Vivii iā Ieova i le Faapotopotoga Tele
1, 2. O le ā le avanoa ua aumaia e le tauaofiaga itumalo iā i tatou, ma o ā ni auala tatou faataunuuina ai lenei mea?
1 Ua saunia e a tatou tauaofiaga itumalo i tausaga taʻitasi se avanoa matalasi e vivii ai iā Ieova. Ua pei o tatou faalogona o Tavita lea na pese: “Ou te vivii atu iā te oe i le faapotopotoga tele, ma pese atu iā te oe i luma o le nuu e toʻatele.” (Sala. 35:18) I le Tauaofiaga Itumalo o loo lumanaʻi nei o le “Usiusitai i le Atua,” e faapefea ona tatou faamautinoa o loo tatou vivii atu ma le autasi iā Ieova?
2 O se tasi o auala e tatou te faia ai lenei mea, e ala i a tatou amio. Sa taʻua e se pulega o se tasi o nofoaga na fai ai se tasi o tauaofiaga e faapea: “E faavae i la outou tauaofiaga, ua matou taʻu atu ai i isi lotu e mananaʻo e totogi ae faaaogā le matou fale e ō mai e vaavaai i le auala o loo faatulaga ai e Molimau a Ieova se tauaofiaga, ona e atoatoa ona lelei a latou faatulagaga.” O o tatou foliga vaaia, lo tatou fegalegaleaʻi, ma a tatou amio, e tatou te tofu sao uma ai lava i le mauaina mai o ia faaupuga o viiga e faagaeetia ai, lea e tonu ona avatu i lo tatou Atua.—1 Pete. 2:12.
3, 4. E faapefea i le lotomaulalo ona fesoasoani iā i tatou ia laʻei ai i se auala e talafeagai ma se faifeʻau Kerisiano, e lē gata i le tauaofiaga ae faapea foʻi ma taimi e uma ai?
3 Ou Foliga Vaaia: Ina ia laʻei ma fai a tatou teuga i se auala e viia ai Ieova, e manaʻomia ai le lotomaulalo. (1 Timo. 2:9) Ua faapea mai le tusi Aʻoga o le Faiva, itulau e 132: “O le tagata e lotomaulalo e manatu mamafa i le aua neʻi faatigā ma le faalētatau i isi ma e lē faapogaia foʻi se uaʻi mai lē talafeagai iā te ia.” I le tele o atunuu, ua taatele ai laʻei e lē talafeagai. Ae peitaʻi, e tāua iā Ieova taumafaiga o loo tatou fai e faaatagia lelei atu ai o ia. (Galu. 15:14) E ui lava e ono faia le tauaofiaga i se nofoaga e fai ai ni taaloga po o se fale e fai ai ni faamalositino, ae o la tatou faatasiga o se “faapotopotoga tele” i aso e tolu o le tauaofiaga. O lea la, a o tatou potopoto i luma o le silafaga a Ieova, e ao ona tatou laʻei i se tulaga mamalu e talafeagai ma Lē silisili ona maualuga o le aoao o mea.—1 No. 29:11.
4 E manaʻomia foʻi ona tatou uaʻi atu i o tatou foliga vaaia pe a māeʻa le polokalame i aso taʻitasi. E ui lava e tatou te mananaʻo e fai ni laʻei e mālū i o tatou faalogona i taimi faasamasamanoa po le taimi e taumamafa ai i se faleʻaiga, ae e tāua tele lo tatou laʻei ma teu i se tulaga e talafeagai ma i “latou o ē amio Atua.” (1 Timo. 2:10) O laʻei e talafeagai e lē filifilia i laʻei o loo taatele i le lalolagi. (1 Ioa. 2:16, 17) O a tatou lomiga faa-Kerisiano, o loo aumaia ai ni ata lelei o laʻei talafeagai o tane ma fafine i tulaga eseese. O le faia o a tatou pine fatafata a o iai i aai o loo fai ai a tatou tauaofiaga o le a faamanatu mai ai, o i tatou o faifeʻau Kerisiano i taimi uma lava.—2 Kori. 6:3, 4.
5, 6. E faapefea ona tatou talisapaia le laoai faaleagaga a Ieova?
5 Ia Talisapaia le Laoai a Ieova: Ua laulauina se faigaʻai i o tatou luma e le Alii Silisili ese i le aoao o mea. (Isa. 25:6; 1 Kori. 10:21) Afai tatou te matuā faatāuaina lo tatou iai i le laoai faaleagaga a Ieova, o le a avea la ma o tatou sini le auai i aso uma e tolu o le tauaofiaga. Po ua e faatulaga mea e api ai, lou auala, ma ou aso mālōlō mai le galuega? Po ua e faatulaga ia lava se taimi e sauniuni ma malaga atu ai ina ia vave taunuu i le mea o loo fai ai le tauaofiaga ina ia maua ni nofoa, auaufaatasi ma uso, ma vivii faatasi ma i latou iā Ieova i le pese amata ma le tatalo?—Sala. 147:1.
6 O le talisapaia o le laoai a Ieova, o le a uunaʻia ai i tatou e uaʻi totoʻa atu i le polokalame ma ʻalofia le faia o talanoaga faasamasamanoa ma isi, aai, po o le savavali solo foʻi i avanoa ua faatulaga e savavali ai. Ua saunia e Ieova taumafa faaleagaga e tatou te manaʻomia i le taimi lenei e ala mai i le vasega o le auauna faamaoni ma le mafaufau. (Mata. 24:45) E lē tatau lava ona tatou misia so o se vaega o lenei polokalame. E tatau ona nonofo faatasi mātua ma a latou fanau ma fesoasoani iā i latou ina ia maua atoatoa aogā mai le polokalame.—Teu. 31:12.
7. O le ā o loo fautuaina i tatou e fai mo le taumafataga i le aoauli, ma aiseā?
7 E fautuaina le aumai o a tatou taumafataga mo le aoauli na i lo le alu ese atu mai le nofoaga o le tauaofiaga ina ia aumai ni meataumafa i le taimi o le mālōlōga i le aoauli. O se mea lelei na mātauina le mulimulitaʻia e le tele o sui usufono o lenei taʻiala i le tauaofiaga o le tausaga na teʻa nei. Maʻeu le lelei pe afai e toe faia foʻi e tagata uma i lenei tausaga! (Epe. 13:17) O lenei fuafuaga ua maua ai se avanoa lelei e olioli ai i aufaatasiga e ati aʻe ai ma o tatou uso ma maua ai se siʻomaga autasi ma le filemu lea e avatu ai le viiga iā Ieova.—Sala. 133:1.
8, 9. O ā ni avanoa faaopoopo e vivii ai iā Ieova e maua i le taimi o le tauaofiaga?
8 Molimau Atu Lē Fuafuaina: A o faimalaga atu ma toe foʻi mai i le tauaofiaga, e tele ni avanoa tatou te vivii ai iā Ieova i o tatou laugutu. (Epe. 13:15) Pe tatou te aai i se faleʻaiga po o le talanoa i se tagata faigaluega i se fale talimālō, ia tatou tulimataʻia avanoa e avatu ai se molimau. O le a faatumulia o tatou mafaufau ma loto i ʻoa faaleagaga mai le tauaofiaga itumalo. Ia tatou tufa atu nei mea lelei iā i latou tatou te feiloaʻi lē fuafuaina i ai.—1 Pete. 3:15.
9 E tatou te tulimataʻia lenei avanoa e faamamaluina ai Ieova “i totonu o faapotopotoga.” (Sala. 26:12) Seʻi o tatou autasi e vivii iā Ieova i le Tauaofiaga Itumalo “Usiusitai i le Atua.”
[Pusa i le itulau 4]
Mea e Faamanatu mo le Tauaofiaga Itumalo
◼ Taimi o le Polokalame: E amata le polokalame i le 9:30 i le taeao i aso uma e tolu. O le a tatala faitotoʻa i le 8:00 i le taeao. I ni nai minute a o leʻi amata le polokalame, o le a alaala le taʻitaʻi fono i le pulelaa a o tāina musika o le Malo e amata ai. E ao iā i tatou uma lava ona nofoia o tatou nofoa i le taimi lenā ina ia amata ai le polokalame i se tulaga mamalu. O le a faaiʻuina le polokalame i le 5:05 i le afiafi o le Aso Faraile ma le Aso Toonai, ae o le 4:10 i le afiafi o le Aso Sa.
◼ Paka o Taavale: O nofoaga uma lava o le a faia ai tauaofiaga lea e tatou te pulea atoatoa ai mea e paka ai taavale, o le a maua lau paka e aunoa ma se totogi mo tagata uma lava. Talu ai e tele lava ina lē lava paka mo taavale, e tatau lava ona taumafai e ave tagata e mafai ona ofi i le taavale, na i lo le toʻatasi po o le toʻalua tagata i le taavale e tasi.
◼ Taofia o Nofoa: E ao ona taofia na o nofoa o ē o loo outou faimalaga faatasi i le taavale po o tagata o loo nonofo faatasi i le aiga.
◼ Foaʻi: E tele ni tupe e faaalu i le sauniunia o se tauaofiaga itumalo. E mafai ona faaalia lo tatou talisapaia e ala i le faia o ni foaʻi tauofo mo le galuega i le lalolagi aoao, i le Maota o le Malo po o le tauaofiaga.
◼ Taumafataga i le Aoauli: Faamolemole ia aumai se taumafataga mo le aoauli na i lo le alu ese atu mai le nofoaga o le tauaofiaga ina ia aumai se taumafataga i le taimi o le mālōlōga o le aoauli. E ono mafai ona faaaogā se tamaʻi cooler e mafai ona ofi i lalo o se nofoa. O cooler lapopoʻa, ipu mataʻetaʻe, ma le ʻava malosi e matuā lē faatagaina lava i le nofoaga e fai ai le tauaofiaga.
◼ Laau Puʻeleo: E lē tatau ona sulu atu se uaea o so o se mea puʻeleo po o mea puʻeata i so o se palaka po o mea faaleotele leo o le fale, ma e ao ona faaaogā i se auala e lē faalavelave ai i isi.
◼ Puʻeina o Ata: Pe a puʻe ni au ata, e lē tatau ona emo se meapuʻeata a o faagasolo le polokalame.
◼ Uaealesi ma Telefoni Feaveaʻi: E tatau ona seti ina ia lē avea ma faalavelave a o faagasolo le polokalame.
◼ Faalavelave Tutupu ma Mea e Tutupu Faafuaseʻi: Pe afai e tupu se faalavelave faafuaseʻi i le mea o loo faia ai le tauaofiaga, faamolemole ia faafesootaʻi se tasi o le ʻautautua o loo latalata ane, o ia lea na te faafesootaʻia vave le ofisa o le Fesoasoani Muamua ina ia iloiloina e le vaega o le fesoasoani muamua le matuiā o le tulaga o iai ma faia loa se fesoasoani.
◼ Le Nofoaga E te Āpi Ai: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.