Faaleleia o o Tatou Tomai i le Faiva—Amataina o se Alāmekasini

Māfuaaga e Tāua Ai: O le toʻatele o tagata e fiafia e faitau a tatou mekasini, e lē mananaʻo e suʻesuʻe le Tusi Paia ma i tatou. Atonu e fiafia i a latou lava lotu, pe manatu e leai so latou taimi e suʻesuʻe ai. Peitaʻi, a o faitau i a tatou mekasini, e ono amata ona latou fiafia i le Afioga a le Atua. (1 Pete. 2:2) E ono iai se mataupu patino e pāʻia ai o latou loto, pe suia foʻi le tulaga o mea i o latou olaga. O le faia o ni asiasiga pupuu e lē aunoa, o le a latou māfana mai ai iā i tatou, ma tatou iloa ai mea o loo latou fiafia pe popole ai, ma mulimuli ane amata ai se suʻesuʻega faale-Tusi Paia.

Le Auala e Fai Ai:

Ia faatulaga se taimi i masina taʻitasi e ave ai i le tagata kopi fou o Le Olomatamata ma le Ala Mai! Atonu e mafai ona e asiasi i ai i isi taimi o le masina, ina ia faatupu atili lona fiafia e faitau se mataupu o loo i mekasini na tuu i ai, ma ave iai le lomiga o loo ofo i lenā masina. Ia iai ni au faamaumauga lelei.—Tagaʻi i La Tatou Faiva o le Malo o Ianuari 2014, itu. 3.
Ia sauniuni mo asiasiga taʻitasi. Nai lo o le tau ina alu e tuu mekasini, ia talanoa i lau alāmekasini ma taumafai e atiaʻe se faauōga ma ia, ina ia atiaʻe ai lona fiafia.
Ia mataalia i avanoa e amata ai se suʻesuʻega. Pe afai e fesili mai sau alāmekasini po o le ā le manatu o le Tusi Paia e faatatau i se mataupu patino, ia tuu i ai se lomiga mo suʻesuʻega o loo maua ai le tali o lana fesili, ma ia lua talanoaina faatasi lenā mataupu. A o e leʻi tuumuli ese, ia lāgā se isi fesili e fesootaʻi i lenā mataupu, ma lua talanoaina i le isi au asiasiga e sosoo ai. Pe afai e fai ni a oulua talanoaga pupuu i taimi uma e faaaogā ai le Tusi Paia po o se lomiga mo suʻesuʻega, o lenā o loo e faia se suʻesuʻega faale-Tusi Paia. Po ua e tuuina i le tagata le polosiua Tala Lelei ma faataʻitaʻi se suʻesuʻega faale-Tusi Paia? Po ua e faaali atu iā te ia vitiō Aiseā e Suʻesuʻe ai le Tusi Paia? ma O le ā e Faia i se Suʻesuʻega Faale-Tusi Paia? E tusa pe e leʻi manaʻo le tagata e fai se suʻesuʻega i le taimi ua teʻa, ae e iai le taimi e suia ai le tulaga o mea. O lea, e lelei ona e toe taumafai atili.

Faataʻitaʻi a o Faagasolo le Masina:

Ia tusi i lalo igoa o i latou e mafai ona avea ma alāmekasini. Ofo i ai kopi fou o mekasini, ma fai i ai o le a e alu atu e avatu isi lomiga o loo sosoo mai mo ia.