Se Auala Fou ma Manaia e Talaʻi ai i Nofoaga Faitele
1. O le ā le faalaeiauga mo faapotopotoga e iai i a latou oganuu ni nofoaga e tumutumu ai tagata?
1 Ua faalaeiauina faapotopotoga e iai i a latou oganuu ni nofoaga e tumutumu ai tagata, e faatulaga ni talaʻiga mo na nofoaga, e faaaogā ai laulau ma fata e toso solo e faaali ai mekasini ma tusi. Pe a faaaogā se fata mo mekasini ma tusi, e tatau ona vaavaai e se tagata se toʻatasi. Ae afai e faaaogā se laulau, e tatau ona toʻalua ni tagata e vaavaaia. O i latou ua tofia e vaavaaia na laulau ma fata, e ao ona māfana, faaleuō, ma faaalia uiga ina ia tosina mai ai tagata. Pe a iloa atu ua naunau mai se tasi i se lomiga, e mafai e le tagata talaʻi ona amata se talanoaga i le faapea atu: “Pe na e tau tomānatu i le manatu o le Tusi Paia i lenā mataupu?” E mafai foʻi ona iai nisi tagata talaʻi se toʻatasi pe toʻalua, e talaʻi lē fuafuaina latalata ane i le fata po o le laulau, ma vaavaai ane po o manaʻomia se fesoasoani.
2. Faamatala mai se mea na tupu e iloa ai le aogā o fata ma laulau e faaali ai mekasini ma tusi.
2 Ua tele ni suʻesuʻega faale-Tusi Paia ua faia ona o lenei auala. Na faia ni saʻiliʻiliga a se teine mai i se aʻoga maualuga e faatatau i Molimau a Ieova, ae sa fiu e suʻe se Maota mo Sauniga. I le vaiaso na sosoo ai, sa ia vaaia ai i le lotoā a le aʻoga se laulau o loo iai mekasini ma tusi. Sa faia sana suʻesuʻega faale-Tusi Paia, ma ua papatiso nei o ia ma auai foʻi i lenei ituaiga o talaʻiga.
3. O ā manatu o nisi tagata talaʻi e faatatau i lenei ituaiga o talaʻiga i nofoaga faitele?
3 Na faapea mai se tuafafine e fiafia i lenei ituaiga o talaʻiga i nofoaga faitele: “O nisi e ō mai ma ave mekasini fou. O isi e leʻi faalogo muamua lava i Molimau a Ieova. Ou te iloa e toʻatele tagata ua oo i ai le feʻau ona o lenei ituaiga o talaʻiga.” Na faapea mai se isi tuafafine: “O se auala fou lenei ma manaia e molimau atu ai, auā e ō mai tagata iā te oe, ma e tusa pe e lē ano mai ae e mautinoa o loo latou fia iloa nei mea.”
4. O ā aogā o le tuu o fata ma laulau i le nofoaga ma taimi masani i vaiaso taʻitasi?
4 E tele aogā o le tuu o fata ma laulau i le nofoaga, taimi ma aso masani i vaiaso taʻitasi. O le faia faapea, o le a masani ai tagata ma ō mai fai mai ni fesili pe ave lomiga. Po ua fai ni fuafuaga a la outou faapotopotoga mo talaʻiga i nofoaga faitele? Pe afai o lea, e manaia pe a fai sou sao i lenei auala mataʻina ma fua tele mai e ʻfolafola atu ai le malo o le Atua.’—Luka 9:60.