Aua le Manatu Faatauvaa iā te Oe—ʻAlofia Lagona Lē Agavaa
1. Aiseā e faatalatū ai nisi e ofo atu se suʻesuʻega faale-Tusi Paia?
1 Po o e faatalatū e ofo atu se suʻesuʻega faale-Tusi Paia, ona e te lē o mautinoa po ua e agavaa e faia se suʻesuʻega uigā ma se tasi? E iai taimi na manatu ai foʻi auauna faamaoni i aso anamua e pei o Mose ma Ieremia, e lē agavaa i laʻua mo o la tofiga. (Eso. 3:10, 11; 4:10; Iere. 1:4-6) O lea, e toʻatele e iai lagona faapena. E faapefea la ona foʻia na lagona?
2. Aiseā e lē tatau ai ona manatu ua lava le auai i le talaʻiga, ae tuu i isi le faia o suʻesuʻega faale-Tusi Paia?
2 E tatau ona tatou manatua, e lē faatalitalia e Ieova i tatou e faia ni mea e sili atu nai i lo tatou tomai. (Sala. 103:14) O lea la, e mafai ona faataunuu lo tatou tofiga o le fai o tagata ma soo ma aʻoaʻoina i latou. (Mata. 28:19, 20) E lē o se tofiga na tuu atu e Ieova na o i latou e tomai, pe e talenia nai lo o i tatou. (1 Kori. 1:26, 27) O lona uiga, e lē tatau ona tatou manatu ua lava le auai i le talaʻiga mai i lea fale i lea fale, ae tuu i isi le faia o suʻesuʻega faale-Tusi Paia.
3. E faapefea ona faaagavaaina i tatou e Ieova mo le faia o suʻesuʻega faale-Tusi Paia?
3 Faaagavaaina i Tatou e Ieova: O lo tatou agavaa e fai isi ma soo, e mai iā Ieova. (2 Kori. 3:5) E ala mai i lana faalapotopotoga, ua ia aʻoaʻoina i tatou i upu moni o le Tusi Paia, ia e oo lava i tagata e sili ona popoto o le lalolagi e lē iloa. (1 Kori. 2:7, 8) Na faamaumau e Ieova i le Tusi Paia auala na aʻoaʻo ai le Faiaʻoga Sili, o Iesu, ina ia tatou faaaʻoaʻo i ai, ma o loo maua foʻi toleniga e ala mai i le faapotopotoga. E lē gata i lea, ua saunia foʻi e Ieova meafaigaluega mo le aʻoaʻoina o le Tusi Paia, e pei o le tusi Aʻoaʻoga a le Tusi Paia, lea e mafai ona aʻoaʻo atu ai upu moni i se auala manino ma malamalama gofie. O lea la, o le faia o se suʻesuʻega faale-Tusi Paia atonu e lē o se luʻi e faigatā ona ausia.
4. E faapefea ona tatou mautinoa o le a fesoasoani mai Ieova?
4 Sa mafai e Mose ma Ieremia ona faatino lo la tofiga ona o le fesoasoani a Ieova. (Eso. 4:11, 12; Iere. 1:7, 8) E mafai foʻi ona tatou ōle atu iā Ieova mo se fesoasoani, auā pe a faia se suʻesuʻega faale-Tusi Paia, o loo tatou aʻoaʻo isi i upu moni e uiga iā Ieova, ma o se mea lea e mālie i Lana silafaga. (1 Ioa. 3:22) O lea, ia fai ma ou sini le fai o se sao i le galuega o le faia o suʻesuʻega faale-Tusi Paia, o se vala sili lea ona olioli ma tauia i le auaunaga.