Ia Faaalia le Naunau Moni i Isi—E Ala i le Agalelei ma Faaaloalo
1 E ui lava o Ieova o le Pule Silisili i le Aoao o mea, ae e agalelei, magafagafa, ma faaaloalo i ana fesootaʻiga ma tagata lē lelei atoatoa. (Kene. 13:14; 19:18-21, 29) E mafai ona faaleleia atili lo tatou taulimaina o le tala lelei i le faataʻitaʻi i lo tatou Atua agalelei. (Kolo. 4:6) E tele mea e aofia ai na i lo le na ona faaalia o le āva ma le faaaloalo i la tatou tautala.
2 Mai Lea Fale i Lea Fale: E faapefea pe afai e tatou te asiasi atu i le tagata o le aiga i se taimi e lē o talafeagai ai, po ua pisi tele e talanoa mai iā i tatou? E lelei ona faailoa atu tatou te iloa tulaga na e ala i le faapuupuu o la tatou taulimaga po o le fai i ai, e toe foʻi atu i se isi taimi. Ia faaalia le agalelei ma ʻalofia le saga fai atu lava i le tagata e talia a tatou lomiga pe a fai e latou te lē mananaʻo ai. O lo tatou magafagafa i isi, o le a uunaʻia ai i tatou e faaalia le faaeteete i a latou mea totino e pei o le tapunia o le faitotoʻa o le pa ma isi faitotoʻa ma toleni a tatou fanau ia faia foʻi faapena. E tatou te faamautinoa foʻi, e so o se lomiga e tuu i fale e leai ni tagata o iai, e ao ona tuu i se mea e lē o iloa atu e tagata e ui ane ai. O le mea moni, o le agalelei ma le faaaloalo, o le a uunaʻia ai i tatou e fai i isi, mea e tatou te mananaʻo e fai mai e isi iā i tatou.—Luka 6:31.
3 Talaʻi i Alatetele: Pe a talaʻi i alatetele, ia tatou faaalia uiga lelei e ala i le lē polokaina o le auala o tagata feoaʻi ma ia aua le faapotopoto i luma o faleoloa. Ia tatou matuā amanaʻia tulaga o isi, ma ia talanoa na o i latou e mafai ona talanoa i ai, i lo i latou o loo mautinoa lava o loo faanatinati i se mea. I nisi taimi e ao ona tatou tautala leotele ona o le paʻō o le auala, ina ia mafai ai ona lagona i tatou. Ae peitaʻi, ia tatou faia ma le faaaloalo, ina ia lē uaʻi mai ai tagata iā i tatou.—Mata. 12:19.
4 Pe a Molimau Atu i le Telefoni: O le magafagafa i isi o le a uunaʻia ai i tatou e fai atu se molimau i le telefoni mai se nofoaga e toʻafimālie. E tatou te faaalia uiga lelei pe a vave ona tatou faailoa atu i tatou, ma faamatala le māfuaaga ua tatou telefoni atu ai. O le talanoa saʻo i le vaega o le telefoni e talanoa i ai, ma logolelei lou siʻufofoga, o le a faigofie ai ona faaaafia isi i se talanoaga e ati aʻe ai faale-Tusi Paia. (1 Kori. 14:8, 9) O le faaalia o le agalelei, magafagafa, ma le faaaloalo i auala eseese nei, ua tatou faaaʻoaʻo ai i lo tatou Atua agalelei ma faaaloalo o Ieova.