O se Faatasiga e Taumamafa ma Olioli ai Faaleagaga
1. O faapefea ona tausia e Ieova manaʻoga faaleagaga o ana auauna?
1 O loo tausia ma le agalelei e Ieova manaʻoga faaleagaga o ana auauna. E ui o loo galala faaleagaga le lalolagi, ae o loo tele pea a tatou taumafa faaleagaga. (Isa. 65:13) O se tasi o auala e fafaga faaleagaga ai e Ieova i tatou, e ala i tauaofiaga itumalo i tausaga taʻitasi. Po ua amata ona e sauniuni e auai i vaega uma o le Tauaofiaga Itumalo o loo loma nei “Ia Taʻitaʻia e le Agaga o le Atua.” Ua uma ona faatulaga se taumafataga susua faaleagaga.
2. O ā mea e aofia i le fuafua mamao mo le tauaofiaga?
2 Fuafua Mamao: “O mafaufauga o ē filigā i galuega, na o le mau mea e iʻu i ai.” (Faata. 21:5) O lea la, ina ia faamautinoa au fuafuaga e te auai i aso uma e tolu o le tauaofiaga, aua neʻi faatuai ona e talanoa i le pule o lau galuega pe a manaʻomia ni ou aso mālōlō mai le galuega. Afai e te manaʻomia se āpi, po ua uma ona faatulaga? E ao foʻi ona saunia sau taumafataga mo le aoauli ina ia mafai ona outou taumamafa faatasi ma uso i le nofoaga o le tauaofiaga. Ia fuafua ia vave ona taunuu i le tauaofiaga i aso taʻitasi, e suʻe sou nofoa ma e auai i le pese ma le tatalo amata.
3. O ā ituaiga laʻei e tatau ona tatou fuafua e laʻeiina?
3 Ia tatou faamautinoa e onomea ma lelei o tatou laʻei e fai i le tauaofiaga. (1 Timo. 2:9, 10) E maua i taimi o tauaofiaga Itumalo se avanoa lelei tele e molimau atu ai i tagata o lenā vaipanoa. O le laʻeiina o laʻei e onomea ma mamalu a o iai i aai o loo faia ai le tauaofiaga, ma le faia o pine fatafata o le tauaofiaga, e matilatila ese ai i tatou mai ē e lē talitonu ma fiafia ai tagata o loo mātau mai.
4. O le ā e fesoasoani iā i tatou ma o tatou aiga ia maua aogā mai le polokalame?
4 Faalogologo Lelei: Tatou te lē mananaʻo e misia e tusa lava po o sina vaega itiiti o lenei faigaʻai faaleagaga! (Faata. 22:17, 18) O le mulimuli i a tatou Tusi Paia a o faitauina se mau, ma fai ni faamaumauga pupuu, o le a fesoasoani lea e aua tatou te tosina ese ae uaʻi totoʻa atu i le polokalame. Pe a oo i le afiafi, e mafai ona faaaogā a tatou faamaumauga e iloilo faatasi ma isi manatu tāua o le polokalame. Ua mātauina i tausaga ua mavae, o nisi talavou ua nonofo faatasi i le tauaofiaga ma faia ni talanoaga a o faagasolo le polokalame, po o le talanoa foʻi (text) i a latou telefoni feaveaʻi. Pe a iai ni a tatou fanau, e aofia ai ma talavou, e lelei pe a nonofo faatasi o se aiga, nai lo le tuu o i latou e nonofo ese faatasi ma isi talavou.
5. E faapefea ona faateleina lo tatou olioli i le tauaofiaga?
5 Olioli i Faatasitasiga: E tele atu le fiafia e maua i kuka manogi pe a taumamafa faatasi ma uō. (Faata. 15:17) E faapena foʻi ona faateleina lo tatou olioli i le tauaofiaga pe a faatasitasi ma o tatou uso ma tuafāfine. O lea la, a o mālōlō le polokalame, o se mea lelei pe a e tausolomua e faafeiloaʻi atu i isi ʻauusufono ma outou fiafia faatasi ai! (Sala. 133:1) Pe a valaaulia i tatou e le taʻitaʻifono ia nofoi loa i nofoa a o leʻi amata le musika, e tatau loa ona faauma talanoaga ae nonofo loa i nofoa, o le a amata le polokalame.
6. Faamatala mai se mea na tupu, e faaalia ai le auala tatou te ono molimau atu ai i vaipanoa o loo faia ai le tauaofiaga.
6 Mataala e Molimau Atu: E masani ona maua ni avanoa lelei e molimau atu ai i tauaofiaga. O le toʻatele o le ʻauusufono e ō i faleʻaiga pe a māeʻa le polokalame, e tele ina fesiligia e ʻaufaigaluega o faleʻaiga ma isi e faatatau i le matua o loo tusia i a latou pine. Na faapogaia ai ni talanoaga ma tuuina atu se molimau lelei e uiga i le upu moni. O nisi na fesili e uiga i le tauaofiaga sa valaaulia ma na mafai ona auai mai.
7. Aiseā e tatau ai ona tatou auai i le tauaofiaga itumalo o loo loma nei?
7 E faitau afe itula e faaalu i le saunia o le polokalame, suʻeina o nofoaga e faia ai tauaofiaga, faatulagaina o matagaluega o le tauaofiaga, ma le saunia o lauga. O galuega fitā uma e faaalu i le saunia o lenei faigaʻai faaleagaga, ua faaalia ai le tausiga faapelepele a Ieova mo ona tagata. Talosia ia tatou auai uma ma taumamafa i le tele o taumafa faaleagaga! A tatou faia faapea, ona tatou lē pei ai lea o le lalolagi, auā o le a tatou “alalaga . . . ona o le loto fiafia.”—Isa. 65:14.
[Pusa i le itulau 4]
Mea e Faamanatu mo le Tauaofiaga Itumalo
◼ Taimi o le Polokalame: E amata le polokalame i le 9:20 i le taeao i aso uma e tolu. O le a tatala faitotoʻa i le 8:00 i le taeao. Pe a tātā le musika e amata ai le polokalame, o le taimi lenā ua tatau ona tatou nonofo uma i o tatou nofoa ina ia aua neʻi toe faalavelave se tasi i le amataina o le polokalame i se tulaga mamalu. O le a faaiʻuina le polokalame o le Aso Faraile ma le Aso Toonai i le 4:55 i le afiafi, ae o le Aso Sa o le 4:00 i le afiafi.
◼ Taofia o Nofoa: E mafai ona taofi ni nofoa mo ē na outou faimalaga faatasi i le tou taavale, po o tagata o lo outou aiga o tou nonofo faatasi.
◼ Taumafataga i le Aoauli: Faamolemole ia aumai se taumafataga mo le aoauli nai lo le alu ese atu mai le nofoaga o le tauaofiaga e aumai se taumafataga i le taimi o le mālōlōga o le aoauli. E mafai ona faaaogā se tamaʻi cooler e mafai ona ofi i lalo o se nofoa. O cooler lapopoʻa, ipu mataʻetaʻe, ma le ʻava malosi e matuā lē faatagaina lava i le nofoaga e fai ai le tauaofiaga.
◼ Foaʻi: E mafai ona faaalia lo tatou talisapaia mo le tauaofiaga e ala i le faia o ni foaʻi tauofo, mo le galuega i le lalolagi aoao e ala i le tuuina i pusa i le Maota mo sauniga, po o le tauaofiaga.
◼ Faalavelave Tutupu ma Mea e Tutupu Faafuaseʻi: Pe a oso faafuaseʻi se maʻi i le taimi o le tauaofiaga, faamolemole faafesootaʻi se tautua o latalata ane, o ia e na te faafesootaʻia vave le Fesoasoani Muamua ina ia mafai ai e o tatou tagata ua iai le poto faapitoa ona iloiloina po o le ā le matuiā o le mea ua tupu ma saunia le fesoasoani talafeagai.
◼ Fagu Faamanogi: O le tele o tauaofiaga e faia i totonu o fale, ma e manaʻomia ai ni masini e faasau ai le ʻea i totonu. O lea la, ia faaalia lo tatou agalelei i le faaitiitia o le faaaogāina o fagu faamanogi ma isi mea faapena, lea e ono faalētonu ai le mānava a i latou e aafia gofie i mea faapena.—1 Kori. 10:24.
◼ O Pepa Follow Up: E tatau ona faaaogā pepa Please Follow Up (S-43) e tusia mai ai ni faamatalaga e faatatau i tagata na faaalia le naunau ona o se tasi na molimau lē fuafuaina i ai i le taimi o le tauaofiaga. E tatau i tagata talaʻi taʻitoʻatasi ona ave se pepa e tasi pe lua i le tauaofiaga. O pepa ua uma ona faatumu e mafai ona tuuina atu i le Potu Tusi, po o le tuuina atu i le failautusi o la outou faapotopotoga pe a e foʻi atu.—Tagaʻi i La Tatou Faiva o le Malo, o Fepuari 2005, itulau e 6.
◼ Laau Puʻeleo:E lē tatau ona sulu se uaea o so o se mea puʻeleo po o mea puʻeata i so o se palaka po o mea faaleotele leo o le fale, ma e ao ona faaaogā i se auala e lē faalavelave ai i isi.
◼ Puʻeina o Ata: Pe a puʻe ni au ata, e lē tatau ona emo se meapuʻeata a o faagasolo le polokalame.
◼ Telefoni Feaveaʻi: E tatau ona seti ina ia lē avea ma faalavelave a o faagasolo le polokalame.
◼ Faleʻaiga: Ia faamamaluina le suafa o Ieova e ala i a tatou amioga lelei i faleʻaiga.
◼ Le Nofoaga E te Āpi Ai: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.