O le a Avatu ai se Molimau Malosi
1. E faaopoopo atu i le lauga, o ā isi mea na fiafia ai tagata na valaaulia i le Faamanatuga? Faamatala.
1 O afea? I le pō o le Faamanatuga. E tele ni taumafaiga e faia e valaaulia ai tagata ina ia auai faatasi ma i tatou. E lē na o mea e faalogo i ai tagata valaaulia o le a fiafia i ai. Na taʻutino mai e se fafine na auai i se Faamanatuga lona fiafia i mea na vaai i ai, o uiga faaleuō o tagata uma, le mamā ma le matagofie o le fale na fausiaina ma teuina e tagata tauofo. O le mea lea, e lē gata i le failauga, a o i tatou uma e faia se sao i le avatuina o se molimau i lenei sauniga faale-tausaga e sili ona tāua.—Efe. 4:16.
2. E faapefea ona avatu e i tatou taʻitoʻatasi se molimau lelei i ē e asiasi mai?
2 Faafeiloaʻi ma le Māfana Ē Asiasi Mai: O le ʻataʻata faaleuō ma se faatalofa fiafia i ē e asiasi mai, o le a avatu ai se molimau lelei. (Ioa. 13:35) E ui e lē mafai ona e talanoa atu i tagata uma, ae e mafai lava ona e faailoa atu ma le māfana oe i tagata o loo i ou tafatafa. (Epe. 13:1, 2) Ia vaavaai mo ni tagata asiasi mai e foliga e leai se tasi e masani ai. Atonu na latou maua ni tusi valaaulia i le taimi o le tauiviga. E mafai ona e fesili atu, “O le taimi muamua lea ua e oo mai ai i inei?” Fai iai e tou te nonofo faatasi, ma o le a e fesoasoani e tali ni a latou fesili. Afai e tatau ona vave ō ese la outou faapotopotoga ona e faaaogā e se isi faapotopotoga le Maota, e te ono faapea atu: “Ou te fia iloa po o le ā sou manatu e uiga i le polokalame. Faamata e iai se auala e mafai ona ou faafesootaʻi atu ai oe?”
3. E faapefea ona tatou faafeiloaʻia i latou ua lē toe talaʻi?
3 Faafeiloaʻi i Latou ua Lē Toe Talaʻi: E mautinoa o le a auai i latou ua lē toe talaʻi, e aofia ai ma nisi e na o Faamanatuga lava e auai mai ai. Faafeiloaʻi i latou, ma faailoa iai ua e fiafia lava ina ua e vaai iā i latou. (Roma 15:7) E ono asiasi atu toeaina i o latou aiga i se taimi vave, ma faalaeiau i latou ia faaauau pea ona aufaatasi ma le faapotopotoga. Ia tatou tatalo ina ia uunaʻia le toʻatele na auai ia faamamaluina le Atua, e lē gata i mea na faalogo i ai, ae faapea foʻi mea na vāaitino i ai ʻina ua latou vāai i a tatou amioga lelei.’—1Pe 2:12.