E Faapefea Ona Tatou Fesoasoani i Tagata o le a Auai Mai i le Faamanatuga?
1. O le ā le molimau sili ona malosi o le a tuuina atu iā Mati 22, 2008?
1 Iā Mati 22, 2008, e faitau miliona tagata i le lalolagi atoa o le a faalogo i se molimau sili ona malosi. O i latou e auai i le Faamanatuga o le a faalogo i le anoanoaʻi o le alofa o Ieova i le saunia o le togiola mo le fanau a tagata. (Ioane 3:16) O le a latou aʻoaʻoina ai e uiga i le Malo ma le auala o le a faaaogā ai e Ieova ina ia faataunuuina lona finagalo mo le lalolagi. (Mata. 6:9, 10) O le a latou mātauina ai e i latou lava ia le alofa ma le autasi o tagata o le Atua, ma iloa lo tatou māfana ma le agaga talimālō.—Sala. 133:1.
2. E faapefea ona tatou fesoasoani i tagata o loo suʻesuʻeina le Tusi Paia ma i tatou, o le a auai i le Faamanatuga?
2 Tagata o Loo Fai Suʻesuʻega Faale-Tusi Paia: O nisi o le a aofia ai i lea pō, o i latou faatoʻā amata ona suʻesuʻeina faatasi ma i tatou le Tusi Paia. Faafeiloaʻi atu i latou i uso ma tuafāfine. Faamatala i ai a tatou sauniga i le vaiaso, ma faamatamata i le Maota mo Sauniga. A o faagasolo le lauga, o le a faalaeiauina i latou e le failauga ina ia faaauau pea ona atiaʻe la latou faiā ma Ieova. E mafai ona e faaaogā na faamatalaga e fai ma faavae o lou faalaeiauina o tagata o loo outou suʻesuʻe.
3. O le ā e mafai ona fai e faalaeiau ai tagata talaʻi ua lē toe talaʻi o le a auai i le Faamanatuga?
3 Tagata ua Lē Toe Talaʻi: O nisi o le a auai, o tagata talaʻi ua lē o toe talaʻi. Ia taulamua e faafeiloaʻi ma le māfana i latou. Aua le faia i ai ni fesili e faatatau i le tagata po o ni faamatalaga foʻi e ono faalumaina ai i latou. A māeʻa le Faamanatuga, e ao i toeaina ona vave asia so o se tagata ua lē o toe talaʻi o le a auai mai, faamālō i ai mo taumafaiga ina ia auai i le Faamanatuga, ma valaaulia ma le māfana i latou i le isi sauniga a le faapotopotoga e sosoo ai.
4. E faapea iā i tatou uma lava ona fesoasoani iā i latou o le a asiasi mai?
4 I Latou e Asiasi Mai: O nisi o le a auai atonu o ē tatou te masani, ia po o nisi foʻi o o tatou aiga o le a tatou valaauliaina. O isi atonu na maua se valaaulia i le tauiviga faapitoa. Afai e te mātauina nisi e te lē masani ai, tausolomua oe ona alu i ai ma faafeiloaʻi atu ma le māfana i latou. Atonu latou te leʻi auai muamua lava i sa tatou sauniga. Atonu o le a e iloa pe a e talanoa i ai le auala e toe faafesootaʻi ai i latou. Pe a māeʻa le Faamanatuga, atonu pe a e asiasi i ai po o le tau lava foʻi o le telefoni puupuu atu i ai, e te ono faalaeiauina i latou e aʻoaʻoina atili ma ofo i ai se suʻesuʻega faale-Tusi Paia.
5. O ā faamatalaga tatou te ono fai atu ina ia amata ai se suʻesuʻega faale-Tusi Paia?
5 O faamatalaga o le a maua i le lauga o le Faamanatuga e mafai ona faaaogā e faatomua atu ai le tusi Aʻoaʻoga Moni i se toe asiga. O se faaaʻoaʻoga, o le a faitau e le failauga le Isaia 65:21-23. Pe a e alu la e asi le tagata, e te ono taʻua le lauga ma faapea atu, “Seʻi ou faasino atu iā te oe isi faamanuiaga ua maua ona o le togiola.” Ia ona talanoa lea i le itulau e 4-5 o le tusi Aʻoaʻoga Moni. Ia pe e te faapea atu foʻi, “E toʻatele o loo taumānatu po o afea e faataunuuina ai le valoaga a Isaia.” Ona talanoa lea i le palakalafa 1-3 i le mataupu e 9. O le isi mea e mafai ona fai o le faasino atu i manatu sa taʻua e le failauga o le Faamanatuga, faailoa i ai le tusi Aʻoaʻoga Moni, ma faataʻitaʻi le faiga o le suʻesuʻega.
6. O ā avanoa o le a tatou maua a o tatou usitaia le poloaʻiga a Iesu ina ia faamanatu lona maliu?
6 Tau ina ia tatou taʻitoʻatasi ma mataʻalia i avanoa e fesoasoani ai i tagata o tatou faia a latou suʻesuʻega o le Tusi Paia, tagata ua lē toe talaʻi, o ē o le a asiasi mai o le a iai i le aofia. (Luka 22:19) E mautinoa le faamanuia e Ieova o so o se gaoioiga faaopoopo i la tatou auaunaga o le Malo.