Ia Faalogo ma Aʻoaʻoina

1. Aiseā e manaʻomia ai ni taumafaiga ina ia faalogo ma aʻoaʻoina, a o iai i le tauaofiaga?

¹ Ua lē o toe umi ae amata tauaofiaga itumalo 2013. E tele taumafaiga ua faia i le sauniunia o se polokalame e faalauiloa ai manaʻoga o loo iai i le taimi nei i le lalolagi. Po ua fai ni au fuafuaga ina ia auai i aso uma e tolu o le tauaofiaga? O nei tauaofiaga e tele mea e ono faalavelavea ai i tatou, e uumi atu i lo sauniga a le faapotopotoga, ma e ono lē lavavā foʻi ona o femalagaaʻiga ma isi mea. O lea la, e tāua tele ona mataala ma uaʻi totoʻa atu pea. O le ā e fesoasoani iā i tatou e mataala ai pea, ma mafai ai ona faalogologo ma aʻoaʻoina?—Teu. 31:12.

2. E faapefea ona sauniunia o tatou loto mo le polokalame o le tauaofiaga?

² A o Leʻi Amata le Tauaofiaga: O loo iai i la tatou tuatusi o le www.pr418.com le polokalame o le tauaofiaga, e aofia ai matua o lauga ma se mau autū se tasi pe lua o lauga taʻitasi. Pe afai e tatou te faaaogāina le Initaneti, ia tagaʻi i nei faamatalaga ina ia fesoasoani e sauniunia ai o tatou loto. (Esera 7:10) Pe mafai ona faaalu se taimi o la outou Tapuaʻiga a le Aiga e talanoa ai le polokalame, ma atiaʻe ai le naunau o le aiga mo le tauaofiaga?

3. O le ā e fesoasoani iā i tatou ina ia faalogologo lelei ai?

³ A o Faagasolo le Polokalame: Pe a talafeagai, e lelei ona faaaogā le falelētaʻua a o leʻi amata le polokalame. Ia tapē lau telefoni ina ia aua neʻi faalavelavea oe i ni valaau po o ni feʻau tusitusia, pe lafo atu foʻi ni feʻau tusitusia a o faagasolo le polokalame. Pe a iai se māfuaaga e tatau ai ona ki pea lau telefoni, e ao la ona seti i se tulaga e lē faalavelavea ai isi. Pe a e faaaogāina se komepiuta feaveaʻi (electronic tablet), ia faaaogā i se auala faautauta. Ia ʻalofia le aai ma feinu a o faagasolo le polokalame. (Fai. 3:1) Ia uaʻi atu pea i le failauga, ia suʻe ma mulimuli i mau o loo faitauina, ma fai ni faamaumauga pupuu.

4. E faapefea ona fesoasoani mātua i fanau ina ia faalogo ma aʻoaʻoina?

⁴ E tatou te mananaʻo foʻi i a tatou fanau ia faalogo ma aʻoaʻoina. Ua faapea mai le Faataoto 29:15: “O le tama e tuufau e tupu ai le mā o lona tinā.” O lea, e tāua ona nonofo faatasi le aiga, ina ia faamautinoa e mātua o loo faalogologo lelei le fanau, nai lo o le talanoa, savavali solo, pe lafo atu ni feʻau tusitusia. E tusa pe lāiti le fanau ma e lē malamalama i le tele o mea, ae e tatau lava ona aʻoaʻoina ia uaʻi atu pea ma nonofo filemu.

5. Aiseā e aogā ai le toe autalu o le polokalame, ma e faapefea ona fai?

⁵ Pe a Māeʻa le Polokalame i Aso Taʻitasi: Ia vave ona moe ina ia lava le mālōlō. O le toe autalu o mea na e faalogologo ai, o le a fesoasoani e te manatua ai mo se taimi umi. O lea, ia faaalu sina taimi i afiafi taʻitasi, e talanoa ai o se aiga le polokalame. Pe a tou ō ma ni au uō i se faleʻaiga, e lelei ona ave au faamaumauga ma talatalanoa i ni manatu na e fiafia ai. Pe a māeʻa le tauaofiaga, ia faaalu se taimi o la outou Tapuaʻiga a le Aiga, e talanoa ai ni auala e tou te faatatauina ai nisi o fautuaga. E mafai foʻi ona faatulaga se taimi i vaiaso taʻitasi e talanoaina ai se vaega o se mea fou na tatalaina.

6. Pe e lava le tau ina auai i le tauaofiaga? Faamatala.

⁶ E itiiti le aogā o se faigaʻai pe afai e lē faaaogāina ma faamalū lelei meaʻai. E faapena foʻi le faigaʻai faaleagaga ua saunia i le tauaofiaga itumalo. E faatoʻā tatou maua aogā pe a auai i le polokalame atoa, faalogologo lelei, ma faatatau mea na aʻoaʻoina.