O le Tusi Aʻoaʻoga a le Tusi Paia—O la Tatou Fesoasoani Autū Lea i le Faia o Suʻesuʻega Faale-Tusi Paia
1 Sa matuā faagaeetia lava i tatou ina ua tatou molimauina le tatalaina o le tusi O ā Aʻoaʻoga Moni a le Tusi Paia? i le Tauaofiaga Itumalo “Usiusitai i le Atua.” Na olioli le ʻauusufono ina ua maua e le tagata lana lava tusi i le māeʻa ai o le polokalame o le Aso Toonai. O le a faapefea ona faaaogā lenei tusi fou i le aʻoaʻo atu? Ua faatulagaina lenei tusi e avea ma a tatou fesoasoani autū i le faia o Suʻesuʻega faale-Tusi Paia. E ui lava o le a faatoʻā avea le tusi fou ma lomiga e ofo iā Mati, ae o loo faalaeiau le ʻautalaʻi ia amata nei loa ona faia ai suʻesuʻega faale-Tusi Paia.
2 Suʻesuʻega o Loo Faia i le Taimi Nei: O le ʻautalaʻi o loo faia suʻesuʻega i le tusi o le Poto po o le polosiua o le Manaomia, e ao ona faaaogā le tofā mamao e filifili ai pe faapefea, ma o afea e tatau ai ona amata ona faaaogā le lomiga fou e fai ai suʻesuʻega. Afai e leʻi leva ona amata se suʻesuʻega, e mafai la ona amata mai lava i le amataga o le tusi fou. Ae afai ua telē se vaega o le tusi o le Poto ua uma ona suʻesuʻe, e te ono faaauau la le suʻesuʻega i le tusi fou o Aʻoaʻoga a le Tusi Paia i le mataupu e tutusa ma lea na suʻesuʻe i le tusi o le Poto. Afai o lea ua toeitiiti uma ona suʻesuʻe le tusi o le Poto, atonu la e te manaʻo e faauma lenā lomiga.
3 E mautinoa e tatou te iloa le toʻatele o tagata o le a aogā i ai le suʻesuʻeina o le tusi fou lenei, Aʻoaʻoga a le Tusi Paia. Aiseā e lē ofoina ai i tagata taʻitoʻatasi se suʻesuʻega faale-Tusi Paia i le tusi lenei, lea e talanoaina faasolosolo ai upu moni o le Tusi Paia? O se faaaʻoaʻoga, o i latou na suʻesuʻeina le polosiua o le Manaʻomia po o le tusi o le Poto ae leʻi oo i le tulaga o le tuuina atu ma papatisoina, atonu e mananaʻo e toe amata la latou suʻesuʻega e faaaogā ai le tusi fou. Atonu e mananaʻo mātua e faaaogā le tusi fou a o latou aʻoaʻoina le poto saʻo e faatatau i le finagalo o le Atua i a latou fanau.—Kolo. 1:9, 10.
4 Suʻesuʻeina o se Tusi Lona Lua: Po o iai se faatatauga mo le suʻesuʻeina o se tusi lona lua e se tagata aʻoga o le Tusi Paia, pe a māeʻa le tusi O ā Aʻoaʻoga Moni a le Tusi Paia? Ioe. Afai ua manino mai o loo faia se agaʻigaʻi i luma e le tagata aʻoga, e ui lava ina tuai, ae o loo ia faaalia le loto talisapaia mo mea ua ia aʻoaʻoina, e ono faaauau la le suʻesuʻega faale-Tusi Paia i le faaaogāina o le tusi Ia Tapuaʻi i le Atua Moni e Toʻatasi. Tatou te mautinoa o le a avea le tusi Aʻoaʻoga a le Tusi Paia ma a tatou mea faigaluega aogā a o tatou faataunuuina le faatonuga i le faia o soo.—Mata. 28:19, 20.