Ia Faaalia le Naunau Moni i Isi—E Ala i le Mātauina o Tulaga o Mea
1 E matuā tū ese Ieova le Atua ma Keriso Iesu i lo la silafia lelei o manaʻoga patino o tagata, ma le avatuina o fesoasoani iā i latou. (2 No. 16:9; Mare. 6:34) Pe a iloa mea e fiafia i ai, ma mea o loo popole ai i latou tatou te feiloaʻi atu i ai i le talaʻiga, e tatou te ono fetuunaʻi la a tatou taulimaga o le tala lelei e tusa ai ma tulaga o tagata.
2 Ia Uaʻi Atu i le Tulaga o Mea: Sa uaʻi atu le silasila a Iesu i le tulaga o mea. (Mare. 12:41-43; Luka 19:1-6) I se tulaga tutusa, pe a tatou oo atu i fale o aiga ma vaaia ni mea faalotu o teuteu ai le fale, ni ata po o ni mea o faapipii i taavale, po o ni meataalo o loo i autafa o le fale, e tatou te ono maua ai ni avanoa e avatu ai se molimau uigā o le tala lelei.
3 O foliga o le tagata ma ona uiga, e ono faaalia ai se mea e faatatau i ona faalogona. (Faata. 15:13) Atonu o le maliu o se tasi e pele po o se isi tulaga faanoanoa, ua ia manaʻomia ai se faamāfanafanaga. E ono faafiafiaina o ia pe a tatou faitau atu i ai ni mau talafeagai. (Faata. 16:24) Po o nanati le tagata o le aiga e iai se mea e alu i ai, po o sii se pepe o loo tagi? Afai o le tulaga lenā, atonu e sili ona fuafua e toe foʻi atu i se isi taimi. O le magafagafa ma le faaalia o le ‘alofa’ i tagata, atonu e faalogo mai ai le tagata i le isi taimi e tatou te asiasi atu ai.—1 Pete. 3:8.
4 Ia Fetuutuunaʻi Au Faamatalaga: Na mātauina e le aposetolo o Paulo o loo iai i le aai o Atenai se fata o loo tusia ai ni upu faapea, “Mo le Atua e lē iloa.” O upu nei na aafia ai le auala na ia talaʻi atu ai le tala lelei, ona na ia faapea atu: “O lenei, o ia ua outou tapuaʻi i ai ma le lē iloa, ou te faailoa atu ai iā te outou.” O le magafagafa o Paulo i upu sa fai atu, na uunaʻia ai nisi sa iai i inā e toe mafaufau lelei i le feʻau o le Malo ma avea ai i latou ma tagata talitonu.—Galu. 17:23, 34.
5 I se tulaga faapena, o lo tatou mātauina o mea, e fesoasoani iā i tatou ia iloa mea o loo fiafia i ai le tagata, ma mafai ai ona tatou fetuutuunaʻi i le auala e tatou te talaʻi atu ai. Faaaogā fesili e ono uunaʻia ai le tagata o le aiga e fai mai sona manatu. Mafaufau i mau e mafai ona faaaogā e faateleina ai le fiafia o le tagata. (Faata. 20:5) O lo tatou mātauina o tulaga o mea ma faaalia le naunau moni i tagata, o le a mafai ai ona tatou tufa atu le tala lelei i se auala poto.