Talaʻi e Aunoa ma le Faavaivai
1 I nisi taimi, atonu tatou te faapea ua fai soo le oganuu ae tau lē tali mai tagata. E ui i lea, o loo iai pea māfuaaga tatau e ao ai ona tatou talaʻi pea.—Mata. 28:19, 20.
2 Fai ma Molimau: Sa valoia e Iesu, o le talaʻia o le Malo o le a avea lea ma faailoga autū o “le iʻuga o faiga o mea a le lalolagi,” ma e ao ona “fai ma molimau i atunuu uma.” (Mata. 24:3, 14) Pe a mātauina e tagata o loo tatou talaʻia le tala lelei o le Malo, o se tasi na o molimau sili. Pe a tuua lenā vaipanoa, o le a talanoa nisi i la tatou asiasiga mo se itula po o ni aso foʻi, e ui lava latou te leʻi faalogo i le feʻau. O le talisapaia o māfuaaga mo la tatou auaunaga, o le a fesoasoani lea iā i tatou e onosai ai. O loo tatou faafiafia le finagalo o Ieova e ala i le faataunuuina o valoaga o le Tusi Paia, e ala i le molimau ma taʻutaʻu atu le lapataʻiga o le faaumatiaga.—2 Tesa. 1:6-9.
3 Manaʻomia Ona Onosai: Ona o le tele o faatosinaga ma le tele o mea e alu ai taimi o tagata, e manaʻomia le onosai pe a tatou taumafai e atiaʻe lo latou fiafia. Sa iai se fafine na asia i vaiaso taʻitasi mo le tausaga atoa, ona ia faatoʻā valaaulia lea o Molimau i totonu o lona fale mo se talanoaga faale-Tusi Paia. Sa ia matuā fiafia i mea na ia faalogo ai, ma ia talia loa se suʻesuʻega o le Tusi Paia, amata ona auai i sauniga, ma e leʻi umi ae faailoa mai lona faanaunauga e fia papatiso.
4 Ua televave le suiga o tulaga o mea a le lalolagi, aemaise foʻi tagata. O le toʻatele o tagata na tetee mai i la tatou asiasiga i taimi ua mavae, ua latou fia faalogo nei i la tatou feʻau e faafouina ai o le faamoemoe. E tusa lava pe tasi le tagata e tali fiafia mai i la tatou feʻau o le Malo, ua aogā lo tatou onosai.
5 I le lalolagi aoao, ua faatupulaʻia le aofaʻi o tagata o loo ‘mapuitigā, ma feoi ona o mea inosia uma ua fai.’ (Eseki. 9:4) Ua faamaonia e le talaʻiga, o i latou uma e fia aʻoaʻoina i le amiotonu, o loo tali mai i le feʻau o le Malo. (Isa. 2:2, 3) O lea la, ia tatou talaʻi e aunoa ma le faavaivai e ala i le onosai e ‘logologo atu le manuia, ua tala mai e le tala lelei.’—Isa. 52:7; Galu. 5:42.