Alāmekasini—Aogā mo le Amataina o Suʻesuʻega Faale-Tusi Paia
1. Aiseā ua faalaeiauina ai e le faalapotopotoga a Ieova tagata talaʻi ina ia faia se alāmekasini?
1 O le toʻatele o tagata e lē mananaʻo e suʻesuʻe le Tusi Paia ma i tatou, ae e fiafia e faitau a tatou mekasini. O le māfuaaga lea, ua tele tausaga o faalaeiauina e le faalapotopotoga a Ieova tagata talaʻi, ina ia faia se alāmekasini. Pe a fai ma masani a tagata le faitau i a tatou lomiga, o le a latou atiaʻe ai se faanaunauga mo le Afioga a le Atua. (1 Pete. 2:2) Atonu e iai se taimi o le a latou faitau ai i se manatu e latou te fiafia i ai, ma latou taliaina ai se suʻesuʻega faale-Tusi Paia.
2. E faapefea ona tatou atiaʻe le naunau o a tatou alāmekasini?
2 “Faasūsū” Fatu o le Upu Moni: Nai lo o le tau ina tuu o mekasini, taumafai e amata se talanoaga ma lē e ona le fale ma atiaʻe se faiā ma ia. O le faia faapea, o le a e malamalama ai i lona tulaga, mea e fiafia i ai, ma ona talitonuga, ma mafai ai ona e tautala atu ma le tofā mamao. (Faata. 16:23) Ia sauniuni lelei mo le faia o toe asiga. Pe a talafeagai, ia faamatala puupuu se manatu ma se mau mai le mekasini, ina ia faasūsū ai fatu o le upu moni i lona loto. (1 Kori. 3:6) Tusi i lalo aso na asia ai lenā tagata, le lomiga na tuuina, faapea le mataupu ma mau na talanoaina ai.
3. E faafia ona tatou toe foʻi e asia le alāmekasini?
3 E Faafia Ona Tatou Toe Foʻi e Asia le Alāmekasini? E ao ona faatasi i le masina ona asia ma ave i ai mekasini fou. Peitaʻi, o nisi taimi e sili atu i le faatasi ona asia le tagata e fua i lona tulaga faapea lou tulaga. O se faataʻitaʻiga, pe a mavae se vaiaso talu ona tuu mekasini, e mafai ona e toe foʻi e asia lenā tagata ma faapea atu, “Ua ou toe asiasi mai e faamatala puupuu atu se manatu o loo iai i le mekasini na ou tuuina iā te oe.” O le faia faapea, o le a faaosofia ai le naunau o le tagata e faitau se mataupu patino. Pe afai ua māeʻa ona ia faitauina, e mafai ona e fesili i ai po o le ā sona manatu e faatatau i le mataupu, ma talatalanoa puupuu e faatatau i lenā mataupu. Pe afai foʻi e fiafia le tagata e faitau a tatou lomiga, e mafai ona e toe foʻi e asia o ia ma faaali i ai le ofo o le masina.
4. O le ā e mafai ona tatou faia mai lea taimi i lea taimi, ina ia iloa ai pe manaʻo le tagata e suʻesuʻeina le Tusi Paia?
4 Aua le faatali seʻi fesili mai le tagata e ona le fale mo se suʻesuʻega, ae ia e tausolomua e fesili atu. E tusa pe e leʻi manaʻo le tagata e ona le fale e faia se suʻesuʻega i le taimi ua teʻa, ae taumafai pea e faamatilatila le mataupu “Taliina Fesili Faale-Tusi Paia” o loo i Le Olomatamata, ma vaai pe manaʻo le tagata e talatalanoa atili i ai. Atonu foʻi e mafai ona e amataina se suʻesuʻega puupuu faale-Tusi Paia. Peitaʻi, pe a lē mafai ona amata se suʻesuʻega, e mafai ona faaauau pea ona e ave i ai mekasini, ina ia atiaʻe ai lona naunau fiafia.