Fautuaga e Tolu mo le Faaleleia o Lau Aʻoaʻo Atu
1. Aiseā e tatau ai ona tatou taumafai e faaleleia atili la tatou aʻoaʻo atu?
1 O faifeʻau Kerisiano uma lava o faiaʻoga. E tusa po o la tatou uluaʻi asiasiga, toe foʻi e asi lē fiafia, po o le faia o se suʻesuʻega faale-Tusi Paia, o lo tatou sini autū o le faailoa atu o faamatalaga. Ma o faamatalaga o loo tatou aʻoaʻo atu e tāua tele. O loo tatou faasusulu atu ai le malamalama o “tusitusiga paia,” lea e mafai ona “faapotoina ai [tagata] mo le faaolataga.” (2 Timo. 3:15) Maʻeu se faaeaga mataʻina! O fautuaga ia e tolu mo le faaleleia o la tatou aʻoaʻo atu.
2. E faapefea ona faafaigofie la tatou aʻoaʻo atu?
2 Faafaigofie: Afai tatou te malamalama lelei i se mataupu, e faigofie lava la ona galo iā i tatou e lavelave na faamatalaga i se tagata e lē iloaina. O le mea lea, afai o loo e faia se suʻesuʻega faale-Tusi Paia, aua le soona faaaofia ai ni faamatalaga e lē manaʻomia. Nai lo lenā, faamatilatila manatu autū. E lē o le tele o upu e uiga ai faapea o oe o se faiaʻoga lelei. (Faata. 10:19) E masani lava ona tāua ona faitau na o mau autū. Pe a māeʻa ona faitau le mau, taulaʻi le manatu i le mataupu o loo talanoaina. O le Lauga i luga o le Mauga o loo faamauina i le Mataio mataupu e 5 e oo i le 7, o loo iai ni upu moni e loloto, peitaʻi, na faafaigofie le aʻoaʻo a Iesu ma filifili lelei upu e fai atu.
3. O le ā le aogā o talafaatusa, ma o ā ituaiga o tala e masani ona lelei ma aogā?
3 Talafaatusa: O talafaatusa e mafai ona faagaee ai le mafaufau, faalogona, ma fesoasoani e manatua ai mea. Aua e te manatu seʻi vaganā o oe o se tagata faifagogo po o se tusitala, ona mafai lea ona fai ni talafaatusa. Sa masani ona faaaogā e Iesu talafaatusa pupuu ma faigofie. E mafai foʻi ona aogā se ata faigofie e tusi i se fasi pepa. O le sauniuni lelei o le a fesoasoani iā te oe e mafaufau ai i ni talafaatusa aogā.
4. E faapefea ona tatou faaaogā ma le uigā fesili?
4 Fesili: E uunaʻia e fesili lau tagata aʻoga e mafaufau. O le mea lea, ia onosaʻi pe a uma ona fai le fesili. Pe a vave ona e avatu le tali o le fesili, o le a leiloa la po o malamalama lau tagata aʻoga pe leai. Afai e sesē lana tali, nai lo o le faasaʻo o ia, atonu e sili ona tataʻi i le tali saʻo e ala i le faia o nisi fesili faaopoopo. (Mata. 17:24-27) E moni e leai se tasi o i tatou o se faiaʻoga e saʻo atoatoa. O le mea lea, o loo faalaeiau mai ai le Tusi Paia ia uaʻi lelei i la tatou aʻoaʻo atu. O lo tatou faia faapea o le a aumaia ai ni aogā e faavavau mo i tatou ma i latou e faalogologo iā i tatou.—1 Timo. 4:16.