Po ua E Sauni e Molimau Atu Lē Fuafuaina?

1. O le ā le faaaʻoaʻoga e faaalia ai e mafai ona aogā le molimau atu lē fuafuaina?

¹ E mafai ona matuā aogā lava le molimau atu lē fuafuaina. O loo i le Tusi Paia le tele o faaaʻoaʻoga o le molimau atu lē fuafuaina ma iʻuga lelei na maua ai. (Ioa. 4:7-15) O le ā tatou te fai e sauniuni ai mo lenei ituaiga molimau atu?

2. E mafai faapefea ona fesoasoani o tatou foliga vaaia i le avatuina o se molimau?

² Lāʻei ma Teuga: O le manatu mamafa i o tatou lāʻei ma teuga i taimi uma, o le a faigofie ai ona tatou talanoa saʻoloto i isi e faatatau i o tatou talitonuga. (1 Timo. 2:9, 10) Afai tatou te manatu e lē o talafeagai o tatou foliga vaaia, e tatou te ono faatalatū e molimau atu i isi. I le tuufaafeagai, e ono faapogaia nisi e talanoa mai iā i tatou pe a lelei o tatou foliga vaaia. O se faaaʻoaʻoga, a o alu se malaga, sa nonofo faatasi ai se ulugalii Molimau e lelei o la lāʻei ma se tamāloa Musalimi. Ona o le mātauina o o la foliga vaaia, na fesili ai le tamāloa po o laʻua o ni Kerisiano. Na amata ai se talanoaga faale-Tusi Paia e tolu itula o fai.

3. I le mulimuli i le faaaʻoaʻoga a Iesu, na faapefea ona e amata se talanoaga?

³ Amataina o ni Talanoaga: Ina ua feiloaʻi Iesu i le fafine Samaria i le vaieli o Iakopo, na ia amataina le talanoaga i le na ona talosaga atu lava i sina vai e inu ai. E mafai foʻi ona tatou amataina faapena ni talanoaga, i le na ona fai atu o se faamatalaga puupuu pe fai foʻi se fesili faigofie. E ui lava tatou te ono faatalatū i nisi taimi, ae a tatou faalagolago i le fesoasoani mai iā Ieova, e iʻu ina mafai ona tatou “lototetele” e amata se talanoaga.—1 Tesa. 2:2.

4. E faapefea ona tatou sauniuni e molimau atu lē fuafuaina?

⁴ Ia Saʻili ni Avanoa: O le toʻatele o le autalaʻi e latou te maua avanoa e molimau atu ai lē fuafuaina. Ia autalu lou tulaga, ma mafaufau i tagata e te ono feiloaʻi i ai a o faagasolo le aso. Alu ma ave ni lomiga talafeagai ma se Tusi Paia laʻitiiti. Ia mātau tagata ma a latou gaoioiga, ma faaalia le naunau i tagata i le mea o e iai. Pe a e muaʻi mafaufau i avanoa e ono tulaʻi mai a o faagasolo le aso, e ono mafai ai ona e sauni e avatu se molimau lelei.—Fili. 1:12-14; 1 Pete. 3:15.

5. Aiseā e lē tatau ai ona manatu māmā i le molimau atu lē fuafuaina?

⁵ E lua māfuaaga e ao ai ona tatou faaaogā avanoa e molimau lē fuafuaina atu ai—o le alofa i le Atua ma le alofa i tuaoi. (Mata. 22:37-39) Pe a manatu i le faanatinati o le galuega talaʻi, e lē tatau ona tatou manatu māmā i le molimau atu lē fuafuaina. E ao ona tatou nofo sauni e faaaogā avanoa talafeagai uma, e taʻu atu ai le tala lelei o le Malo i isi a o maua pea le taimi.—Roma 10:13, 14; 2 Timo. 4:2.