Ia Sauniuni Lelei e Aʻoaʻo Atu
1. Aiseā e ao ai ona tatou uaʻi atu i le atiina aʻe o le talisapaia pe a tatou faia se suʻesuʻega faale-Tusi Paia?
1 Pe a tatou faia se suʻesuʻega faale-Tusi Paia, e ao ona tatou sauniuni lelei ina ia faagaeeina le tagata aʻoga e auauna iā Ieova? O le a aogā a tatou taumafaiga pe a tatou atiaʻe lona talisapaia o mea ua ia aʻoaʻoina mai le Tusi Paia. O le faia faapea o le a faagaeetia ai le tagata aʻoga. (Teu. 6:5; Faata. 4:23; 1 Kori. 9:26) E faapefea ona tatou faia lenei mea?
2. E faapefea ona fesoasoani le tatalo iā i tatou pe a fai sauniuniga?
2 Ia Tatalo mo le Fesoasoani pe a Fai Sauniuniga: Talu ai o Ieova e faatupuina le fatu o le upu moni i le loto o le tagata aʻoga, e talafeagai la ona amata a tatou sauniuniga mo le suʻesuʻega i le tatalo patino lava mo le tagata aʻoga ma ona manaʻoga. (1 Kori. 3:6; Iako. 1:5) E ono fesoasoani foʻi le tatalo iā i tatou i le fuafuaina pe faapefea ona tatou fesoasoani atili e faatumuina lona loto “i le iloa lelei” o le finagalo o Ieova.—Kolo. 1:9, 10.
3. E faapefea ona tatou sauniuni ma manatunatu i le tagata aʻoga?
3 Manatunatu i le Tagata Aʻoga: Sa silafia e Iesu o le lelei o le aʻoaʻo atu, e aofia ai le manatunatu i le aofia. A itiiti mai e faalua ona fai iā Iesu le fesili lava lenei e tasi: “O ā ni mea e tatau ona ou faia ina ia ou maua ai le ola e faavavau?” E eseese auala na ia faaaogāina i taimi na ia tali atu ai. (Luka 10:25-28; 18:18-20) E tatau ona tatou manatunatu i le tagata aʻoga pe a fai a tatou sauniuniga. O ā mau faasino o le a tatou faitauina faatasi ma ia? O le ā le tele o faamatalaga tatou te taumafai e talanoaina faatasi ma ia? O ā manatu o le lesona e ono faigatā ona malamalama ai, pe talia foʻi e le tagata aʻoga? Afai tatou te muaʻi iloa ni fesili e ono lāgā mai e le tagata aʻoga, o le a tatou sauniuni lelei foʻi la i ai.
4. O le ā e aofia ai i sauniuniga lelei?
4 Ia Autalu le Mataupu: E tusa lava po o le ā le tele o taimi ua tatou suʻesuʻeina muamua ai le mataupu lenei, ae o le taimi muamua lenei ua tatou suʻesuʻeina ai ma lea tagata aʻoga. Ina ia tatou pāʻia lona loto, e tāua tele sauniuniga lelei i taimi taʻitasi a o leʻi faia le suʻesuʻega. O lona uiga ia fai le mea lea tatou te faalaeiauina a tatou tagata aʻoga e fai. Ia autalu le mataupu, e aofia ai mau faasino o loo iai, ma manatunatu i le tagata aʻoga, ma e lelei foʻi ona vase lalo o manatu autū.
5. E faapefea ona tatou faataʻitaʻi iā Ieova?
5 E matuā naunau mai Ieova i le agaʻigaʻi i luma o tagata aʻoga taʻitasi o le Tusi Paia. (2 Pete. 3:9) O le faaalu o se taimi e sauniuni ai mo suʻesuʻega faale-Tusi Paia taʻitasi, ua tatou faaalia atu ai le manatu mamafa lava lea e tasi.