“E Mafai Ona Avea Oe ma Paeonia Lelei!”
1. O le ā le lagona o se tuafafine i lana auaunaga o se paeonia?
1 Na faapea mai Kathe B. Palm: “Ou te leʻi iloa lava se isi galuega e maua ai le lotomalie ma tauia ai faaleagaga.” E faitau sefulu tausaga o talaʻi o ia o se paeonia mai le tasi pito i le isi pito o Sili, i Amerika i Saute. Pe a mafaufau i le olaga fiafia o i latou i le auaunaga faataimi atoa, atonu na fai atu se tasi iā te oe: “E mafai lava ona avea oe ma paeonia lelei!”
2. Faamatala le māfuaaga e matuā faamalieina ai i galuega faaleagaga.
2 O se Olaga Faamalieina: Na faafouina Iesu lo tatou Faaaʻoaʻo i le faia o le finagalo o lona Tamā. (Ioa. 4:34) Na aʻoaʻo ma le faamaoni e Iesu ona soo e faapea, e maua le faamalieina mai le auai i galuega e fesootaʻi ma le tapuaʻiga iā Ieova. E tatou te maua le lotomalie pe a pisi o tatou olaga i galuega e faafiafia ai Ieova. E sili lo tatou fiafia pe a faaalu le tele o taimi, malosi, ma alaʻoa e fesoasoani ai i isi.—Galu. 20:31, 35.
3. O le ā le olioli tatou te tofo i ai ona o le faateleina o le taimi e faaalu i le faiva?
3 O le tele o le taimi e tatou te talaʻi ai, o le tele foʻi lea o avanoa tatou te tofo ai i le olioli i le amataina ma le faia o suʻesuʻega. E oo lava i oganuu e foliga mai e lē ano mai tagata, e tatou te iloa e sili atu ona fua tele a tatou oganuu nai lo le mea na tatou manatu ai muamua, a o faateleina lo tatou tomai i le faiva. Pe a mavae le tausaga talu ona paeonia, e mafai ona auai i le Aʻoga mo le Auaunaga Paeonia ma faaaogā le tomai e maua mai ai. (2 Timo. 2:15) A o tatou finafinau i le talaʻiga, atonu e tatou te totōina ni fatu o le upu moni, o le a fua mai mulimuli ane.—Fai. 11:6.
4. O le ā se mea e tatau ona manatunatu i ai talavou ua lata ona faauu mai i le aʻoga?
4 Talavou: A o lalata ina uma lau aʻoga, po o e mafaufau lelei i lou lumanaʻi? Auā e oo mai i le taimi nei, sa tele ina e pisi i au mea aʻoga. E faapefea ona faaaogā lou taimi pe a uma ona e faauu mai i le aʻoga? Nai lo o le faia o se galuega totogi, e lelei pe a manatunatu faatasi ma le tatalo i le sini e avea ma paeonia sauatoa. O tomai o e aʻoaʻoina e pei o le molimau atu i tagata e eseese o latou talaaga, o le foʻia o toʻatugā, le faia o se faasologa lelei, ma le atiaʻe o le tomai e aʻoaʻo atu, e aogā i lou olaga atoa.
5. E faapefea ona faalaeiau e mātua ma le faapotopotoga le galuega paeonia?
5 Mātua e, po o e fesoasoani i lau fanau e aapa atu i le auaunaga faataimi atoa? O au upu ma faaaʻoaʻoga lelei, e fesoasoani tele iā i latou e faamuamua ai le Malo i le olaga. (Mata. 6:33) E manatua e Ray, o lē na paeonia ina ua uma ona faauu mai i le aʻoga e faapea: “E masani ona fai mai loʻu tinā, o le auaunaga paeonia e maua ai se olaga e sili ona faamalieina.” E mafai foʻi e le faapotopotoga atoa ona faamalosiau le galuega paeonia e ala i a latou upu ma gaoioiga. Ua fai mai Iose mai Sepania: “E manatu laʻu faapotopotoga e sili ona lelei le galuega paeonia mo talavou. O a latou faamatalaga ma lo latou talisapaia o le galuega paeonia ma la latou fesoasoani, na faigofie ai ona ou paeonia.”
6. O le ā se mea tatou te ono faia pe a lē fia paeonia i le taimi nei?
6 Foʻia Toʻatugā: Ae faapefea pe a e fai mai: ʻOu te lē o fia paeonia.’ Afai o le lagona lenā e oo ane iā te oe, ia tatalo iā Ieova e uiga i lenā faalogona ma fai atu iā te ia, ʻOu te lē iloa le aogā o le paeonia iā te aʻu, ae ou te manaʻo e faia le mea e faafiafia ai oe.’ (Sala. 62:8; Faata. 23:26) Ona saʻili lea o lana taʻitaʻiga e ala i lana Afioga ma lana faalapotopotoga. E toʻatele paeonia na tofo muamua i le galuega o le paeonia lagolago. O le olioli na latou maua na uunaʻia ai e aapa atu i le auaunaga faataimi atoa.—Sala. 34:8.
7. E faapefea ona foʻia ni masalosaloga e lē mafai ona e ausia le 70 itula i le masina?
7 Ae faapefea pe afai e te lē o mautinoa e mafai ona e ausia le 70 itula i le masina? E lelei pe a talanoa atu i paeonia e iai o latou tulaga e pei o oe. (Faata. 15:22) Ona tusi loa lea o ni faasologa e talafeagai. O le a e iloa ai e sili atu ona faigofie le faaaogā tatau o le taimi i le faiva nai lo o isi mea e lē tāua.—Efe. 5:15, 16.
8. Aiseā e toe iloilo ai o tatou tulaga mai lea taimi i lea taimi?
8 Ia Toe Iloilo Lou Tulaga: E masani ona suia tulaga o tagata. E lelei ona toe iloilo lou tulaga mai lea taimi i lea taimi. O se faaaʻoaʻoga, po ua lata ona e litea mai i lau galuega? Na faapea mai Randy o lē na vave litea mai i lana galuega: “O lenei faaiʻuga na mafai ai ona ma paeonia sauatoa ma laʻu avā ma maua ai le avanoa e siitia atu e auauna i le vaipanoa e manaʻomia tele ai tagata talaʻi. E lē mafaitaulia faamanuiaga na ou maua ona o laʻu faaiʻuga, ae o le faamanuiaga aupito sili, o le maua o se lotofuatiaifo lelei.”
9. O le ā se mea e tatau ona iloiloina e ulugalii?
9 Ina ua uma ona iloilo lelei, ua iloa e nisi ulugalii o le a lē faigaluega i latou i aso uma. O lenei auala e manaʻomia ai ona faafaigofie olaga o o latou aiga ma aogā ai le faataulaga ua latou faia. Na faamavae se tuafafine mai i lana galuega ina ia faatele ai lona sao i le faiva. Na faapea mai lana tane o Ioane: “Ua sili atu ona ou fiafia ona ua ou iloa, ua fai se sao o laʻu avā i mea faaleagaga.”
10. Aiseā ua uunaʻia ai Kerisiano e manatunatu i le galuega paeonia?
10 O se Faaaliga o le Alofa ma le Faatuatua: Ua tuu mai e Ieova le talaʻiga o le galuega e matuā tāua e tatau ona tatou faia. Ua toeitiiti ona faaumatia lea o lenei faiga o mea, ae e na o i latou e valaau i le suafa o Ieova e faaolaina. (Roma 10:13) O se loto e tumu i le alofa iā te ia ma le talisapaia o mea ua ia faia mo i tatou, e uunaʻia ai i tatou e usiusitaʻi i le poloaʻiga a lona Alo, ia talaʻi ma le maelega. (Mata. 28:19, 20; 1 Ioa. 5:3) E lē gata i lea, o le talitonu ua tatou ola i aso e gata ai, e uunaʻia ai i tatou e faia mea uma tatou te mafaia i le faiva a o lava le taimi, i lo o le faaaogā atoatoa o le lalolagi.—1 Kori. 7:29-31.
11. O le ā so tatou manatu pe a fai mai se tasi e mafai ona avea i tatou ma paeonia lelei?
11 E paeonia sauatoa tagata ona o le tuutoina atu i le Atua, ae e lē o se tali atu i le talosaga a le faalapotopotoga. O lea, pe a fai atu se tasi iā te oe e mafai ona avea oe ma paeonia lelei, ia manatu i ai o se faamālō. Ia manatunatu faatasi ma le tatalo, ia auai ma i latou o ē o loo iai i lenei auaunaga faamalieloto.
[Faamatalaga faaopoopo i le itulau 4]
Mātua e, po o e fesoasoani i lau fanau e aapa atu i le auaunaga faataimi atoa?
[Faamatalaga faaopoopo i le itulau 5]
Ua tuu mai e Ieova le talaʻiga o le galuega e matuā tāua e tatau ona tatou faia.