Faia o Suʻesuʻega Faale-Tusi Paia—Mai se Taimi Puupuu i se Taimi Umi
1. O le ā lo tatou faamoemoe mo le faia o suʻesuʻega faale-Tusi Paia?
1 Maʻeu le olioli pe a amata se suʻesuʻega faale-Tusi Paia! Peitaʻi, o le mauaina o se tasi e fiafia e suʻesuʻe le Tusi Paia, ua na o se amataga lenā. O le faamoemoe mo le faia o le suʻesuʻega, ia fesoasoani i le tagata e avea ma soo moni o Keriso. (Mata. 28:19, 20) O le ā e fesoasoani iā i tatou ina ia ausia ai lenā sini?
2. O le ā le uiga o se suʻesuʻega faale-Tusi Paia puupuu e fai i le maketi po o le telefoni? Ma aiseā e aogā ai?
2 Suʻesuʻega Faale-Tusi Paia Pupuu: Ua matuā pisi lava tagata i aso nei. I nisi o nofoaga, e itiiti lava ni tagata e mananaʻo i le taimi muamua e faaalu se itula e suʻesuʻe ai le Tusi Paia. Ina ia oo atu iā i latou na, ua faalaeiauina i tatou e amata ma faia suʻesuʻega i le maketi, po o le faia foʻi i le telefoni. E ono faapupuu nei suʻesuʻega, ma atonu ua lava ni nai mau o le Tusi Paia e talanoaina ma faaaogā se palakalafa se tasi pe lua o se lomiga e pei o le tusi, Aʻoaʻoga a le Tusi Paia. E faamālō atu ona o le toʻatele o le ʻautalaʻi i le taimi nei o loo latou faia suʻesuʻega pupuu!
3. Aiseā e lē lava ai le faia o suʻesuʻega faale-Tusi Paia pupuu mo se taimi umi?
3 Pe e lava ea le faaauau ona faia suʻesuʻega faale-Tusi Paia pupuu mo se taimi umi? E leai. E ui lava e lē o se tulaga atamai lo tatou talanoa umi i le faitotoʻa i le taimi muamua e fai ai le suʻesuʻega, ae o loo taʻua e La Tatou Faiva o le Malo o Me 1990, itulau e 4 e faapea: “A māeʻa loa ona faavae le suʻesuʻega ma ua tuputupu aʻe le naunau o lē ona le fale, ona faatoʻā faaalu lea o se taimi umi i le suʻesuʻega.” E aogā tele lenā faiga. Mo se faaaʻoaʻoga: E te muaʻi fafaga se tamaitiiti ua galala i le fia ʻai i ni nai sipuni meaʻai laiti, seʻia oo ina toe foʻi ane lona malosi, e ui i lea, e tatou te lē faatalitalia lenei tamaitiiti e toe maua lona malosi ma toe ola lelei, pe afai e na o ni nai sipuni meaʻai laiti lava e fafaga ai mo le tele o masina. I se tulaga tutusa, ua faaalia e mea ua tutupu e itiiti ni aogā o la tatou galuega o le faia o soo pe afai e na o le faia lava o suʻesuʻega pupuu. Ina ia tupu aʻe e avea ma auauna taʻumatuaina a le Atua e na te manaʻomia se fesoasoani e sili atu.—Epe. 5:13, 14.
4. O ā aogā o le faia o le suʻesuʻega faale-Tusi Paia i totonu o le fale?
4 Suʻesuʻega Faale-Tusi Paia i Aiga: E sili atu ona lelei le faia o se suʻesuʻega i se nofoaga e toʻafimālie—i se fale po o se isi nofoaga talafeagai. O le a sili atu ona faigofie ona ia aʻoaʻoina ai mea, ma fesoasoani ina ia ona lagona ai le Afioga a le Atua. (Mata. 13:23) E faigofie ai foʻi ona fetuunaʻi e le faiaʻoga le mataupu o loo suʻesuʻeina e tusa ai ma mea e manaʻomia e le tagata aʻoga. E lē gata i lea, o le faaumiumi atu o le taimi o le suʻesuʻega, o le a sili atu ona auʻiliʻili ma faamalosia ai foʻi le faatuatua, a o suʻesuʻeina le Afioga a le Atua.—Roma 10:17.
5. E faapefea ona tatou suia le suʻesuʻega mai le faia i se taimi puupuu i se taimi umi?
5 E faapefea ona suia le suʻesuʻega mai le faia i se taimi puupuu i se taimi umi? Pe afai ua fai soo lau suʻesuʻega puupuu i le faitotoʻa, aiseā e lē fai atu ai pe mafai ona toe faaumiumi atu ma faapatino atu se taimi e fai ai? Ia po o lou faapea atu foʻi i se auala lē tuu saʻo, “O le ā se tele o sou taimi e mafai ona ta talanoaina ai lenei mataupu i le asō?” Afai e lē manuia au taumafaiga, ona faaauau pea lea ona fai au suʻesuʻega pupuu. I se isi taimi talafeagai, ia toe taumafai ina ia suia le suʻesuʻega ia fai i se taimi umi.
6. O le ā lo tatou sini a o faia la tatou faiva, ma e faapefea ona fesoasoani fautuaga o loo i lenei mataupu iā i tatou, e faataunuu ai lenā sini?
6 A o tatou faaauau ona saʻili i latou ua tatau i ai la tatou galuega, ia aua lava neʻi mou atu lo tatou faamoemoe o le amata, ma faia suʻesuʻega faale-Tusi Paia. O lo tatou sini o le fesoasoani i tagata loto faamaoni ia avea o ni auauna tuuina atu ma papatisoina a Ieova. Tau ina ia faamanuia Ieova i a tatou taumafaiga a o faia la tatou faiva, faatasi ai ma le sini lenei i o tatou mafaufau.—2 Timo. 4:5.