Po o E Sauniuni mo le Faamanatuga?

Ua oo i le aso 13 o Nisani i le 33 T.A., ma ua silafia e Iesu e toe tasi le afiafi e faatasitasi ai ma ana aumea vavalalata a o leʻi fasiotia o ia. O le a latou faamanatu faatasi lana Paseka mulimuli, ona ia faavaeina lea o se sauniga fou, o le Talisuaga Afiafi a le Alii. E mautinoa sa manaʻomia ona sauniuni mo lenei sauniga tāua, ma o lea na ia auina atu ai Peteru ma Ioane e sauni mea mo lea faatasiga. (Luka 22:7-13) Talu mai lenā taimi, ua talafeagai ai foʻi i Kerisiano e naunau e faamanatu le Faamanatuga i tausaga taʻitasi, ona sauniuni mo lenei sauniga. (Luka 22:19) O ā ni mea e tatau ona tatou faia e sauniuni ai mo le Faamanatuga iā Aperila 3?

Sauniuniga a Toeaina:

Ia faatulaga e faaaogā le Maota mo Sauniga po o se isi fale e talafeagai. E tatau ona lava ni nofoa, ia lelei molī ma ia mālū. Ia faamamā lelei le Maota po o le fale a o leʻi oo i le aso o le Faamanatuga.
Ia filifili se failauga agavaa, se taʻitaʻifono, ma ni uso e tatalo mo le areto ma le uaina.
Pe afai e iai se isi sauniga e sosoo ai e fai i lea Maota po o le fale, ia felagolagomaʻi i le taimi o le sauniga ma faatulagaga e tusa ai o le taimi e taunuu ma tuua ai le fale, ma le vaega e paka ai taavale.
Filifili ma faamaopoopo se ʻautautua ma i latou e tufaina le areto ma le uaina.
Ia faamautinoa e iai ni areto ma se uaina, ni ipu mo le areto ma le uaina, se laulau talafeagai ma se ʻie laulau.

Sauniuniga a Tagata Talaʻi:

Ia faatulaga e fai se sao atoatoa i le tauiviga mo le tufaina o le valaaulia o le Faamanatuga.
Tusi se lisi o suʻesuʻega faale-Tusi Paia, tauaiga, tagata e aʻoʻoga ma faigaluega faatasi, ma isi e masani i ai, ma ia valaaulia i latou.
Faitau ma manatunatu loloto i le faitau Tusi Paia o le Faamanatuga.
Ia auai i le Faamanatuga ma sauni e faafeiloaʻi i latou e asiasi mai.