Teu Lelei

Faia o Suʻesuʻega Faale-Tusi Paia e Agaʻigaʻi i Luma

O le faaopoopoga lenei o se tuufaatasiga o manatu tāua mai le faasologa o mataupu e uiga i le faia o suʻesuʻega faale-Tusi Paia e agaʻigaʻi i luma lea na maua i lomiga o La Tatou Faiva o le Malo. E faalaeiauina i tatou uma e teu lelei lenei faaopoopoga ma toe tepa i ai pe a faia suʻesuʻega faale-Tusi Paia. E lē gata i lea, e ono faamatilatila ni manatu mai lenei faaopoopoga i feiloaʻiga mo le auaunaga i le fanua, ma e mafai foʻi ona faaaogā e ovasia o le auaunaga e fai ma faavae mo lauga latou te tuuina atu pe a asiasi i suʻesuʻega a vaega.

Vaega 1: O le ā Lenei Mea o le Suʻesuʻega Faale-Tusi Paia?

Pe afai o loo e faia e lē aunoa ma faasolosolo ni talanoaga faale-Tusi Paia, e ui lava ina puupuu, ae o loo faaaogā ai le Tusi Paia faatasi ma se lomiga ua fautuaina, o loo e faia la se suʻesuʻega faale-Tusi Paia. E mafai ona lipoti le suʻesuʻega pe a uma ona faataʻitaʻi le auala e fai ai le suʻesuʻega ma ua faalua ona faia ma, pe afai ua iai māfuaaga e talitonu ai o le a faaauau ona faia lea suʻesuʻega.—km 7/04 itu. 1.

Lomiga ua Fautuaina

◼ O le ā e Manaomia e le Atua Mai ia i Tatou?

◼ Le Poto e Taʻitaʻia ai i le Ola e Faavavau

◼ Ia Tapuaʻi i le Atua Moni e Toʻatasi

◼ E mafai ona faaaogā le polosiua E Mafai Ona Avea Oe ma Uō a le Atua! e suʻesuʻe ai ma tagata e tapulaa lo latou tulaga tau aʻoaʻoga pe faalētonu foʻi le faitau.

Vaega 2: Sauniuni i le Faia o Suʻesuʻega

E manaʻomia ona avatu manatu i se auala e uunaʻia ai le loto o le tagata aʻoga. E manaʻomia ai le lelei o sauniuniga ina ia maua e le tagata aʻoga aogā o le suʻesuʻega.—km 8/04 itu. 1

Le Auala e Sauniuni Ai

◼ Iloilo le matua, tamaʻi ulutala, ma so o se fesoasoani o loo iai e pei o faataʻitaʻiga, o ata ma mea faapena o le mataupu po o le lesona.

◼ Ia mātau lelei tali i fesili, ma faailoga na o upu tāua ma sina vaega o le fuaiupu.

◼ Filifili po o ā mau faasino e faitau i le taimi o le suʻesuʻega. Fai ni faamatalaga pupuu i autafa o le palakalafa o le lomiga o loo suʻesuʻeina.

◼ Sauni se autaluga puupuu o manatu tāua.

Faatulaga le Lesona i Manaʻoga o le Tagata Aʻoga

◼ Tatalo e faatatau i le tagata aʻoga ma mea o loo ia manaʻomia.

◼ Ia muaʻi mafaufau i manatu e ono faigatā i le tagata aʻoga ona malamalama ai po o le taliaina foʻi.

◼ Ia iloa: ‘⁠Po o ā mea o loo manaʻomia ona ia malamalama ai, po o le galue i ai ina ia faia se agaʻigaʻi i luma faaleagaga? E faapefea ona ou pāʻia lona loto?’

◼ Pe a fai e manaʻomia ona fai, ia sauniuni se talafaatusa, se faamalamalamaga, po o ni fesili e fesoasoani ai i le tagata aʻoga ia malamalama i le uiga o se manatu po o se mau.

Vaega 3: Faaaogāina ma le Uigā o Mau

O lo tatou sini i le faia o suʻesuʻega faale-Tusi Paia, o le ‘⁠faia o soo’ e ala i le fesoasoani atu i tagata ina ia malamalama ma talia aʻoaʻoga a le Afioga a le Atua ma faatatauina i o latou olaga. (Mata. 28:19, 20; 1 Tesa. 2:13) O lea la, e ao ona taulaʻi atu i le Tusi Paia le faia o le suʻesuʻega.—km 11/04 itu. 4.

Aʻoaʻo Mai le Afioga a le Atua

◼ Faaali i le tagata aʻoga le auala e suʻe ai ni mau patino i lana lava Tusi Paia.

◼ Suʻe ma talanoa mau o le Tusi Paia o loo faaalia ai faavae faale-Tusi Paia o o tatou talitonuga.

◼ Faaaogā fesili. Na i lo le faamatala atu o le mau o le Tusi Paia i le tagata suʻesuʻe, ia tuu atu iā te ia e faamatala mai iā te oe.

◼ Ia faafaigofie. Ia ʻalofia le taumafai e faamatala vala uma o se mau. Ia faaaofia na o ni faamatalaga e manaʻomia ina ia maua ai le manatu o loo talanoaina.

◼ Ia fai ni faatatauga aogā. Fesoasoani i le tagata e iloa, pe faapefea ona aogā iā te ia mau o le Tusi Paia.

Vaega 4: Toleni Tagata Aʻoga ia Sauniuni

O le tagata aʻoga e muaʻi faitau i le lesona, vase tali ma mafaufau i le auala e faamatala ai i ana lava upu, e vave lava ona faia se agaʻigaʻi i luma faaleagaga. O lea la, o le taimi lava e faamautū ai le faia e lē aunoa o se suʻesuʻega, ona sauniuni faatasi loa lea ma le tagata aʻoga se lesona ina ia faaali ai le auala e sauniuni ai. O le toʻatele lava o tagata aʻoga, e lelei ona sauniuni faatasi se mataupu atoa po o se lesona atoa.—km 12/04 itu. 1.

Ia Faailoga Tali ma Fai ni Faamaumauga i Autafa o le Palakalafa

◼ Ia faamatala le auala e suʻe ai tali i fesili o loo iai.

◼ Faaali i le tagata aʻoga lau kopi o le lomiga lea e lua te suʻesuʻe ai, lea ua faailoga na o upu ma faaupuga autū.

◼ Fesoasoani i le tagata aʻoga ia iloa mau faasino taʻitasi, o loo lagolago ai se manatu i le palakalafa, ma faaali iā te ia le auala e fai ai ni nai faamaumauga pupuu i autafa o palakalafa o lana lomiga o loo suʻesuʻeina.

Fai se Aotelega ma se Autaluga

◼ Faaali i le tagata aʻoga le auala e iloilo ai le mataupu po o le matua o le lesona, tamaʻi ulutala, ma ata po o faataʻitaʻiga o loo iai a o leʻi amata ana sauniuniga auʻiliʻili.

◼ Ia faalaeiau le tagata aʻoga e toe autalu manatu tāua pe a uma ona sauni le lesona.

Vaega 5: Ia Fuafua le Telē o le Mataupu e Talanoaina

O le telē o le mataupu e talanoaina, e fua i le tomai ma le tulaga o le faiaʻoga ma le tagata aʻoga.—km 1/05 itu. 1

Ia Faamalosi le Faatuatua

◼ E sili atu ona tāua le fesoasoani i le tagata aʻoga ia malamalama lelei i le mataupu, na i lo le telē o le mataupu e suʻesuʻe i se taimi puupuu.

◼ Ia faaalu po o le ā lava le taimi e manaʻomia e fesoasoani ai i le tagata aʻoga ia malamalama ma talia mea ua ia aʻoaʻoina.

◼ Ia lava le taimi e iloiloina ai mau autū ia e faavae ai mea ua aʻoaʻoina.

Aua Neʻi See Ese Mai le Suʻesuʻega

◼ Afai e manaʻo le tagata aʻoga e talanoa umi i se mea e patino lava iā te ia, e ono manaʻomia ona talanoaina lea mea pe a uma le suʻesuʻega.

◼ Aua neʻi tautala umi a o faia le suʻesuʻega. Ia tapulaa le talanoaina o manatu faaopoopo po o mea na tutupu, ina ia aua neʻi faalavelavea ai le tagata aʻoga i le mauaina o le poto saʻo o aʻoaʻoga faavae o le Tusi Paia.

Vaega 6: Pe a Lāgā e le Tagata Aʻoga se Fesili

Pe a oo loa ina solosolo lelei se suʻesuʻega faale-Tusi Paia, o le a sili ona lelei le talanoa faasolosolo o aʻoaʻoga o le Tusi Paia na i lo o le osooso solo. E fesoasoani lenei mea i le tagata suʻesuʻe ina ia iloa lelei le faavae o le poto saʻo, ma agaʻigaʻi ai i luma faaleagaga.—km 2/05 itu. 6.

Ia Faautauta

◼ O fesili e lāgā e faatatau i le mataupu lea e talanoaina, e mafai ona taliina i le taimi lenā.

◼ O fesili e sala ese mai le mataupu lea e fai ai le suʻesuʻega pe manaʻomia foʻi ona faia i ai ni saʻiliʻiliga loloto, e mafai ona talanoaina i se isi taimi. Atonu e lelei pe a tusia i lalo na fesili.

◼ Afai e faafaigatā ona talia e le tagata aʻoga se aʻoaʻoga patino, ona iloilo lea o mataupu i isi lomiga o loo faamatala māeʻaeʻa mai ai lea mataupu.

◼ Afai e tumau pea ona lē talitonu le tagata aʻoga, ona faataatia lea o le mataupu mo se isi taimi, ae faaauau le suʻesuʻega.

Ia Loto Maulalo

◼ Afai e te lē o iloa se tali mo se fesili, aua neʻi tali atu i ou lava manatu.

◼ Ia faasolosolo ona aʻoaʻo le tagata aʻoga i le auala e fai ai ana saʻiliʻiliga loloto.

Vaega 7: Faia o le Tatalo i le Suʻesuʻega

Ina ia fai e tagata aʻoga o le Tusi Paia ni agaʻigaʻi i luma faaleagaga, e tāua ona maua o le faamanuia a Ieova. O lea la, e talafeagai ai ona amata ma faauma le suʻesuʻega i se tatalo.—km 3/05 itu. 6.

Le Taimi e Amata ai i le Tatalo

◼ O tagata e naunau tele i lotu, e mafai ona amata le suʻesuʻega i se tatalo mai lava i le uluaʻi suʻesuʻega.

◼ O nisi o tagata aʻoga, e manaʻomia ona fuafua lelei po o fea le taimi talafeagai e amata ai le suʻesuʻega i se tatalo.

◼ E mafai ona faaaogā le Salamo 25:4, 5 ma le 1 Ioane 5:14 e faamatala ai le māfuaaga e faia ai le tatalo.

◼ E mafai ona faaaogā le Ioane 15:16 e faaalia ai e tatau ona tatou tatalo iā Ieova e ala iā Iesu Keriso.

Mea e Aofia ai i Tatalo

◼ E talafeagai ona avatu le viiga iā Ieova o le Puna o aʻoaʻoga.

◼ Ia faailoa atu i le tatalo le naunau moni i le tagata aʻoga.

◼ Ia faaalia le lotofaafetai mo le faalapotopotoga o loo faaaogāina e Ieova.

◼ Ia talosaga mo le faamanuiaga a Ieova i taumafaiga a le tagata aʻoga e faatatauina mea o loo ia aʻoaʻoina.

Vaega 8: Faasino Tagata Aʻoga i le Faalapotopotoga

O lo tatou sini i le faia o suʻesuʻega faale-Tusi Paia e lē gata i le aʻoaʻoina o faamatalaga tau aʻoaʻoga, ae ia fesoasoani foʻi i tagata aʻoga ia avea ma vaega o le faapotopotoga Kerisiano. Ia faaalu ni nai minute i vaiaso taʻitasi i le suʻesuʻega e talanoaina ai se manatu e faatatau i le faalapotopotoga a Ieova.—km 4/05 itu. 6.

Sauniga a le Faapotopotoga

◼ Faamatala sauniga taʻitasi a le faapotopotoga. Ia valaaulia i latou ina ia auai, mai lava i le uluaʻi suʻesuʻega faale-Tusi Paia.

◼ Ia tufa atu manatu tāua na talanoaina i le sauniga.

◼ Ati aʻe lona fiafia i le Faamanatuga, fonotaga, ma le asiasiga a le ovasia o le matagaluega.

◼ Faaaogā ata o loo i a tatou lomiga e fesoasoani ai iā i latou e faaata ai mea o loo faia.

◼ Faalaeiau i latou e faitau le polosiua Molimau a Ieova—O Ai i Latou? O ā o Latou Talitonuga?

Faaaogā Vitiō e Ati Aʻe ai le Agaga Faafetai

◼ Jehovah’s Witnesses—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Vaega 9: Sauniuni Tagata Aʻoga e Molimau Atu Lē Fuafuaina

A o amata ona faaalia le faatuatua o tagata aʻoga o le Tusi Paia i mea ua latou aʻoaʻoina, e faagaeetia ai i latou e tautala atu e faatatau i ia mea.—km 5/05 itu. 1

Faalaeiau i Latou e Molimau Atu

◼ Po o iai ni uō ma ni tagata o le aiga e mafai ona latou valaaulia e auai i le suʻesuʻega?

◼ Pe e iai nisi latou te faigaluega, aʻoʻoga, po o nisi e masani ai ua faaalia le fiafia?

Toleni i Latou e Taʻu Atu o Latou Talitonuga

◼ Pe a talanoaina manatu talafeagai i le suʻesuʻega, ia fesili atu i le tagata aʻoga: “E faapefea ona e faaaogā le Tusi Paia e faamatala ai nei mea moni i lou aiga?”

◼ Fesoasoani i le tagata aʻoga ia malamalama faapea, e manaʻomia ona faaaloalo ma agalelei pe a talanoa atu i isi e faatatau i le Atua ma mea o loo ia finagalo i ai.

◼ E mafai ona faaaogā e tagata aʻoga le polosiua Molimau a Ieova—O Ai i Latou? O ā o Latou Talitonuga? e fesoasoani ai i uō ma tagata o le aiga ia malamalama i o tatou talitonuga faale-Tusi Paia ma taualumaga o a latou galuega fai.

Vaega 10: Aʻoaʻo Tagata Aʻoga i le Faiva i le Fale i le Fale

Pe a manatu toeaina ua agavaa se tagata aʻoga o le Tusi Paia e avea o se tagata talaʻi e leʻi papatisoina, ona amata loa lea ona ia auai ma le faapotopotoga i le galuega talaʻi i le lautele.—km 6/05 itu. 1.

Sauniuni Faatasi

◼ Faailoa i le tagata talaʻi fou le mea e maua ai taulimaga ua fautuaina mai.

◼ Fesoasoani iā te ia e filifili se taulimaga faigofie e aogā i tagata o le oganuu a le faapotopotoga.

◼ Faalaeiau o ia e faaaogā le Tusi Paia i lana faiva.

◼ Ia faataʻitaʻi faatasi. Faaali iā te ia le auala e taulima ai ma le faautauta auala masani e tali mai ai tagata i le oganuu.

Talaʻi Faatasi

◼ Ia tuu atu i le tagata aʻoga e mātau a o e faia le taulimaga lea na lua sauniunia faatasi.

◼ Ia manatunatu i uiga ma tomai o le tagata aʻoga. I nisi o tulaga, atonu e sili pe a tuu atu iā te ia e fai na o se vaega o le taulimaga.

◼ Fesoasoani i le tagata talaʻi fou e faatulaga se faasologa e auai ai e lē aunoa i le faiva.

Vaega 11: Fesoasoani i Tagata Talaʻi Fou ia Faia Toe Asiga

O le sauniuni mo le faia o se toe asiga, e amata i le taimi muamua e asiasi atu ai. Faalaeiau le tagata aʻoga e faaalia le fiafia moni iā i latou o loo talanoa atu i ai. Ia faasolosolo ona toleni le tagata talaʻi fou e faatalanoa tagata o aiga e faaali mai ni o latou manatu, ia faalogologo atu i ai, ma mātau mea o loo latou manatu mamafa i ai.—km 7/05 itu. 1.

Sauniuni e Toe Foʻi Atu

◼ Ia toe autalu le uluaʻi asiasiga, ma fesoasoani i le tagata aʻoga e filifili se mataupu e fiafia i ai le tagata o le aiga.

◼ Ia sauniuni se taulimaga puupuu e faamatilatila ai se mau, faatasi ai ma se palakalafa i se lomiga.

◼ Ia sauniuni se fesili e faatū i le faaiʻuga o le talanoaga.

Ia Tinoū e Fai Toe Asiga i Ē na Faaalia le Fiafia

◼ Faalaeiau le tagata aʻoga ia vave ona toe asia tagata uma na faaalia le fiafia.

◼ Fesoasoani i le tagata aʻoga ia malamalama i le manaʻomia ona faaauau ona taumafai e oo atu iā i latou e faigatā ona oo atu i ai.

◼ Faaali i le tagata talaʻi fou le auala e fai ai fuafuaga e toe foʻi, ma fesoasoani iā te ia e iloa le manaʻomia ona toe foʻi e pei ona folafola atu.

Vaega 12: Fesoasoani i Tagata Aʻoga e Amata ma Faafoe Suʻesuʻega Faale-Tusi Paia

O lou faaaʻoaʻo iā Iesu i le faataatia o se faaaʻoaʻoga lelei i lau lava faiva, e matuā tāua tele. A o mātau e lau tagata aʻoga lau faaaʻoaʻoga i le faiva, o le a ia malamalama ai, o le sini i le faia o toe asiga o le amataina lea o suʻesuʻega faale-Tusi Paia.—km 8/05 itu. 1.

Ofo se Suʻesuʻega Faale-Tusi Paia

◼ Faamatala i le tagata aʻoga faapea, e lē o se tulaga e masani ai le faamatala auʻiliʻili o faatulagaga mo le faia o suʻesuʻega.

◼ E masani lava ona lelei le tau lava ina faataʻitaʻi le auala e fai ai le suʻesuʻega, i le faaaogā o se palakalafa se tasi pe lua mai se lomiga e fai ai suʻesuʻega.

◼ Ia toe autalu ma toe faataʻitaʻi se tasi o fautuaga mo le amataina o suʻesuʻega faale-Tusi Paia.—km 8/05 itu. 6; km 1/02 itu. 6.

Toleni Tagata Aʻoga e Avea ma Faiaʻoga

◼ Faalaeiau tagata aʻoga e tusia o latou igoa i le Aʻoga o le Faiva Faatiokarate.

◼ Faatulaga le tagata talaʻi fou e te lua ō i isi suʻesuʻega faale-Tusi Paia lea e ono faia ai sana vaega itiiti i le aʻoaʻo atu.