Ia Mulimuli iā Iesu Keriso i le Faaalia o le Faaaloalo
1. E faapefea ona fesootaʻi le matua o le tauaofiaga o le tausaga lenei i le faaalia o le faaaloalo?
1 Ua faamatala i le Tusi Paia Ieova le Pule Silisili Ese i le Aoao o mea, o loo ofu i le viiga po o le faaaloalo. (Sala. 104:1) Sa masani ona fetalai ma gaoioi Iesu i se auala na faamamaluina ai lona Tamā ma Ana faatulagaga. (Ioa. 17:4) O le a tatou maua avanoa e faaaʻoaʻo ai iā Iesu ma faamamaluina ai Ieova i le taimi o la tatou Tauaofiaga Itumalo o lumanaʻi nei, “Ia Mulimuli iā Iesu Keriso.”
2. E faapefea ona faamamaluina Ieova i lo tatou sauniuni e auai i vaega taʻitasi o le polokalame?
2 Tapuaʻiga Mamalu: E tatou te faamamaluina Ieova i le auai i le taumafataga faaleagaga lea ua ia saunia mo i tatou. Po ua e talanoa i lou pule o le galuega, ma faatulaga au mea e fai ina ia auai i aso uma o le tauaofiaga e aofia ai ma le Aso Faraile? Po ua e fuafua e taunuu i le taimi talafeagai ina ia suʻe sou ava ma iai i le pese ma le tatalo amata? Po ua faatulaga a outou taumafataga o le aoauli ina ia outou faiʻaiga faatasi ai ma o outou uso i le nofoaga o loo faia ai le tauaofiaga? I le amataga o vaega taʻitasi pe a valaaulia ma le māfana e le taʻitaʻifono i tatou e alala i lalo a o leʻi amata le musika, e ao ona vave faauma a tatou talanoaga o loo fai ae alala loa mo le amataina o le polokalame.
3. E faapefea ona faamamaluina la tatou tapuaʻiga i lo tatou uaʻi lelei atu i le polokalame?
3 O le uaʻi lelei i le polokalame e faamamaluina ai foʻi lo tatou Tamā o i le lagi. Ina ua uma ona mātauina e se alii e faia tala fou se tauaofiaga itumalo, na ia tusi e faapea, na maofa tagata na vaavaai ane i “amioga lelei a ē na auai, auā sa latou uaʻi atu ma le lē gāsē i mea faaleagaga.” Na ia taʻua foʻi “le anoanoaʻi o tamaiti . . . sa fifilemu uma ma pisi e suʻe mau o le Tusi Paia, o se mea e lē masani ai ni tamaiti.” A o faagasolo le polokalame, e lē o se taimi lea e fai ai ni talanoaga lē talafeagai, fai ai ni fetusiaʻiga i luga o telefoni feaveaʻi, aai, pe sāvalivali solo ai foʻi i avanoa ua faatulaga e savavali ai. E ao ona nonofo faatasi talavou ma o latou mātua, ina ia fesoasoani mātua iā i latou e maua aogā mai le polokalame. (Teu. 31:12; Faata. 29:15) O ia taumafaiga e faailoa ai le faaaloalo mo isi ma le talisapaia o taumafa aogā faaleagaga ua saunia.
4. Aiseā e ao ai ona mamalu o tatou foliga vaaia a o auai i le tauaofiaga?
4 Ia Mamalu Foliga Vaaia: Ua faaleo mai e le toʻatele le talisapaia o faamanatuga i le tauaofiaga itumalo o le tausaga ua teʻa, “Ia Faaalia Amioga Mamalu Faa-Kerisiano i Taimi Uma,” lea na faamatilatila ai le tatau i auauna a le Atua ona faaalia le mamalu faa-Kerisiano i laʻei ma teuga. E ao foʻi ona tatou uaʻi lelei atu i lea mataupu i lenei tausaga. O o tatou foliga vaaia e faaatagia atu ai o tatou lagona mo Ieova ma le faaeaga o le avea ma ana Molimau. E ao ona tatou laʻei i taimi uma o ni ē ‘taʻua o ē amio Atua.’—1 Timo. 2:9, 10.
5. E faapefea ona tausisia pea le mamalu o o tatou foliga vaaia i taimi o mālōlōga i le aai o loo faia ai le tauaofiaga?
5 Pe na o le taimi e auai ai i le polokalame e ao ai ona mamalu o tatou foliga vaaia? Ia manatua, e toʻatele o le a mātauina i tatou o loo laʻeiina pine fatafata, a o iai i le aai lea e faia ai le tauaofiaga. O o tatou foliga vaaia, e ao ona faaesea ai i tatou mai tagata lautele. E tusa lava la pe oo i taimi o mālōlōga e pei o le ō e fai taumafataga pe a māeʻa le polokalame, e ao lava ona tatou laʻei o ni faifeʻau o loo iai i lea vaipanoa ona o le auai i se tauaofiaga faa-Kerisiano. E lē tatau ona laʻeiina ni ofu e pei o ofu vae tanitelī, ofu vae pupuu, po o mitiafu. Maʻeu se molimau o le a avatu i le nuu! O le a fiafia Ieova pe a atagia atu i o tatou foliga vaaia la tatou matafaioi o ni faifeʻau.
6. O ā iʻuga fiafia o le faaalia o le mamalu faa-Kerisiano?
6 Iʻuga Fiafia: O le faaalia o le mamalu faa-Kerisiano i a tatou tauaofiaga, o le a maua ai ni avanoa e molimau lē fuafuaina atu ai, ma faafiafiaina ai ē o loo vaavaai mai. Ina ua māeʻa se tauaofiaga, na taʻua e se alii e faigaluega i le nofoaga na fai ai le tauaofiaga: “E matou te leʻi vaai muamua lava i ni tagata ua sili ona amio lelei. O a outou amioga, o amioga ia o loo faatalitalia e le Atua mai iā i tatou.” O le faaalia o le faaaloalo, e faailoa atu ai lo tatou alofa o le tasi i le isi, ma e viia ai Ieova. (1 Pete. 2:12) E faaalia ai lo tatou matataʻu i le Atua, ma le talisapaia o le faaeaga o le faatonuina e lo tatou Tamā. (Epe. 12:28) Tau ina ia tatou taumafai e faaalia le faaaloalo a o auai i le Tauaofiaga Itumalo o lenei tausaga, “Ia Mulimuli iā Iesu Keriso.”
[Pusa i le itulau 5]
Mea e Faamanatu mo le Tauaofiaga Itumalo
◼ Taimi o le Polokalame: E amata le polokalame i le 9.20 i le taeao i aso uma e tolu. O le a tatala faitotoʻa i le 8.00 i le taeao. Pe a amata ona tātā musika o le Malo e amata ai, e ao iā i tatou uma ona nofoi i nofoa ina ia amata ai le polokalame i se tulaga mamalu. O le a faaiʻu le polokalame o le Aso Faraile ma le Aso Toonaʻi i le 5.05 i le afiafi, ae o le Aso Sa i le 4.10 i le afiafi.
◼ Paka o Taavale: O nofoaga uma o le a faia ai tauaofiaga lea e tatou te pulea atoatoa mea e paka ai taavale, o le a maua lau paka e aunoa ma se totogi. O le a faaaogā pine fatafata o le tauaofiaga e fai ma faailoga e maua ai sau paka.
◼ Taofia o Nofoa: E ono mafai ona taofia na o nofoa mo ē o loo outou faimalaga faatasi i le taavale, po o tagata o loo nonofo faatasi i le aiga.
◼ Taumafataga i le Aoauli: Faamolemole ia aumai se taumafataga mo le aoauli, na i lo le alu ese atu mai le nofoaga o le tauaofiaga e aumai se taumafataga i le mālōlōga. E mafai ona faaaogā se tamaʻi cooler e ofi i lalo o lou nofoa. O cooler lapopoʻa, ipu mataʻetaʻe, ma le ʻava malosi e matuā lē faatagaina lava i le nofoaga e fai ai le tauaofiaga.
◼ Foaʻi: E tele ni tupe e faaalu i le saunia o se tauaofiaga itumalo. E faaalia lo tatou talisapaia i le faia o ni foaʻi tauofo mo le galuega i le lalolagi aoao, i le tuuina atu i pusa i le Maota mo Sauniga po o le tauaofiaga.
◼ Faalavelave Tutupu ma Mea e Tutupu Faafuaseʻi: Ua aumai le faaseā a le auaunaga o faalavelave faafuaseʻi ona o le tele o telefoni e vili atu i ni nai mea laiti e tutupu. Pe afai e iai se maʻi e oso faafuaseʻi, faamolemole ia faafesootaʻi se tagata tautua o latalata ane, o ia e na te logoina le vaega o le Auaunaga Muamua ina ia vaai i ai ē agavaa i le matuiā o le tulaga, ma fesoasoani i ai.
◼ Laau Puʻeleo: E lē tatau ona sulu atu se uaea o so o se mea puʻeleo po o mea puʻeata i so o se palaka po o mea faaleotele leo o le fale, ma e ao ona faaaogā i se auala e lē faalavelave ai i isi.
◼ Puʻeina o Ata: Pe a puʻe ni au ata, e lē tatau ona emo se meapuʻeata a o faagasolo le polokalame.
◼ Telefoni Feaveaʻi: E tatau ona seti ina ia lē avea ma faalavelave a o faagasolo le polokalame.
◼ Le Nofoaga E te Āpi Ai: (1) Ia talosaga mo se nofoaga e āpi ai a o leʻi taitai le taimi. (2) Ia fesoasoani i le sauniaina o taumafataga ma feʻau i le fale. (3) Ia ofo atu e te totogia nisi o tupe faaalu a o e nofo i inā. (4) Ia fai au lava fuafuaga i le faimalaga atu ma le toe foʻi mai, mai le nofoaga o le Tauaofiaga. (5) Ia faaali fua o le agaga paia i taimi uma.—Kala. 5:22, 23.
◼ Faletalimālō: (1) Aua neʻi taofia ni potu e sili atu na i lo potu e manaʻomia moni, ma ia aua neʻi sili atu ni tagata e nonofo i lou potu na i lo ē e faatagaina. (2) Pe afai ua lē manaʻomia le potu na e taofia, ia vave faafesootaʻi le faletalimālō. (3) Ave le tamaʻi taavale toso e felaʻuaʻi ai mea, na o le taimi lava e manaʻomia ai, ma toe faafoʻi vave ina ia mafai ona faaaogā e isi. (4) Aua neʻi fai ni kuka i potu e lē faatagaina ai. (5) Tuu se meaalofa tupe mo le tagata teufale i aso taʻitasi. (6) I le avea o ni Kerisiano, aua neʻi soona faaaogā ma le lē pulea taumafa mo le mālū taeao, pei o kofe po o aisa ua saunia ma le agalelei mo ē o loo nonofo i le faletalimālō. (7) Ia faaalia fua o le agaga pe a feutagaʻi ma tagata faigaluega o le faletalimālō i taimi uma. (8) O le totogi o le potu o loo faailoa atu i le Recommended Lodging List, o le totogi atoa lea mo le aso e tasi, e lē o aofia ai le lafoga. Afai e avatu se isi pili iā te oe e totogi se mea e te leʻi talosagaina pe faaaogāina, aua neʻi totogia, ma ia vave faailoa atu i le Matagaluega o Api o le tauaofiaga. (9) A iai se faafitauli e tulaʻi mai i lou potu i le faletalimālō, ia faamautinoa ua faailoa atu i le Matagaluega o Api a o e iai i le tauaofiaga.