Suia le Auala ua Toe Tusia ai Sāvali Fou!
1. O ā meafaigaluega mo le talaʻiga ua toe suia?
1 E lima sāvali fou na tatalaina i le tauaofiaga itumalo na faamatuaina “O Lau Afioga o le Upu Moni Lea” i le tausaga e 2013. Ua faaopoopo atu i na sāvali le Tala o le Malo Nu. 38 ua faaulutalaina “Pe Mafai Ona Toe Feola Mai Ē ua Maliliu?” ma ua atoa ai le ono o sāvali ua suia le auala ua toe tusia ai. Aiseā ua toe suia ai nei sāvali? E faapefea ona tatou faaaogā nei sāvali i le talaʻiga?
2. O le ā le māfuaaga ua toe tusia ai nei sāvali?
2 Māfuaaga ua Suia Ai: E fā vala e aofia i se taulimaga uigā pe a talaʻi mai lea fale i lea fale: (1) Fai se fesili faatupu manatu e amata ai le talanoaga. (2) Faitau se mau mai le Tusi Paia. (3) Ofo le lomiga i le tagata e ona le fale e faitau ai. (4) Pe a māeʻa le talanoaga, faatū se isi fesili e toe foʻi mai i se isi taimi ma sosoo ai le talanoaga. O le auala ua toe tusia ai nei sāvali ua faigofie ai ona tatou mulimuli i na vala e fā.
3. E faapefea ona ofo nei sāvali fou i le galuega talaʻi?
3 Le Auala e Faaaogā Ai: (1) Pe a māeʻa ona faafeiloaʻi le tagata, ona fesili lea i ai i le fesili o loo i luma o le sāvali ma faatali mo sona manatu e tusa ai o tali o loo iai. (2) Tatala le sāvali ma talanoa le “Manatu o le Tusi Paia.” Pe afai e talafeagai, e lelei pe a faitau saʻo mai le mau mai i le Tusi Paia. Pe a fiafia pea le tagata e talanoa, ona iloilo lea o le vaega “Aogā E te Maua Mai Ai.” (3) Ofo le sāvali ma faalaeiau le tagata e faitau atoa i ai. (4) A o leʻi tuua le tagata, faaali atu i ai le fesili o loo i le pito i tua i lalo o le ulutala “Ia Mafaufau i Ai,” ma fai se fuafuaga e toe foʻi atu e talanoa ai i se isi taimi.
4. E faapefea ona e faaaogā sāvali fou e faia ai se toe asiga?
4 E faigofie foʻi ona faaaogā nei sāvali e amata ai se toe asiga. E mafai ona e faaaogā mau o loo i le pito i tua, e tali ai le fesili na lāgā i lau asiasiga ua mavae. A o leʻi tuua le tagata, ofo i ai le polosiua o le Tala Lelei ma faailoa i ai le lesona e fesootaʻi ma le mataupu na lua talanoaina. Pe a talia, ona fai lea o se fuafuaga e talanoa le polosiua i le isi asiasiga e sosoo ai. O le faia faapea ua e amata ai se suʻesuʻega faale-Tusi Paia. A lē o lenā foʻi, nai lo o le ofo o le polosiua, e mafai ona e ofoina se isi sāvali e faaauau ai le lua talanoaga.
5. O le ā le aogā o sāvali i le galuega talaʻi?
5 Ua silia i le 130 tausaga talu ona faaaogāina sāvali i le galuega talaʻi. E ui ua suia ona foliga ma le auala ua toe tusia ai, peitaʻi ua avea o se meafaigaluega aogā tele i le talaʻiga. O lea, seʻi o tatou faaaogā lelei lenei meafaigaluega e faaauau ai pea ona faasalalau atu le poto mai i le Tusi Paia i le lalolagi atoa.—Faata. 15:7a.