Faasologa Fou o Mataupu e Amata ai Suʻesuʻega Faale-Tusi Paia
1. O le ā le faasologa fou o mataupu o le a maua i le lomiga o Le Olomatamata mo le lautele, ma o le ā lona fuafuaga?
E amata i le masina fou, ona maua se faasologa fou o mataupu i la tatou lomiga o Le Olomatamata mo le lautele, e fesoasoani e amata ai suʻesuʻega faale-Tusi Paia. O lona matua: “Aʻoaʻoga a le Tusi Paia.” E mautinoa o le a fiafia nisi i le oganuu e faitau mataupu taʻitasi o lenei faasologa fou o mataupu, ae o le fuafuaga, ia talanoaina ma le tagata o le aiga.
2. O ā nisi o vala o nei mataupu?
2 Vala Eseese: O le ulutala ma tamaʻi ulutala ua tusia faafesili, e fesili ai i le tagata o le aiga a o faia le talanoaga. O mau autū o le a na ona taʻua ae lē siiina mai, ina ia aʻoaʻo tuusaʻo ai e le tagata o le aiga mea mai le Afioga a le Atua. E pupuu palakalafa ina ia mafai ona talanoaina i lenā lava taimi. O mataupu taʻitasi o loo faasino atu i le tusi Aʻoaʻoga Moni, ina ia faigofie ai ona sui atu le suʻesuʻega i lenā lomiga i se taimi e talafeagai ai.
3. Pe a galulue mai lea fale i lea fale, e faapefea ona e faaaogā le faasologa fou o mataupu e amata ai se suʻesuʻega faale-Tusi Paia i le taimi lava lenā?
3 Le Auala e Faaaogā Ai: Pe a ofo atu mekasini, e mafai ona e fai atu se fesili e faaoso ai le fiafia e faatatau i le ulutala o le mataupu. O se faataʻitaʻiga, o loo talanoaina i le lomiga o Ianuari 1 le mataupu e faatatau i le aogā o le Tusi Paia. E te ono fesili atu: “Pe e te manatu i le Tusi Paia o le Afioga a le Atua, po ua na o se tusi manaia? [Faatali mo se tali.] E iai se mea manaia o loo i lenei mataupu.” Faasino i ai le fesili muamua, faitau le palakalafa muamua, ma suʻe le mau faasino o loo iai. Toe faitau le fesili, ma fesili atu mo sona manatu. Ia talanoa le mataupu i le tele e talafeagai ai, ma faaaogā fesili ua faanumeraina e fai ma manatu e talanoaina. A o leʻi tuua le aiga, ia faasino atu i le isi fesili o sosoo ai, ma fai se fuafuaga maʻoti e te foʻi atu e talanoaina lenā fesili. Toe foʻi e talanoa atili le mataupu i vaiaso taʻitasi seʻia oo ina maua mai le isi lomiga fou. O le isi auala, o le ofo tuusaʻo lea o se suʻesuʻega faale-Tusi Paia i le tagata o le aiga. Ona faaaogā lea o le mataupu i le mekasini e faataʻitaʻi ai le faiga o se suʻesuʻega.
4. E faapefea ona tatou faaaogā nei mataupu pe a fai ni toe asiga?
4 E mafai foʻi ona e faaaogā lenei faasologa fou o mataupu i au ālā mekasini ma isi toe asiga. E mafai ona e faapea atu: “O loo iai se vala fou i Le Olomatamata. Seʻi oʻu faasino atu le auala e faaaogā ai.” O la matou tatalo ia avea lenei faasologa fou o mataupu, e mafai ai e le toʻatele ona “maua le poto saʻo i le upu moni.”—1 Timo. 2:4.