Ia Faatalitali Pea iā Ieova

1. O le ā le matua o le tauaofiaga, ma aiseā ua fetaui lelei ai?

¹ Na tusi Isaia e faapea: “O Ieova, o le Atua e faamasino tonu ia; amuia i latou uma o ē faatalitali iā te ia.” (Isa. 30:18e) E tele faamaumauga o loo i le Tusi Paia i faamasinoga faaoosala a Ieova i ona fili, faapea ma le faasaoina o ana auauna faamaoni. O ā lesona e aʻoaʻoina mai e tagata tapuaʻi o Ieova i aso nei mai na mea na tutupu? O le ā e ao ona tatou faia nei e sauniuni ai mo “le aso tele ma le silisili o Ieova”? (Ioe. 2:31, 32) O la tatou Tauaofiaga Itumalo o loma nei, “Ua i Faitotoʻa le Faaolataga!” o le a uunaʻia ai i tatou e mafaufau loloto i fesili na, ma faia se iloiloga o le tagata lava ia. O le a fesoasoani ai iā i tatou e faatalitali pea iā Ieova.

2. E faapefea ona tatou faaalia lo tatou loto faafetai mo le tauaofiaga itumalo?

² Po ua fai ni au fuafuaga ina ia auai ma maua aogā mai aso uma e tolu o le tauaofiaga? Mo se faaaʻoaʻoga, po ua e talanoa atu i lou pule i le galuega e faatatau i sou taimi e te lē faigaluega ai ina ia auai i le tauaofiaga? E lē faigofie i taimi uma ona fai lenei mea, e aunoa ma se taumafaiga maumauaʻi e fai. Ia tatalo e faatatau i lenei mataupu ona fai lea o lau talosaga i le pule. (Nee. 2:4, 5) I se tulaga tutusa, e lē tatau foʻi ona tatou tolopōina le faia o fuafuaga e faatatau i le auala e tatou te malaga atu ai, o fea e api ai, ma isi mea e ao ona fai. O le faia o na fuafuaga lelei e faaalia ai lo tatou matuā loto faafetai mo le laoai faaleagaga a Ieova. E ao i toeaina ona mataala e fesoasoani atu iā i latou o loo manaʻomia se fesoasoani i a latou fuafuaga mo le tauaofiaga, aemaise lava i latou ua matutua i le faapotopotoga.—Kala. 6:10.

3. O ā uiga e ao ona faaalia e tagata o Ieova a o iai i le nuu o loo faia ai le tauaofiaga?

³ O Amioga Lelei e Viia ai le Atua: Pe a toʻatele i tatou e tauaofia i taimi o tauaofiaga, e avea a tatou amio ma molimau i le nuu o loo faia ai. O le ā la e manaʻomia ona tatou fai? Pe a tatou iai i faleʻaiga ma nisi o nofoaga o pisinisi i le nuu o loo fai ai le tauaofiaga, e ao ona lagona e i latou o loo tatou fesootaʻi atu i ai le fiafia i ō tatou uiga faa-Kerisiano e pei o le onosai, agamalu, ma le lē gaoiā. (Kala. 5:22, 23; Fili. 4:5) E tatau iā i tatou uma ona faaalia le ituaiga alofa lea e “lē amio matagā, e lē saʻilia e ia ana lava mea, e lē faaitaitagofie.” E tusa lava pe tulaʻi mai ni tulaga faigatā po o ni faafitauli, e tatou te mananaʻo e “faia mea uma lava ia viia ai le Atua.”—1 Kori. 10:31; 13:5.

4. E faapefea ona fesoasoani mātua i fanau ina ia amio i se auala e avatu ai le viiga mo Ieova?

⁴ Ina ua māeʻa se tasi o tauaofiaga, na matuā faafiafiaina se pule o se tasi o faletalimālō i amioga ma foliga vaaia a o tatou talavou, lea na ia faaali mai ai lona faanaunauga “e manaʻo pea e ō atu Molimau a Ieova e nonofo i lona faletalimālō.” Maʻeu se lagona fiafia ona o na tulaga! O nei upu e faaalia ai le toleniga ma le vaavaaiga lelei o loo faia e mātua. E lē o se gaoioiga atamai le tuu e mātua o a latou fanau e nonofo na o i latou i se potu o le faletalimālō, e aunoa ma le vaavaaia lelei. E tatau lava ona vaavaai lelei fanau i taimi uma. (Faata. 29:15) Tau ina ia avea amioga lelei a fanau e avatu ai le viiga iā Ieova, ma faafiafiaina ai lona finagalo!—Faata. 27:11.

5. E faapefea ona tatou faaalia le āva iā Ieova i o tatou laʻei ma teuga?

⁵ Laʻei ma Teuga Talafeagai: E tatou te taufai saosaolaumea uma lava mo le taʻuleleia o la tatou tauaofiaga, e ala i le ʻalofia o le faia o sikaili ma teuga ona o āʻega o loo iai, soona teu, lē onomea, po o le lē faia lelei foʻi o laʻei. E faatatau foʻi nei manatu pe a e faimalaga atu i le tauaofiaga, ma pe a toe foʻi mai le tauaofiaga, e faapena foʻi pe a fesoasoani i le tapenaga o le nofoaga e fai ai le tauaofiaga, ma le taimi o loo e auai i le polokalame o le tauaofiaga. Ona o i tatou o auauna a le Atua, o le mea e ao ona tatou manatu mamafa i ai o le suafa o Ieova ma le tulaga taʻuleleia, ae lē o mea e tatou te mananaʻo i ai ma logo lelei i o tatou faalogona. E paʻū i ulu o aiga le avega tauave o le faamautinoa o loo atagia mai i foliga vaaia o lona aiga le onomea ma ia faautauta i taimi uma.—1 Timo. 2:9.

6. Aiseā e ao ai pea ona tausia le mamalu o tatou foliga vaaia i taimi faasamasamanoa e pei lava o taimi e tatou te iai i le polokalame o le tauaofiaga?

⁶ E tāua tele foʻi le tausia o le mamalu o tatou foliga vaaia e oo lava i taimi faasamasamanoa i faleoloa ma faleʻaiga. E talafeagai foʻi ona fai o tatou laʻei e pei o ia e fai i le tauaofiaga pe a tatou taumamafa i se isi mea pe a uma le tauaofiaga. O le faia o a tatou pine fatafata e maua ai foʻi avanoa e avatu ai se molimau lē fuafuaina.—2 Kori. 6:3, 4.

7. E faapefea ona tatou saosaolaumea i le maopoopo ma le olioli o le tauaofiaga? (Tagaʻi i “Mea e Faamanatu mo le Tauaofiaga Itumalo.”)

⁷ Na valoia e Isaia: “E faatalitali Ieova ina ia alofa fua mai iā te outou; o le mea lea e tulaʻi ai o ia e alofa iā te outou.” (Isa. 30:18a) O le loto faafetai i le alofa fua ma le agalelei o Ieova e uunaʻia ai i tatou e āva iā te ia e ala i a tatou amio ma foliga vaaia a o tatou faatasitasi i a tatou tauaofiaga. Tau ina ia avea la tatou Tauaofiaga Itumalo “Ua i Faitotoʻa le Faaolataga!” ma mea e faamamaluina ai lo tatou Atua ma fesoasoani iā i tatou e faatalitali atu pea iā te ia!

[Pusa i le itulau 7]

Mea e Faamanatu mo le Tauaofiaga Itumalo

◼ Taimi o le Polokalame: E amata le polokalame i le 9:30 i le taeao i aso uma e tolu. O le a tatala faitotoʻa i le 8:00 i le taeao. I ni nai minute a o leʻi amata le polokalame, o le a alaala le taʻitaʻi fono i le pulelaa a o tātāina musika o le Malo e amata ai. E ao iā i tatou uma lava ona nofoi i o tatou nofoa i le taimi lenā, ina ia amata ai le polokalame i se tulaga mamalu. O le a faaiʻuina le polokalame o le Aso Faraile i le 5:15 i le afiafi, ma o le Aso Toonai o le 5:05 i le afiafi, ae o le Aso Sa o le 4:10 i le afiafi.

◼ Paka o Taavale: O nofoaga uma lava o le a faia ai tauaofiaga lea e tatou te pulea atoatoa mea e paka ai taavale, o le a maua lau paka e aunoa ma se totogi. O le a faaaogā pine fatafata o le Tauaofiaga e fai ma faailoga e maua ai sau paka.

◼ Taofia o Nofoa: E ono mafai ona taofia na o nofoa mo ē o loo outou faimalaga faatasi i le taavale, po o tagata o loo nonofo faatasi i le aiga.

◼ Taumafataga i le Aoauli: Faamolemole ia aumai se taumafataga mo le aoauli na i lo le alu ese atu mai le nofoaga o le tauaofiaga e aumai se taumafataga i le taimi o le mālōlōga o le aoauli. E mafai ona faaaogā se tamaʻi cooler e mafai ona ofi i lalo o se nofoa. O cooler lapopoʻa, ipu mataʻetaʻe, ma le ʻava malosi e matuā lē faatagaina lava i le nofoaga e fai ai le tauaofiaga.

◼ Foaʻi: E tele ni tupe e faaalu i le sauniunia o se tauaofiaga itumalo. E mafai ona faaalia lo tatou talisapaia e ala i le faia o ni foaʻi tauofo mo le galuega i le lalolagi aoao e ala i le tuuina i pusa i le Maota e fai ai sauniga, po o le tauaofiaga.

◼ Faalavelave Tutupu ma Mea e Tutupu Faafuaseʻi: Pe afai e iai se maʻi e oso faafuaseʻi, faamolemole ia faafesootaʻi se tagata tautua o latalata ane, o ia e na te logoina le vaega o le Auaunaga Muamua ina ia vaai i ai i latou o loo iai le agavaa i le matuiā o le tulaga, ma avatu i ai le fesoasoani. Vili le 911 pe a talafeagai ai.

◼ Laau Puʻeleo: E lē tatau ona sulu atu se uaea o so o se mea puʻeleo po o mea puʻeata i so o se palaka po o mea faaleotele leo o le fale, ma e ao ona faaaogā i se auala e lē faalavelave ai i isi.

◼ Puʻeina o Ata: Pe a puʻe ni au ata, e lē tatau ona emo se meapuʻeata a o faagasolo le polokalame.

◼ Telefoni Feaveaʻi: E tatau ona seti ina ia lē avea ma faalavelave a o faagasolo le polokalame.

◼ Le Nofoaga E te Āpi Ai: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.