Pe Mafai Ona Fetuunaʻi Lau Faasologa?
1. Aiseā e tatau ai ona fetuunaʻi la tatou faasologa mo le talaʻiga?
1 Ona o i tatou o Kerisiano moni, ua tatou taliaina le valaaulia ina ia fai ma “fai faiva i tagata.” (Mata. 4:19) I le pei o tagata fai faiva, e ono sili atu foʻi ni iʻuga lelei e maua i le galuega o le fai faiva i tagata, pe a tatou faatulaga la tatou talaʻiga i le taimi e maua ai tagata i o latou aiga. I le tele lava o atunuu, o masina o loo lumanaʻi ai, o le a oo ina uumi taimi e malamalama ai. E toʻatele tagata e mafai ona maua atu i le fale i le taimi ua lata i le afiafi, faapea ma le afiafipō. E masani lava o le taimi lenā ua lē o toe pisi tele, ma atonu e ono faigofie ai ona talanoa i tagata e asiasi atu. Pe mafai ona fetuunaʻi lau faasologa ina ia talaʻi atu i taimi na?—1 Kori. 9:23.
2. O ā nisi o auala e tatou te oo atu ai i le toʻatele o tagata ma le tala lelei?
2 Molimau Atu i le Afiafi: O le fuafua mamao ina ia talaʻi atu i taimi o le afiafi, e ono mafai ai ona toʻatele tagata e tatou te talaʻi atu i ai le tala lelei. (Faata. 21:5) E ono mafai e talavou ona talaʻi atu pe a tuua le aʻoga. E ono mafai e isi ona faia faapea pe a mānava galuega. O nisi vaega o suʻesuʻega tautusi e latou te ono fuafua e talaʻi mo se itula a o leʻi amata le suʻesuʻega tautusi faalevaiaso.
3. O ā auala e te talaʻi atu ai i le taimi ua lata i le afiafi faapea ma le afiafipō?
3 O le talaʻi mai lea fale i lea fale a o lata i le afiafi ma le afiafipō, e ono mafai ai ona talanoa atu iā i latou e lē masani ona maua i le fale. I le tele o oganuu, e mafai foʻi ona faia i le afiafi le galuega talaʻi i ala tetele, ma isi vala o le molimau atu i nofoaga faitele. O le toʻatele lava e latou te iloa e sili atu le afiafi e fai ai toe asiga, ma amata ai suʻesuʻega faale-Tusi Paia.
4. Aiseā e tāua ai le faaalia o le faautaga poto ma le magafagafa a o auai i le molimau atu i le afiafi?
4 E Manaʻomia Ona Faaaogā le Faautaga Poto: E manaʻomia ona faaaogā le faautaga poto, pe a auai i le talaʻiga i le afiafi. E masani lava ona sili atu ona lelei pe a faatapulaa mai le molimau atu i taimi o le pogipogi o le afiafi, na i lo le asiasi atu ae ua sauni le tagata o le aiga e fai se mālōlōga i le pō. (Fili. 4:5) Pe a e tuʻituʻi atu i le faitotoʻa, ia e tū i le mea e iloa lelei mai ai oe, ma ia faailoa manino atu oe. Ia vave ona e faailoa atu le māfuaaga o lau asiasiga. Pe afai ua e asiasi atu i se taimi e lē o talafeagai ai, e pei o le taimi o loo aai le aiga, ia fai i ai e toe asiasi atu i se isi taimi. Ia magafagafa i taimi uma.—Mata. 7:12.
5. E faapefea ona tatou ʻalofia nofoaga e ono lamatia ai a o tatou talaʻi?
5 E manaʻomia foʻi ona tatou iloa tulaga e ono lamatia ai. Pe a e molimau atu i le taimi ua pogisa, o se tulaga atamai pe a ō taʻitoʻalua po o se vaega foʻi. Ia talaʻi i auala e malamalama lelei lea e lē na o outou e savavali ai. Ia molimau atu i nofoaga e te lagona e saogalemu. Ia ʻalofia nofoaga e lē saogalemu pe a pō.—Faata. 22:3.
6. O ā nisi o aogā e maua i le molimau atu i le taimi ua lata i le afiafi ma le afiafipō?
6 O le molimau atu i le taimi ua lata i le afiafi ma le afiafipō, e ono mafai ai ona tatou galulue ma paeonia lagolago ma paeonia sauatoa i le auaunaga. (Roma 1:12) Pe e mafai ona fetuutuunaʻi lau faasologa ina ia auai i lenei vala o le auaunaga?