La Tatou Faiva—O se Galuega o le Alofa Mutimutivale

¹ Na mātau e Iesu o le toʻatele lava o tagata na faalogologo i lana feʻau sa “lailoa . . . ma tuulafoaʻiina, e pei o mamoe e leai so latou leoleo.” (Mata. 9:36) Sa ia aʻoaʻo ma le agamalu ma le alofa i latou i ala o Ieova, ma avatu faamāfanafanaga, ma fesoasoani ma le alofa i o latou manaʻoga faaleagaga. A o tatou manatunatu loloto i ona ala, e tatou te faamasani ai e mafaufau ma iai lagona e pei o Iesu, ma oo ai ina manino mai le uiga lenei o le alofa mutimutivale i la tatou faiva.

² Seʻi mafaufau mo sina minute i le auala na tali atu ai Iesu ina ua ō atu iā te ia tagata na faanaunau atu mo se fesoasoani. (Luka 5:12, 13; 8:43-48) Na magafagafa o ia iā i latou na iai ni manaʻoga faapitoa. (Mare. 7:31-35) Na ia silafia faalogona o isi, ma faaalia lona manatu mamafa iā i latou. E leʻi gata mai lana silasila i foliga vaaia i fafo. (Luka 7:36-40) O le mea moni, na faaalia atoatoa e Iesu le alofa mutimutivale o lo tatou Atua.

³ ‘Mutimuti Vale Lona Alofa’: E leʻi faia e Iesu lana faiva ona o se tiute e ao ona ia fai. Sa uunaʻia o ia i le ‘mutimuti vale o lona alofa’ mo tagata. (Mare. 6:34) I se tulaga tutusa i aso nei, e lē na ona tatou avatu o le feʻau, ae o loo tatou taumafai foʻi e faasao ola o tagata, lea e sili ona tāua. Ia taumafai e malamalama i le māfuaaga e tali mai ai tagata i le auala o loo tali mai ai iā i tatou. Aiseā ua latou soona popolevale ai? Po ua tuulafoaʻi i latou ma faasesēina e leoleo mamoe o lotu sesē? O lo tatou naunau moni i isi e ono uunaʻia ai i latou e faalogo i le tala lelei.—2 Kori. 6:4, 6.

⁴ E pāʻia loto o tagata ona o le alofa mutimutivale. Ina ia faataʻitaʻia lenei mea: Na matuā pagatia se fafine i le oti o lana tama teine e tolu masina le matua. Ina ua talaʻi atu ni tuafāfine se toʻalua i lona fale, ona ia valaaulia lea o i laʻua i totonu ma na ia fuafua e faamaonia le sesē o mea o la talanoa atu ai e faatatau i le māfuaaga ua faataga ai e le Atua puapuaga. E ui i lea, na ia faapea mai mulimuli ane: “Na la faalogo mai iā te aʻu ma le alofa mutimutivale tele ma, ina o le a ō ese atu, sa ou lagona le fiafia lea na ou manaʻo ai e toe asiasi mai.” Pe e te taumafai e faaalia le alofa mutimutivale i tagata uma e te feiloaʻi i ai i le faiva?

⁵ O le ati aʻe o le alofa mutimutivale o le a fesoasoani iā i tatou e faamāfanafana atu ai i isi. O le faia faapea, e tatou te faamamaluina ai le “Tamā e ona le alofa mutimuti vale,” o Ieova.—2 Kori. 1:3.