Vaega 12—Faia o Suʻesuʻega Faale-Tusi Paia e Agaʻigaʻi i Luma
Fesoasoani i Tagata Aʻoga e Amata ma Faafoe Suʻesuʻega Faale-Tusi Paia
1 Pe a amata ona auai a tatou tagata aʻoga o le Tusi Paia i le faiva i le fanua, e ono matamumuli pe a mafaufau e amata ma faafoe ni a latou lava suʻesuʻega faale-Tusi Paia. E faafefea ona tatou fesoasoani iā i latou e ati aʻe se uiga mautinoa i lenei vala tāua o la tatou faiva?—Mata. 24:14; 28:19, 20.
2 O le taimi lava e agavaa ai se tagata aʻoga o le Tusi Paia e avea ma tagata talaʻi e leʻi papatisoina, o le taimi lea ua uma ona tusia lona igoa i le Aʻoga o le Faiva Faatiokarate. O le toleniga lea ua ia maua i le saunia ma le faia o lauga i le aʻoga, o le a fesoasoani iā te ia e ati aʻe ai tomai e manaʻomia e se tagata “o lē faigaluega e leai se mea e mā ai, na te talaʻitonuina le upu moni.”—2 Timo. 2:15.
3 Aʻoaʻo Atu e Ala i Lau Faaaʻoaʻoga: Na toleni e Iesu ona soo e ala i le avatu o faatonuga manino ma faataatia se faaaʻoaʻoga lelei. Na ia fetalai: “A ua taʻitasi ma faapei o lona aʻoaʻo o ē ua atoatoa ona aʻoaʻoina.” (Luka 6:40) O lou faaaʻoaʻo iā Iesu i le faataatia o se faaaʻoaʻoga lelei i lau lava faiva e matuā tāua tele. A o mātauina e lau tagata aʻoga lau faaaʻoaʻoga i le faiva, o le a ia malamalama ai, o le sini i le faia o toe asiga o le amataina lea o suʻesuʻega faale-Tusi Paia.
4 Faamatala i le tagata aʻoga, pe a tatou ofoina atu se suʻesuʻega faale-Tusi Paia i se tagata o le aiga, e lē tau faamatala auʻiliʻilia fua i ai le faatulagaga mo le faia o suʻesuʻega. E masani lava ona lelei le tau ina faataʻitaʻi le auala e fai ai le suʻesuʻega i le faaaogā o se palakalafa se tasi pe lua mai se lomiga e fai ai suʻesuʻega. O fautuaga aogā i le faia o lenā mea, o loo maua i le itulau e 6 o le faiva lenei ma le itulau e 6 o La Tatou Faiva o le Malo o Ianuari 2002.
5 Pe a talafeagai, ia valaaulia le tagata aʻoga e te lua ō faatasi, po o le ō foʻi ma se isi tagata talaʻi tomai i isi suʻesuʻega faale-Tusi Paia. E mafai ona fai sona sao i se palakalafa po o se mau autū o loo iai. O lea la, e ala i mea na te mātauina, o le a aʻoaʻoina ai e le tagata aʻoga le tele o mea e faatatau i le faia o suʻesuʻega faale-Tusi Paia e agaʻigaʻi i luma. (Faata. 27:17; 2 Timo. 2:2) Ia faamālō atu iā te ia, ma talanoa i le auala e faaleleia atili ai.
6 O le toleniina o tagata talaʻi fou e avea ma faiaʻoga o le Afioga a le Atua, o le a aʻotauina ai i latou i “galuega lelei” o le amata ma faafoe a latou lava suʻesuʻega. (2 Timo. 3:17) Maʻeu le faamalieina ai i le galulue soosootauʻau ma i latou i le faalautele atu o le valaaulia alofa: ‘O lē manaʻo i ai, inā ave fua ia le vai o le ola’!—Faaa. 22:17.