa ina ia faatutū i luga o laulau po o fata. E mafai ona kopi mai e toeaina nei ata mai i la tatou tuatusi i le Initaneti. O le a faia lenei talaʻiga e pei foʻi o le auala o loo faia ai le talaʻiga faapitoa i nofoaga faitele, ma e tatau ona mulimuli i faatonuga mai i le ovasia o le auaunaga. Afai e maua se tuatusi o se tagata fiafia ae e lē nofo i la outou oganuu, e tatau ona vave faatumu le pepa Please Follow Up (S-43) ma tuu atu i le failautusi.
8. Afai e lē o iai ni faatulagaga a le faapotopotoga mo talaʻiga i nofoaga faitele, o ā avanoa e mafai lava ona talaʻi ai i le lautele?
8 Ia Faaaofia le Talaʻiga i Nofoaga Faitele i Lau Faiva: O nisi faapotopotoga atonu e leai ni nofoaga i a latou oganuu e talafeagai ona faatutū ai ni laulau po o fata mo tusi ma mekasini. Peitaʻi, o loo faalaeiau foʻi na faapotopotoga ia faaaofia i a latou talaʻiga le talaʻi i nofoaga faitele. Po o iai i la outou oganuu se faleoloa e toʻatele tagata e faatau ai? Po o iai se paka po o se nofoaga e faia ai ni faatasiga po o sauniga faapitoa mo le lautele? Afai o iai, e mafai lava ona e faaaogā e molimau atu ai i le lautele.
9. Aiseā e ao ai ona tatou matuā uaʻi atu e talaʻi i tagata i so o se mea e maua ai i latou?
9 E finagalo Ieova “ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:4) O lea e tatou te taumafai ai e taʻu atu le feʻau o le Malo i le toʻatele o tagata e mafai ai, a o leʻi oo mai le iʻuga. (Mata. 24:14) O se luʻi i le tele o vaipanoa le lē maua atu o tagata i o latou fale. Peitaʻi e mafai ona maua i latou i nofoaga faitele ma talanoa i ai. Atonu o le talaʻiga i nofoaga faitele e na o le pau lea o le avanoa e faalogo ai nisi i le tala lelei. O lea la, seʻi o tatou fai ma le māeʻaeʻa la tatou faiva e ala i le talaʻi i tagata i so o se mea e maua ai i latou.—2 Timo. 4:5.
[Pusa i le itulau 5]
Ia Lelei Fesootaʻiga
O nisi taimi e mātauina ai le ʻautalaʻi o ni faapotopotoga eseese e felataʻi, o loo talaʻi i se magāala lava e tasi, mea e paka ai taavale, ma nofoaga o pisinisi po o fetaulaʻiga o femalagaaʻiga. E lē gata i lea, e eseese faapotopotoga a tagata talaʻi, ae ua latou talaʻi uma ma tuu mekasini i se nofoaga e tasi, e pei o potu faatalitali, faletāmea ma pisinisi. Ua avea lea ma itu ua lē fiafia ai tagata faipisinisi ma tuaoi, e tusa lava pe eseese le ʻautalaʻi e ō atu i taimi eseese. O lea la, pe a talaʻi i nofoaga faitele, e sili ona lelei pe a talaʻi pea i nofoaga o loo iai i le oganuu a la outou faapotopotoga.
Pe afai e fia ō atu se ʻautalaʻi e talaʻi i nofoaga faitele o loo i le oganuu a se isi faapotopotoga, e tatau ona talanoa muamua atu i la latou ovasia o le auaunaga. Ona ia faafesootaʻi lea o le ovasia o le auaunaga a le isi faapotopotoga ina ia maua se faatagaga. Pe afai e iai ni faapotopotoga e eseese gagana ae ua tofia e talaʻi i se nofoaga e tasi, e tatau ona lelei fesootaʻiga a ovasia o le auaunaga, ina ia ʻalofia ai le faia o se mea e lē fiafia ai tagata o loo i na nofoaga. O le lelei o fesootaʻiga, o le a mafai ai ona faia mea uma i se “tulaga talafeagai ma le maopoopo.”—1 Kori. 14:40.