O se Aso Faapitoa mo le Ofoina o Suʻesuʻega Faale-Tusi Paia
1 E amata iā Ianuari, o le a faatulaga ai e faapotopotoga taʻitasi se faaiʻuga o se vaiaso i masina taʻitasi, atonu po o le faaiʻuga o le vaiaso muamua o le masina, e taulaʻi patino ai lava i le ofoina atu o suʻesuʻega faale-Tusi Paia. O lona uiga o le Aso Toonai po o se Aso Sa, e faalagolago i le mea e sili ona talafeagai i le faapotopotoga. Afai e lē talia e tagata o aiga le ofo mo le faia o se suʻesuʻega faale-Tusi Paia, e mafai lava ona ofo e le ʻautalaʻi le tusi, Aʻoaʻoga a le Tusi Paia po o mekasini fou. E ao i toeaina uma ma auauna o le faiva ona fai le mea sili ina ia auai atoatoa i lenei taumafaiga ma fesoasoani i le ʻautalaʻi e amata ni suʻesuʻega faale-Tusi Paia.
2 O le Komiti o le Auaunaga a le Faapotopotoga e fuafuaina po o lē fea faaiʻuga o le vaiaso e faatulaga ai se aso e ofo atu ai suʻesuʻega faale-Tusi Paia. Mai lea taimi i lea taimi, o le a fai ma faamanatu atu ina ia sauniuni ai le ʻautalaʻi e fai ni taumafaiga faapitoa e ofo atu ni suʻesuʻega faale-Tusi Paia mai lea fale i lea fale, po o le ofo foʻi i taimi e toe asia ai i latou sa faaalia muamua le fiafia.
3 Le Auala e Sauniuni Ai: E tatou te maua fautuaga mo le amataina o suʻesuʻega faale-Tusi Paia i le faaopoopoga o La Tatou Faiva o le Malo o Ianuari 2006 ma le itulau e 4 o le tamaʻi tusi Le Auala e Amata ma Faaauau ai Talanoaga Faale-Tusi Paia. E ono filifili nisi e faaaogā se sāvali, e pei o le Pe E te Fia Iloa le Upu Moni? E faapena foʻi le itulau e 3 o La Tatou Faiva o le Malo o Aokuso 2007, o loo iai ni fautuaga i le amataina o suʻesuʻega faale-Tusi Paia pe a asiasi atu iā i latou na talia mekasini. O le a auauaʻi toeaina ma auauna o le faiva e taʻitaʻia se feiloaʻiga puupuu mo le auaunaga i le fanua pe 10 i le 15 minute le umi, lea e ao ona talanoaina ai pe faataʻitaʻia ai foʻi se fautuaga se tasi pe lua e aogā i le amataina o suʻesuʻega faale-Tusi Paia.
4 O le mea mautinoa lava ia, e lē o tagata uma o le a talia se suʻesuʻega faale-Tusi Paia po o le faaauau foʻi ona suʻesuʻe mo se taimi umi. Ae e lē avea lenā ma māfuaaga e taofia ai lo tatou ofoina atu o suʻesuʻega, auā o Ieova lea e tosina maia tagata pei ni mamoe i lana faalapotopotoga. (Ioa. 6:44) O lo tatou tiute tauave e lē na o le lūlūina o fatu o le upu moni ae e aofia ai foʻi ma le atiina aʻe ma faasūsū fatu ua amata ona iai aa pe ua tupu, e aofia ai la le suʻesuʻeina o le Tusi Paia ma i latou e naunau e fia iloa atili e faatatau iā Ieova. O lo tatou faia faapea, ua tatou faaalia ai o i tatou o le ʻaufaigaluega faatasi ma le Atua.—1 Kori. 3:9.