Mea e Faamanatu mo le Tauaofiaga
Taimi o le Polokalame: O le a tatala faitotoʻa o le nofoaga e fai ai le tauaofiaga i le 8.00 i le taeao. O le a tāina musika amata i le 9:20 i le taeao i aso uma e tolu. O le taimi lenā ua tatau ona alaala uma i nofoa ina ia amata ai le polokalame i se tulaga mamalu. E māeʻa le polokalame i le Aso Faraile ma le Aso Toonaʻi i le pe tusa o le 5:00 i le afiafi, a o le Aso Sa i le pe tusa o le 4:00 i le afiafi.
ʻFaaneenee Atu iā Ieova i Pese’: Na viiviia Ieova e ona tagata anamua e ala i pese, ma o loo avea pea musika ma vaega tāua o le tapuaʻiga moni i aso nei. (Sala. 28:7) E amata vaega taʻitasi o le tauaofiaga itumalo i musika. E lē o ni musika e tau ina tātā, ae ua saunia ina ia tatou aʻoaʻoina e faatatau iā Ieova ma tapuaʻi atu iā te ia. O lea, pe a faailoa mai e le taʻitaʻifono o le a tāina mai le musika, o le taimi loa lenā e nofo ai i lalo ma faalogologo atu ma le talisapaia i musika, nai lo o le talanoa. O le faia faapea e faailoa atu ai lo tatou talisapaia o taumafaiga a sui o le fāʻili a le Olomatamata. E faalua i le tausaga ona totogi e na uso ma tuafāfine o latou lava pasese e malaga atu ai i Patterson i Niu Ioka, ina ia saunia ni musika matagofie e tatou te fiafia i ai. Pe a māeʻa ona tatou faalogologo atu i musika amata, e tatau i tagata uma ona usu pese o le Malo ina ia viia ai Ieova.
Paka mo Taavale: I nofoaga uma o le a faia ai tauaofiaga ia e tatou te pulea foʻi ma vaega e paka ai taavale, o le a maua e le ʻauusufono se paka e aunoa ma se totogi, ma e fuafua lava avanoa i tagata e muamua mai. Talu ai e masani ona utiuti avanoa mo paka, afai e mafai, o se mea lelei le taumafai e malaga faatasi uma mai i se taavale e tasi, nai lo o le tofu o le tagata ma le taavale e malaga mai ai.
Taofia o Nofoa: Pe a tatala faitotoʻa o le nofoaga o le a faia ai le tauaofiaga i taeao taʻitasi, faamolemole ia ʻalofia le faatopetope atu e taofi nofoa e te manaʻo i ai, e pei o loo lua tauvā ma le isi uso po o le isi tuafafine. O le agaga faataulaga e uunaʻia ai i tatou ina ia faamuamua le lelei o isi, ma o le a mātaulia ai i tatou o ni Kerisiano moni, ma uunaʻia ai isi ina ia vivii atu i le Atua. (Ioa. 13:34, 35; 1 Kori. 13:5; 1 Pete. 2:12) E tatau ona taofi ni nofoa mo na o tagata o lou aiga, po o ē na outou malaga faatasi mai, po o au suʻesuʻega faale-Tusi Paia. Faamolemole aua le tuuina ni mea i luga o nofoa e te lē o taofia. O lou utagia o nei fautuaga o le a iloa atu ai e isi o loo avanoa na nofoa. Ua saunia foʻi nisi o nofoa mo ē ua matutua le soifua ma ē e lē atoatoa le malosi. Talu ai e lē tele nei nofoa, e na o le toʻatasi la pe e toʻalua i laʻua o le a faataga ona nonofo i inā e fesoasoani i sē ua matua le soifua pe e lē atoatoa foʻi le malosi.
Laʻei Onomea: E tatau ona onomea ma talafeagai o tatou laʻei i taimi o le tauaofiaga, ae e lē tatau ona atagia mai ai āʻega a le lalolagi. (1 Timo. 2:9) Ia ʻalofia le teuanoaʻi po o le faatamala i o tatou laʻei ma foliga vaaia. E tatau ona onomea o tatou laʻei i taimi uma e tusa pe tatou te ō e tafafao. O le faia faapea o le a tatou lē faatalatū ai e faia a tatou pine fatafata, ma avatu se molimau pe a maua se avanoa. O a tatou teuga ma amioga lelei i taimi o tauaofiaga, o le a tosina mai ai tagata lotofaamaoni i le feʻau faasaoola o loo i le Tusi Paia, ma o le a faafiafiaina ai Ieova.—Sefa. 3:17.
Faaaogā ma le Magafagafa Masini Faaonapōnei: E faaalia lo tatou magafagafa a o faagasolo le polokalame, i le seti o a tatou masini faaonapōnei i se tulaga e lē faalavelave ai i isi. Pe afai e faaaogā se mea puʻeata, tablet, ma isi masini faapena, ia tatou magafagafa i le auala e faaaogā ai ina neʻi faalavelave pe punitia ai le maimoa a isi. E faaalia foʻi lo tatou magafagafa i le lē faia o ni text po o imeli a o faagasolo le polokalame.
Taumafataga o le Aoauli: Faamolemole aumai se taumafataga mo le aoauli, nai lo o le tuua o le nofoaga e fai ai le tauaofiaga, ae alu ese atu e faatau mai se taumafataga. E mafai ona faaaogā se tamaʻi cooler e ofi i lalo o nofoa. O cooler lapopoʻa ma ipu mataʻetaʻe, e lē faatagaina i totonu o le maota e fai ai le tauaofiaga.
Foaʻi: E faaalia lo tatou talisapaia o le tauaofiaga i le faia o ni foaʻi tauofo mo le galuega i le lalolagi aoao, i le taimi o le tauaofiaga. O so o se siaki e tatau ona totogi atu i le “Tauaofiaga Itumalo a Molimau a Ieova.” E taliaina foʻi foaʻi e faia i debit/credit cards.
Fualaau: Pe afai e te manaʻomia ni fualaau, faamolemole ia faamautinoa o loo e sau ma aumai ni au fualaau, talu ai e lē maua ni fualaau i le tauaofiaga. Pe afai e te faaaogāina ni tui, faamolemole ia faamautinoa ua tiaʻi na tui ina ia ʻalofia ai le faamanuʻalia o se tasi, ma ia aua neʻi tiaʻiina i se faletalimālō o e faamautū ai.
Seevae: Faamolemole, ia ʻalofia tulaga e te ono see pe e te sulu ai foʻi. E toʻatele i latou e manunuʻa i tausaga taʻitasi ona e māfua mai i seevae. E sili atu ona lelei le faaaogā o ni seevae talafeagai ma fetaui lelei, ina ia saogalemu ai pe a savavali i auala simā, fasitepu, ma ni vaega o le auala e ufiufi i ni mea valavala, ma isi mea faapena.
Taavale Pepe ma Nofoa Faamoe: E lē tatau ona avatu i totonu o le nofoaga o le tauaofiaga ia taavale pepe po o nofoa faamoe. Ae e faataga nofoa faapitoa mo le saogalemu o se tamaitiiti, pe afai e mafai ona fusi i se nofoa i autafa o ona mātua.
Fagu Faamanogi: O le tele o tauaofiaga e faia i fale e iai masini e faasau ai le ʻea i totonu. O lea, ia faaalia le agalelei i le faaitiitia o le faaaogāina o fagu faamanogi ma mea faapena, ia e ono faalētonu ai le mānava a ē e aafia gofie i mea faapena.—1 Kori. 10:24.
Faleʻaiga: Ia faamamaluina le suafa o Ieova i a tatou amioga lelei i faleʻaiga. Ia laʻei i se auala e talafeagai ma se Kerisiano.
Faletalimālō ma Nofoaga e Api Ai:
Faamolemole aua le taofia ni potu e sili atu nai lo o potu e te manaʻomia, ma aua neʻi sili atu tagata e nonofo i lou potu nai lo o le aofaʻi e faatagaina.
Aua neʻi toe faalēaogāina potu na e talosagaina, seʻi vaganā o se tulaga lē maʻalofia, ma ia faafesootaʻi le faletalimālō i le vave e mafai ai, ina ia mafai ona faaaogā e isi le potu. (Mata. 5:37) Pe afai e faalēaogāina, ia faamautinoa e te malamalama i āiāiga a le faletalimālō mo potu e faalēaogāina, ma maua se numera e faamaonia ai.
Ia faaaogā se taavale e toso ai atopaʻu pe afai ua e sauni e faaaogā, ma ia vave ona toe faafoʻi ina ia mafai ona faaaogā e isi.
Ia kuka meaʻai i na o potu e faatagaina ona kuka ai.
Aua le faaaogāsesēina le mālū taeao, kofe po o ʻaisa e maua fua, ia ua saunia e faaaogā e i latou o loo nonofo i le faletalimālō.
Ia faaalia i taimi uma le fua o le agaga, i le auala e feutagaʻi ai ma le ʻaufaigaluega o le faletalimālō. E toʻatele mālō o loo latou vaavaaia ma e latou te talisapaia lo tatou agalelei, onosaʻi ma le magafagafa.
E tatau i mātua ona vaavaai lelei a latou fanau i taimi uma a o iai i le faletalimālō, e aofia ai le vaega o loo iai le vai tāʻele, le potu faatalitali, vaega e fai ai faamalositino, ma isi mea.
Pe a tulaʻi mai se faafitauli i le potu na e talosagaina i le faletalimālō, ia faafesootaʻi le Matagaluega o Api a o iai i le tauaofiaga, ina ia fesoasoani atu iā te oe.
Auaunaga Tauofo: E ao i so o se tasi e fia tauofo ona faafesootaʻi le Matagaluega o le Auaunaga o Ē Tauofo i le tauaofiaga. E mafai foʻi ona fai se sao o tamaiti e i lalo ifo o le 16 tausaga, e ala i le galulue faatasi ma mātua po o se tasi e vaaia i latou, po o se isi e faamaonia e mātua po o lē e vaaia i latou.