Ati Aʻe le Loto Faafetai i Uiga Lē Mafaatusalia o Ieova
1 I la tatou faiva, e sili atu mea e tatou te faia i lo le na ona aʻoaʻoina o isi i upu moni faavae o le Tusi Paia. E tatou te fesoasoani i tagata ia latou iloa lelei Ieova ma maua se loto faafetai i ona uiga lē mafaatusalia. Pe a aʻoaʻoina e tagata loto faamaoni le upu moni e faatatau i le Atua, e iai sona aafiaga loloto iā i latou, ma uunaʻia ai i latou e faia suiga i o latou olaga ina ia “savavali e tusa ma le Alii, ina ia fiafia mai o ia iā te [i latou] i mea uma.”—Kolo. 1:9, 10; 3:9, 10.
2 La Tatou Fesoasoani Fou mo Suʻesuʻega: O loo taulaʻi atu le tusi Aʻoaʻoga a le Tusi Paia mai lava i le amataga i uiga o Ieova. O le mataupu muamua o loo taliina ai fesili: Pe e alofa moni le Atua iā te oe?, E faapeʻī uiga o le Atua?, ma le Pe e mafai ona e faalatalata atu i le Atua? O loo faamamafa foʻi e le mataupu lava lenā le paia o Ieova (pala. 10), lona tonu ma le alofa mutimutivale (pala. 11), lona alofa (pala. 13), lona malosi (pala. 16), ma lona alofa mutimutivale ma le alofa fua, e faamagalo, onosai, ma le faamaoni (pala. 19). Ua aotele e le palakalafa e 20 le manatu i le faapea mai: “Afai e faaauau ona e aʻoaʻoina mea e faatatau iā Ieova, o le a e iloa lelei ai o ia, ma atili ai ona e alofa iā te ia, ma mafuta vavalalata atu i ai.”
3 E faapefea ona tatou faaaogā le tusi Aʻoaʻoga a le Tusi Paia e fesoasoani ai i tagata aʻoga e faalatalata atu iā Ieova? Pe a uma ona iloiloina se palakalafa o loo faamamafa ai se tasi o uiga o le Atua, e mafai ona tatou fesili atu i le tagata aʻoga, “O le ā e taʻu mai e lenei uiga e faatatau iā Ieova lava ia?” po o le, “E faapefea ona faaalia ai le naunau atu o le Atua iā te oe lava ia?” O le faaaogāina o na fesili mai lea taimi i lea taimi a o faia le suʻesuʻega, e tatou te aʻoaʻo ai a tatou tagata aʻoga e mafaufau loloto i mea ua latou aʻoaʻoina, ma fesoasoani e faatupu lo latou loto faafetai i uiga lē mafaatusalia o Ieova.
4 Faaaogā le Pusa Autalu: I le faaiʻuga o mataupu taʻitasi, fai i le tagata aʻoga e faamatala mai i ana lava upu manatu taʻitasi o loo i le pusa “Aʻoaʻoga a le Tusi Paia.” Ia taulaʻi atu manatu i mau faasino o loo iai. Ina ia faalaeiau le tagata aʻoga e faamatala mai mea o loo i lona loto, e te ono fesili atu i nisi taimi, “O le ā sou lagona e faatatau i le manatu o loo aʻoaʻoina i inei e le Tusi Paia?” O le faia faapea, o le a lē gata e faamamafa ai manatu tāua o le mataupu, ae o le a maua ai foʻi le malamalamaga manino o mea o loo talitonu i ai le tagata aʻoga. O le a fesoasoani lenei mea i le tagata aʻoga e amata ai ona ati aʻe se faiā ma Ieova.