O se Faasologa o Mataupu e Aogā i la Tatou Faiva
1. O ā fuafuaga e lua o le faasologa o mataupu ua faaulutalaina “Se Talanoaga Faale-Tusi Paia”?
1 O loo faaauau pea ona aumaia i Le Olomatamata mo le lautele le faasologa o mataupu ua faaulutalaina “Se Talanoaga Faale-Tusi Paia.” E lua fuafuaga o lenei faasologa o mataupu—ina ia faailoa atu aʻoaʻoga a le Tusi Paia i se auala logolelei, faapea le auala e tatou te fefulifulisaʻi ai ma le faautauta i nisi o mataupu. (1 Pete. 3:15) E faapefea ona tatou faaaogā lelei lenei mataupu?
2. E faapefea ona tatou faaaogā i le faiva i le fanua lenei faasologa o mataupu?
2 Faaaogā i le Faiva i le Fanua: Atonu o loo e teuina nisi kopi o Le Olomatamata o loo iai lenei faasologa o mataupu. Afai e lāgā e se tagata fiafia, po o se tagata suʻesuʻe se fesili po o se mataupu e na te tetee ai, avatu iā te ia se kopi o lenā mataupu ma fai se fuafuaga e amata ai se talanoaga. Pe afai e leai sau kopi o le mekasini o loo iai lenā faasologa o mataupu, e mafai ona maua sau kopi mai le jw.org.
3. E faapefea ona tatou faaaogāina lenei faasologa o mataupu e faia ai se talanoaga ma lē e ona le fale?
3 E faapefea ona faaaogāina e se tagata talaʻi lenei faasologa o mataupu e faia ai se talanoaga ma se tasi? O nisi e latou te faitauina tala a le tagata talaʻi, ae valaaulia lē e ona le fale e faitau mai tala a le tagata i le fanua. Ua iloa e le toʻatele le aogā o lenei auala, ina ia mafai ai e le tagata e ona le fale ona iloiloina o tatou talitonuga ma faigofie ai ona ia taliaina.—Teu. 32:2.
4. E faapefea ona tatou faaaogāina lenei faasologa o mataupu e aʻoaʻoina ai i tatou lava?
4 Aʻoaʻoina i Tatou Lava Faapea ma Isi: A o e faitau i nei faasologa o mataupu, ia mātau mau o le Tusi Paia, faataʻitaʻiga, faapea manatu e fefulifulisaʻi ai. Mātau foʻi le auala o loo tusia ai le mataupu, ona taumafai lea e faataʻitaʻi i le faiva i le fanua. (Faata. 1:5; 9:9) Na taʻua e se tuafafine: “Pe a ou faitau i nei mataupu, e pei o loo oʻu aʻoaʻoina ni mea mai i saʻu paga paeonia e ʻfetaui lelei,’ o se tasi e iloa lelei le faamatalaga tonu e tatau ona fai!”
5. E mafai faapefea ona tatou fesoasoani i a tatou tagata aʻoga ina ia sauniuni lelei ai mo le talaʻiga?
5 E mafai foʻi ona e faaaogāina nei talanoaga faale-Tusi Paia, e fesoasoani ai i au tagata suʻesuʻe ina ia sauniuni lelei ai mo le talaʻiga. Faitau faatasi le mataupu, ma tuu atu le avanoa i le tagata aʻoga e fai o ia ma tagata talaʻi. O le faia faapea, e mafai ai e le tagata aʻoga ona faataʻitaʻi le auala e faailoa mai ai ona talitonuga i se auala faautauta. (Kolo. 4:6) Ioe, o nei faasologa o mataupu o se tasi lea o auala ua fesoasoani mai ai Ieova e tatou te ʻfaia ai ma le māeʻaeʻa’ la tatou faiva.—2 Timo. 4:5.