O Ai o le a Fiafia i Lenei Mataupu?
1. O le ā e tatau ona mafaufau i ai a o faitau i Le Olomatamata ma le Ala Mai!, ma aiseā?
1 A o tatou faitau i mataupu taʻitasi o Le Olomatamata ma le Ala Mai!, e lelei ona mafaufau po o ai o le a fiafia patino i na mataupu. Aiseā? Auā ua saunia nei mekasini mo so o se tagata i le lalolagi aoao, ma o loo iai ni mataupu eseese.
2. O ā ni mataupu o loo i a tatou mekasini e ono fiafia patino i ai nisi o tagata?
2 Po o taʻua i Le Olomatamata o le masina lenei se mataupu mai i le Tusi Paia, na lua talanoa ai ma se tasi e te lua faigaluega? Pe e iai se mataupu e uiga i olaga faaleaiga e aogā i sou tauaiga? Po o iai sau uō o fuafua e faimalaga atu i se atunuu o loo taʻua i le Ala Mai!? Pe e fetaui se tasi o mekasini i se pisinisi po o se ofisa o le malo o loo i la outou oganuu? O se faataʻitaʻiga, e ono fiafia nisi o loo i se nofoaga e tausia ai tagata matutua, i se mekasini o loo talanoa i tulaga faigatā e fesagaʻia e tagata matutua. E ono fiafia foʻi ofisa o loo faamalosia le tausia o tulafono, i se mekasini o loo faatatau i soligatulafono.
3. Faamatala se mea na tupu e iloa ai le tāua o le ofo atu o se mekasini patino iā i latou e ono fiafia i ai.
3 Iʻuga: Ina ua maua e se ulugalii i Aferika i Saute le Ala Mai! o Ianuari-Mati 2012, e faamatuaina “Tausia Aʻe Fanau ia Lē Manatu Faapito,” ona la vili loa lea i ni aʻoga e 25 i la latou oganuu. O le 22 o na vaega na taliaina le mekasini ma tufa atu i tamaiti. Na faia foʻi faapena e se isi ulugalii i lenā lava atunuu i aʻoga o la latou oganuu. Na faaaogā e faiaʻoga o se tasi o aʻoga le mekasini i a latou fono ma lesona i vaiaso taʻitasi. Na faamatala atu e le ulugalii i se ovasia matagaluega lenei mea na tupu, ona ia faalaeiau loa lea o faapotopotoga ina ia talaʻi i aʻoga i a latou oganuu. Na maua e le ofisa o le lālā le tele o talosaga mo nisi kopi o lenei mekasini, ma iʻu ai ina toe lomia le mekasini.
4. Aiseā e tatou te mananaʻo ai e ofo atu mekasini i tagata uma?
4 O loo talanoaina i a tatou mekasini le māfuaaga moni o mea o loo tutupu i aso nei, ma faauaʻi atu tagata i le Tusi Paia ma le Malo o le Atua. E na o le pau ia o mekasini o loo “folafolaina atu le faaolataga.” (Isa. 52:7) O lea, e tatou te mananaʻo ai e ofo atu mekasini i tagata uma. E tāua tele la ona fesili ifo, ʻO ai o le a fiafia i lenei mataupu?’