O le Taimi Lenei e Talaʻi Ai!
1. Aiseā e talaʻi ai i le taimi lenei?
1 “Ia outou matataʻu i le Atua, ma avatu iā te ia le viiga.” I lalo o le taʻitaʻiga a agelu, ua folafola atu ai lenei feʻau “i atunuu uma, ma ituaiga, ma gagana eseese, ma nuu.” Aiseā? “Auā ua oo mai le itu aso o lana faamasinoga.” Ua tatou ola nei i lenā ‘itu aso o le faamasinoga,’ lea o le a taualuga i le faaumatiaga o lenei faiga o mea. E tāua i tagata ona “ifo i Lē na faia le lagi, ma le fanua, ma le sami, atoa ma puna o vai.” E leai se isi galuega ua faia e tusa lona tāua po o lona faanatinati i lo le folafolaina atu o le “tala lelei e faavavau.” Ioe, o le taimi lenei e talaʻi ai!—Faaa. 14:6, 7.
2. Ua faapefea ona faaalia e auauna a Ieova o loo latou iloaina le faanatinati tele o le taimi?
2 I le sefulu tausaga ua mavae, na toetoe lava oo atu i le 12 piliona itula na faaalu e auauna a Ieova i le talaʻia o le Malo ma le faia o soo. E toʻatele ua faia ni fetuutuunaʻiga i o latou olaga ina ia faateleina ai le taimi i le galuega o le seleselega faaleagaga. (Mata. 9:37, 38) I le tausaga ua mavae, mo se faataʻitaʻiga, pe tusa e sili atu i le 850,000 tagata talaʻi sa auauna o ni paeonia i masina taʻitasi. Mo paeonia sauatoa, e manaʻomia ai ona faaalu pe tusa o le 70 itula i masina taʻitasi i le galuega talaʻi. O paeonia lagolago e manaʻomia ona galulue mo le 50 itula i le masina.
3. O ā fetuutuunaʻiga e masani ona manaʻomia ona fai e tagata talaʻi, ina ia paeonia ai?
3 Mea e Fai Ina ia Paeonia Ai: Ona ua iloa “ua itiiti ona aso ua totoe,” ua taumafai malosi ai paeonia e fai le mea sili e mafai e faafaigofie ai o latou olaga. (1 Kori. 7:29, 31) E latou te vaai i auala e faaitiitia ai tupe faaalu ina ia lē tele ai taimi e alu i galuega totogi. Mo se faataʻitaʻiga, ua siitia atu nisi e nonofo i fale e laiti ifo. O isi ua latou aveesea mea faitino e lē manaʻomia. (Mata. 6:19-21) O le tulaga masani e tatau foʻi ona faaitiitia mea e fiafia i ai le tagata lava ia. O nei mea uma ua fai ina ia tele ai le taimi e uaʻi atu ai i le faiva. (Efe. 5:15, 16) O le faaauau pea, ma le iai o se agaga faataulaga, faapea ma le faalagolago atu iā Ieova e ala i le tatalo mo lana fesoasoani, ua tele ai tagata talaʻi ua mafai ona faia se faasologa lelei ina ia mafai ai ona paeonia.
4. O ā ni laasaga lelei e fesoasoani iā i tatou e galulue ai agaʻi i le sini o le avea ma paeonia?
4 Pe e mafai ona e paeonia? Aiseā e lē fesili atu ai i paeonia o loo taulau manuia pe ua mafai faapefea ona latou paeonia? Galulue ma i latou i le faiva i le fanua, ma tofo i lo latou olioli. Suʻesuʻe mataupu e faatatau i paeonia o loo i a tatou lomiga. Ia faatū ni sini lelei mo oe lea e oo ai ina mafai ona e paeonia. Afai o iai ni faafitauli o loo taofia ai oe mai le auauna o se paeonia i le taimi nei, ia taʻu atu iā Ieova i le tatalo, ma talosaga atu mo lana fesoasoani ina ia foʻia ai.—Faata. 16:3.
5. E faapefea ona fesoasoani le paeonia iā i tatou e faaleleia atili o tatou tomai i le faiva?
5 Faamanuiaga Faapea ma Lagona Olioli: O le paeonia e faaleleia ai o tatou tomai i le faaaogāina o le Afioga a le Atua, lea e aumai ai le olioli tele. Sa faapea mai se tuafafine talavou paeonia: “E ese le aogā o le mafai ona talaʻitonuina le upu moni. Pe a e paeonia, e tele ina e faaaogā lau Tusi Paia. Pe a ou talaʻi la mai lea fale i lea fale, ou te mafaufau i ni mau e talafeagai mo tagata eseese i aiga.”—2 Timo. 2:15.
6. O le ā le toleniga e maua mai le paeonia?
6 O le paeonia e aʻoaʻoina ai le tele o tomai e faaleleia ai o tatou olaga. E fesoasoani i talavou e iloa ai le auala e faasoa lelei ai le taimi, le auala e taulimaina ai tulaga tautupe, ma le auala e feagai ai ma tagata. O le toʻatele, ua latou ati aʻe se vaaiga faaleagaga i le olaga ona ua paeonia. (Efe. 4:13) E lē gata i lea, e masani lava ona maua e paeonia le avanoa e maua ai le fesoasoani ma faamanuiaga a Ieova.—Galu. 11:21; Fili. 4:11-13.
7. E faapefea ona fesoasoani le paeonia iā i tatou e faalatalata atu ai iā Ieova?
7 Atonu o se tasi o faamanuiaga sili o le paeonia o le fesoasoani lea e tatou te faalatalata atu ai iā Ieova. E tatou te tumau ai e ui i puapuaga. Na faapea mai se tuafafine na onosaia se vaitaimi o faigatā mataʻutia: “O le faiā māfana ma Ieova na ou atiina aʻe e ala i le paeonia, na fesoasoani iā te aʻu e onosaia ai faigatā uma.” Na ia toe faaopoopo mai: “Ua ou lagona le fiafia ona na faaalu loʻu olaga talavou i le auaunaga faataimi atoa iā Ieova. Ua mafai ai ona ou galue i le tele o auala ou te leʻi manatu i ai ou te mafaia.” (Galu. 20:35) Tau ina ia tatou maua foʻi faamanuiaga faapena, a o tatou faia le mea sili tatou te mafaia, i le galuega talaʻi lea e sili ona tāua.—Faata. 10:22.