Amioga e Viia ai le Atua

1. Aiseā e faigofie ai ona mātaulia Molimau a Ieova pe a auai i tauaofiaga itumalo?

¹ E masani ona faasalalau i tala fou a tatou tauaofiaga itumalo, ma e faigofie ona mātaulia e tagata i tatou pe a auai i na tauaofiaga. E tele ina tumutumu faletalimālō ma faleʻaiga i le ʻauusufono, ma e mātauina i tatou e tagata ona o a tatou pine fatafata. O loo taʻua i lenei mataupu nisi o faamanatu, e fesoasoani e tatou te faamamaluina ai le Atua i amioga lelei a o iai i na vaipanoa.—1 Pete. 2:12.

2. E faapefea ona viia le Atua i o tatou laʻei, a o iai i vaipanoa e faia ai tauaofiaga?

² Laʻei Onomea: E masani ona maofa tagata i le onomea o o tatou laʻei a o iai i tauaofiaga. Ae e sili atu ona latou maofa, pe a mātauina le auala e tatou te laʻei ai i isi nofoaga, e pei o faletalimālō, faleʻaiga, faleoloa, ma isi mea. E tatau la ona tatou laʻei pea i se auala onomea, mamalu, ma lē teuanoaʻi a o iai i na nofoaga, ina ia iloa ai e tagata le eseesega o i tatou ma ē e lē talitonu. (Roma 12:2) E tatau foʻi ona fai pea a tatou pine fatafata ina ia faalauiloa atu ai le tauaofiaga, maua ai avanoa e molimau atu ai lē fuafuaina, ma iloa ai i tatou e isi o le ʻauusufono.

3. E faapefea ona tatou faaalia le onosaʻi ma le faaaloalo?

³ Onosaʻi ma Faaaloalo: Ua tumu lenei lalolagi i ē lē lotofaafetai ma manatu faapito. (2 Timo. 3:1-5) O lea, e matuā faafiafiaina isi e pei o ē e faigaluega i faletalimālō ma faleʻaiga, pe a latou vaaia lo tatou onosaʻi ma le faaaloalo! Ia aua neʻi saʻili mo lo tatou lava lelei, pe a taofia nofoa pe faasolo foʻi i se laina e aumai ni mea fou na tatalaina i le tauaofiaga. (1 Kori. 10:23, 24) Na faapea mai se tamāloa e uiga i le tauaofiaga muamua na auai ai: “Ou te lē manatua se lauga mai i lenā aso, ae ou te manatua pea amioga lelei a Molimau.”

4. Aiseā e lelei ai ona mafaufau pe mafai ona e tauofo i le tauaofiaga?

⁴ Lotomalie e Tauofo: O le agaga tauofo, o se faailoga lea e iloa ai Kerisiano moni. (Sala. 110:3) Pe e te fia tauofo e fesoasoani i le tauaofiaga? I se tasi tauaofiaga, na tauofo uso ma tuafāfine e toʻa 600 ina ia faamamā le nofoaga sa faia ai. Na faapea mai le ʻaufaigaluega: “O se mea matuā uiga ese lea iā i matou. E faigatā ona talitonuina sa galulue tauofo uma nei tagata.” E tatou te tulimataʻia le tauaofiaga itumalo 2013, ma le avanoa e faalogo ai ma aʻoaʻoina e Ieova, ma faamamaluina ai o ia.

[Pusa i le itulau 9]

Mea e Faamanatu mo le Tauaofiaga Itumalo 2013

◼ Taimi o le Polokalame: O le a tatala faitotoʻa i le 8.00 i le taeao. O le a tāina musika amata i le 9.20 i le taeao i aso uma e tolu. O le taimi lenā ua tatau ona alaala uma i nofoa ina ia amata ai le polokalame i se tulaga mamalu. E amata le pese ma le tatalo faaiʻu i le Aso Faraile ma le Aso Toonaʻi i le 4:50 i le afiafi, a o le Aso Sa i le 3:35 i le afiafi.

◼ Paka mo Taavale: I nofoaga uma o le a faia ai tauaofiaga ia e tatou te pulea foʻi ma vaega e paka ai taavale, o le a maua e le ʻauusufono se paka e aunoa ma se totogi, ma e fuafua lava avanoa i tagata e muamua mai. Talu ai e masani ona utiuti avanoa mo paka, afai e mafai, o se mea lelei le taumafai e malaga faatasi uma mai i se taavale e tasi, nai lo o le tofu o le tagata ma le taavale e malaga mai ai.

◼ Taofia o Nofoa: E tatau ona taofi ni nofoa mo na o tagata o lou aiga, po o ē na outou malaga faatasi mai, po o au suʻesuʻega faale-Tusi Paia. Pe afai e iai ni nofoa faapitoa mo tagata matutua ma ē lē atoatoa le malosi, faamolemole ia faaavanoa na nofoa mo i latou na, ma ē e fesoasoani iā i latou.—1 Kori. 13:5.

◼ Taumafataga i le Aoauli: Faamolemole aumai se taumafataga mo le aoauli, nai lo o le tuua o le nofoaga e fai ai le tauaofiaga, ae alu ese atu e faatau mai se taumafataga. E mafai ona faaaogā se tamaʻi cooler e ofi i lalo o nofoa. O cooler lapopoʻa ma ipu mataʻetaʻe, e lē faatagaina i totonu o le maota e fai ai le tauaofiaga.

◼ Foaʻi: E faaalia lo tatou talisapaia o le tauaofiaga i le faia o ni foaʻi tauofo mo le galuega i le lalolagi aoao, i le taimi o le tauaofiaga. O so o se siaki e tatau ona totogi atu i le “Tauaofiaga Itumalo a Molimau a Ieova.” E taliaina foʻi foaʻi e faia i debit/credit cards.

◼ Fualaau: Pe afai e te manaʻomia ni fualaau, faamolemole ia faamautinoa o loo e sau ma aumai ni au fualaau, talu ai e lē maua ni fualaau i le tauaofiaga.

◼ Seevae: E toʻatele i latou e manunuʻa i tausaga taʻitasi ona e māfua mai i seevae. E sili atu ona lelei le faaaogā o ni seevae talafeagai ma fetaui lelei, ina ia saogalemu ai pe a savavali i auala simā, fasitepu, ma ni vaega o le auala e ufiufi i ni mea valavala, ma isi mea faapena.

◼ Taavale Pepe ma Nofoa Faamoe: E lē tatau ona avatu i totonu o le nofoaga o le tauaofiaga ia taavale pepe po o nofoa faamoe. Ae e faataga nofoa faapitoa mo le saogalemu o se tamaitiiti, pe afai e mafai ona fusi i se nofoa i autafa o ona mātua.

◼ Fagu Faamanogi: O le tele o tauaofiaga e faia i fale e iai masini e faasau ai le ʻea i totonu. O lea, ia faaalia le agalelei i le faaitiitia o le faaaogāina o fagu faamanogi ma mea faapena, ia e ono faalētonu ai le mānava a ē e aafia gofie i mea faapena.—1 Kori. 10:24.

◼ O Pepa Follow Up: E ao ona faaaogā pepa Please Follow Up (S-43), e tusia mai ai ni faamatalaga e faatatau i se tagata na faaalia le fiafia, ona o le molimau lē fuafuaina i ai i le taimi o le tauaofiaga. O pepa ua uma ona faatumu, e mafai ona tuuina atu i le Potu Tusi, pe tuu atu i le failautusi o la outou faapotopotoga pe a e toe foʻi atu.

◼ Faleʻaiga: Ia faamamaluina le suafa o Ieova i a tatou amioga lelei i faleʻaiga. Ia laʻei i se auala e talafeagai ma se Kerisiano.

◼ Faletalimālō ma Nofoaga e Api Ai:

(1) Faamolemole aua le taofia ni potu e sili atu nai lo o potu e te manaʻomia, ma aua neʻi sili atu tagata e nonofo i lou potu nai lo o le aofaʻi e faatagaina.

(2) Aua neʻi toe faalēaogāina potu na e talosagaina, seʻi vaganā o se tulaga lē maʻalofia, ma ia faafesootaʻi le faletalimālō i le vave e mafai ai, ina ia mafai ona faaaogā e isi le potu. (Mata. 5:37) Pe afai e faalēaogāina, ia faamautinoa e te malamalama i āiāiga a le faletalimālō mo potu e faalēaogāina, ma maua se numera e faamaonia ai.

(3) Ia faaaogā se taavale e toso ai atopaʻu pe afai ua e sauni e faaaogā, ma ia vave ona toe faafoʻi ina ia mafai ona faaaogā e isi.

(4) Ia kuka meaʻai i na o potu e faatagaina ona kuka ai.

(5) Aua le faaaogāsesēina mālū o le taeao, kofe po o aisa e maua fua, ia ua saunia e faaaogā e i latou o loo nonofo i le faletalimālō.

 (6) Ia faaalia i taimi uma le fua o le agaga, i le auala e feutagaʻi ai ma le ʻaufaigaluega o le faletalimālō. E toʻatele mālō o loo latou vaavaaia ma e latou te talisapaia lo tatou agalelei, onosaʻi ma le magafagafa.

 (7) E tatau i mātua ona vaavaai lelei a latou fanau i taimi uma a o iai i le faletalimālō, e aofia ai le vaega o loo iai le vai tāʻele, le potu faatalitali, vaega e fai ai faamalositino, ma isi mea.

(8) Pe a tulaʻi mai se faafitauli i le potu na e talosagaina i le faletalimālō, ia faafesootaʻi le Matagaluega o Api a o iai i le tauaofiaga, ina ia fesoasoani atu iā te oe.

◼ Auaunaga Tauofo: So o se tasi e fia tauofo, ia lipoti atu i le Matagaluega o le Auaunaga o Ē Tauofo i le tauaofiaga. E mafai foʻi ona fai se sao o tamaiti e i lalo ifo o le 16 tausaga, e ala i le galulue faatasi ma mātua po o se tasi e vaaia i latou, po o se isi e faamaonia e mātua po o lē e vaaia i latou.