Sauniuni mo le Faamanatuga ma se Loto Olioli
1. O le ā le avanoa lelei e tatou te maua i le vaitaimi o le Faamanatuga?
1 O le Faamanatuga i le Aso Lua, Mati 26, o se avanoa lelei lea e tatou te olioli ai ona o le auala ua saunia e le Atua mo le faaolataga. (Isa. 61:10) O le a fesoasoani lenā olioli iā i tatou e sauniuni lelei ai mo le Faamanatuga o loo loma nei. I le ā le itu?
2. O le ā e uunaʻia i tatou e sauniuni ai mo le Faamanatuga?
2 Ia Sauniuni mo le Faamanatuga: O le Faamanatuga e lē o se sauniga e lavelave ae e tāua tele. Peitaʻi, e manaʻomia ona tapenapena mamao ina ia maopoopo mea uma. (Faata. 21:5) E tatau ona iai le areto ma le uaina talafeagai. E tatau ona filifili lelei foʻi se taimi ma se nofoaga lelei e faia ai. Ia mamā ma lava saunia foʻi le nofoaga mo le Faamanatuga. Ia sauniuni lelei le uso o le a faia le lauga, ma ia maopoopo foʻi le ʻautautua ma i latou e tufaina le areto ma le uaina. Ia mautinoa ua lava saunia na vala uma. O le talisapaia o le taulaga togiola, e uunaʻia ai i tatou e sauniuni lelei mo lenā sauniga paia.—1 Pete. 1:8, 9.
3. E faapefea ona sauniunia o tatou loto mo le Faamanatuga?
3 Ia Sauniunia o Tatou Loto: E tāua foʻi le sauniuni o o tatou loto ina ia malamalama ai i le tāua o le Faamanatuga. (Esera 7:10) O lea, e tatau ai ona sema se taimi e faitau ai i le faitauga Tusi Paia o le Faamanatuga e faatatau i toe taimi o Iesu o le lalolagi, ma ia manatunatu loloto i ai. O le manatunatu i le agaga faataulaga na faaalia e Iesu, e uunaʻia ai i tatou e faaaʻoaʻo iā te ia.—Kala. 2:20.
4. O le ā se aogā o le togiola e sili ona e fiafia i ai?
4 O le maliu o le Keriso na faamaonia ai le tonu o le pule silisili ese a Ieova. Ua tuusaʻoloto ai foʻi i tatou mai le agasala ma le oti. (1 Ioa. 2:2) Ua mafai ai ona maua se faiā lelei ma le Atua faapea le ola e faavavau. (Kolo. 1:21, 22) E faamalosia ai foʻi i tatou ina ia ola e tusa ma lo tatou tuuina atu, ma tumau pea ona avea ma soo o Keriso. (Mata. 16:24) Tau ina faatupuina pea lo tatou olioli, a o tatou sauniuni ma fuafua e auai i le Faamanatuga o loo loma nei.