Ia Manatua i Latou o Loo i Nofoaga e Tausia ai Tagata Matutua

1. Aiseā e manaʻomia ai ona faaoo atu le tala lelei i nofoaga e tausi ai tagata matutua?

¹ E toʻatele ua aafia i āuga lē lelei o le tino matua. (Fai. 12:1-7) O nisi o ē ua loa le soifua ua nonofo i fale e tausia ai tagata matutua, ma e lē o taimi uma e mafai ai ona tatou oo atu i ai pe a galulue mai i lea fale i lea fale. E oo lava foʻi i atunuu sa masani ona tausia pea e fanau po o aiga o latou mātua ua matutua, ua ave foʻi e tausia i nei nofoaga. E ui ina faigatā ona latou toe feoaʻi pe ua tau galogalo foʻi mea, ae e mafai lava e tagata ua matutua ma isi i nei nofoaga ona aʻoaʻoina mea, malamalama ma alolofa iā Ieova. E faapefea la ona tatou faaoo atu iā i latou nei le tala lelei o le “faamoemoe fiafia”?—Tito 2:13.

2. E faapefea ona faia se lisi o nofoaga e tausia ai tagata matutua?

² Sauniuni: E mafai ona faia se lisi o nei nofoaga e ala i le suʻe i le tusi telefoni. Ia suʻe i lalo o ulutala e pei o le nofoaga e tausi ai tagata matutua (nursing homes), fale e tausi ai na o ni nai tagata matutua (group homes), ma faalapotopotoga e sauniunia ni fesoasoani po o ni auaunaga mo tagata matutua (residential care facilities). O le ovasia o le auaunaga e mafai ona taʻimua i le faatulagaina o ni tagata talaʻi agavaa e asiasi i nei nofoaga. Pe a fuafua lelei ma faalagolago iā Ieova, o le a mafai ona amata ai ni suʻesuʻega faale-Tusi Paia.—Faata. 21:5; 1 Ioa. 5:14, 15.

3, 4. (a) O ai e tatau ona tatou talanoa atu i ai mo le amataina o se suʻesuʻega faale-Tusi Paia i nei nofoaga? (e) E faapefea ona faatulaga lenei suʻesuʻega?

³ O le auala e taulima ai le suʻesuʻega e faalagolago i le ituaiga o nofoaga. I nofoaga e toʻatele tagata matutua e tausia ai ma e toʻatele tagata faigaluega, e lelei le talosaga atu i le tali telefoni mo se avanoa e talanoa atu ai i le pule. Ae i fale e toʻalaiti tagata matutua ma ē e tausia i latou e nonofo ai, atonu e lelei le faatulaga o se taimi e talanoa saʻo atu ai i lē e ana le fale.

⁴ Ia faamatala atu i pule o nei nofoaga, o loo e tauofo e talatalanoa atu iā i latou e fiafia e faitau ma talanoaina tala o le Tusi Paia. Ia fesili pe iai nisi e fia auai mai i le suʻesuʻega faale-Tusi Paia i le pe a ma le 30 minute i le vaiaso. E mafai ona faaaogā lomiga eseese, ae e toʻatele ua iloa e sili atu ona fiafia i latou nei e talanoa i Laʻu Tusi o Tala o Le Tusi Paia ma Le Tagata Silisili o Ē Uma na Soifua Mai. E mafai foʻi ona e faaali atu nei lomiga i le pule. E mafai ona lua faatulaga ma le pule le aso, le taimi, ma le potu e fai ai ina ia faailoga i le kalena o meafai i totonu o lea nofoaga. Aua e te matamuli e faailoa atu o oe o se Molimau a Ieova. I le taimi e tasi, faailoa i le pule e te lē o taumafai e faia se sauniga faalelotu, ae o loo e faaauilumaina aʻoaʻoga o le Tusi Paia.

5. O ā ni fautuaga aogā mo le taulimaina o le suʻesuʻega?

⁵ Taulimaina o le Suʻesuʻega: E fuafua le auala e fai ai le suʻesuʻega i le tulaga o le nofoaga, o lea ia fetuutuunaʻi ma ia iai se faautaga mamao. E tatau i le fai suʻesuʻega ona ave ni lomiga e faaaogā ma ia toe ao pe a māeʻa le suʻesuʻega. E ono manaʻomia ona ave ni kopi o lenā lomiga ua faalapopoʻa mataʻitusi mo nisi. E faitau palakalafa, fai fesili, ona tuu atu lea o le avanoa e tali mai pei lava ona masani ai. E mafai ona valaaulia i latou e fia faitau e faitau mai mau ma palakalafa o loo iai. I le taimi o le suʻesuʻega, ia faaalia lou naunau atu, faalaeiau, ma faaleuō. Pe a faataga e le pule, e mafai ona e faaali se vitiō a le faalapotopotoga e atiaʻe ai le faatuatua i le Tusi Paia, po o se vitiō foʻi o loo faamatilatila mai ai se lesona o se tala faale-Tusi Paia. E ono mafai ona e amata ma faaiʻu le suʻesuʻega i se tatalo puupuu. O nisi tagata talaʻi e latou te aʻoaʻoina atu pese o le Malo.

6. O le ā le auala e taulima ai se fesili e lāgā mai?

⁶ Ae faapefea pe afai e fesiligia e se tasi se mea na faitau pe na taʻua i le suʻesuʻega. Ia faaaogā le utaga mamao pe a tali atu. (Kolo. 4:6) Atonu e mafai ona e faitau atu se mau puupuu e faamalamalama ai se fesili. Pe afai e lē talafeagai ona e faia faapea, e lelei ona amanaʻia lona manatu ma talosaga i ai seʻi lua talanoa na o oulua pe a māeʻa le suʻesuʻega.

7. O le ā e mafai ona e faia pe a iai se fesili patino a se tasi, pe faaalia foʻi le naunau fiafia i le suʻesuʻega?

⁷ I nisi taimi, e ono faailoa mai ai e se tasi lona faanaunauga e fia malamalama atili. O le auala lea na taulima ai e se tasi tuafafine: “E manaia lau fesili. Ae ona e patino iā te oe, seʻi o ta talanoa ai na o taʻua pe a māeʻa.” Pe a faaalia e se tasi le naunau fiafia, e mafai ona faatulaga le faia o sana suʻesuʻega patino faale-Tusi Paia, i se nofoaga ma se taimi talafeagai.

8. E faapefea ona lipotia se suʻesuʻega o se vaega, ma suʻesuʻega a tagata taʻitoʻatasi ia e faia i nei nofoaga?

⁸ E lelei ona faaaogā pea tagata talaʻi ia e masani ona asiasi i nei nofoaga. Pe afai e mautinoa o le a faaauau pea le suʻesuʻega o se vaega, e mafai e le fai suʻesuʻega ona lipotia le asiga i taimi uma e faia ai le suʻesuʻega ma le suʻesuʻega e tasi i le masina. O so o se tasi o le ʻautalaʻi e auai e mafai ona lipotia lona taimi. O suʻesuʻega faale-Tusi Paia ma tagata taʻitoʻatasi e fia malamalama ma aʻoaʻoina atili le Tusi Paia, e mafai ona lipotia e pei ona masani ai.

9, 10. O ā uiga e ao ona tatou faaalia pe a asia nei nofoaga? Faamatala.

⁹ Ia Faaauau Ona Faia: E lelei pe a faatulaga se aso ma se taimi mo le suʻesuʻega a le vaega. O le a faatalitalia e i latou i lenei nofoaga le faia e lē aunoa o le suʻesuʻega ma amata ma faaiʻu i le taimi ua uma ona faatulagaina. (Mata. 5:37) O lea e manaʻomia ai le faamaoni, toʻaga, ma ia maopoopo. O mea na tutupu ua iloa ai e sili atu le galulue faatasi o ni tagata talaʻi agavaa se toʻalua, i le taulimaina o se suʻesuʻega i vaega. (Fai. 4:9, 10) Ae i nofoaga tetele o tagata matutua, e ono manaʻomia ai ni tagata talaʻi e sili atu.

¹⁰ E tāua le faaalia o uiga faaleuō ma le naunau totino. (Fili. 2:4) I le asiasiga muamua, ia faamasani lelei i sui taʻitasi o loo auai ai. Ia faamaumau o latou suafa ma taumafai e manatua a o leʻi faia le isi suʻesuʻega. Peitaʻi, e iai nisi tagata matutua e lē mananaʻo e valaau i latou e nisi e lē masani ai i o latou suafa muamua. O le onosaʻi ma le agaalofa, o le a mafai ai ona lagona e i latou le amanaʻiaina ma le talisapaia.

11. E faapefea ona tatou faaalia le faaaloalo i le ʻaufaigaluega, ma tauaiga e asiasi mai i lea nofoaga?

¹¹ E tāua foʻi le faaalia o le faaaloalo ma le agalelei i ē e faigaluega ma aiga o nei tagata. Pe afai ua sologa lelei le suʻesuʻega, o se faiga atamai le lē suia o le taimi ma faatulagaga o le suʻesuʻega seʻi vaganā ua logo le pule. Ia fai ma talanoa atu i le pule po o lelei mea uma a o faaauau le suʻesuʻega. Afai e asiasi mai se tauaiga o se tasi a o faia le suʻesuʻega, ia tausolomua e faafeiloaʻi iā te ia. Ia faamatala atu le fuafuaga o le suʻesuʻega, ma faamautinoa atu i lē o loo asiasi mai lou naunau moni i le sui o lona aiga. Ia valaaulia foʻi o ia e faalogologo i le suʻesuʻega.

12, 13. Faamatala mai ni mea na tutupu e iloa ai le aogā o le molimau atu i nei nofoaga?

¹² Iʻuga: Ua lipotia mai e ovasia femalagaaʻi ma faapotopotoga ni iʻuga lelei o lenei vala o le auaunaga. O se tasi o mea na tupu, e pe a ma le 20 ē na auai i le uluaʻi talanoaga na faia i se tasi nofoaga. Mulimuli ane, na amata ai ni suʻesuʻega faale-Tusi Paia ma le toʻaono na faaalia le fiafia, ma iʻu ai ina papatiso se tasi o i latou. I se isi nofoaga na faia ai foʻi se suʻesuʻega, na uunaʻia ai se tinā matua ua 85 tausaga e auai atu i le faapotopotoga e lata ane ma na faaalia ai lona faanaunauga e fia papatiso. O se isi foʻi mea na tupu, ina ua toe fetuunaʻi galuega fai i se isi nofoaga o tagata matutua, na taofia ai loa ma le suʻesuʻega faale Tusi Paia lea e faia e Molimau a Ieova. Na faitio atu ē na nonofo ai i le pule ma mulimuli ane toe amata le suʻesuʻega, ma na auai atu i ai le 25 i le 30 tagata.

¹³ O le alofa e tatou te faaalia, o le a lē galo iā i latou i totonu o nei nofoaga. O se faaaʻoaʻoga, e masani ona auai ma fai se sao o le ʻaufaigaluega i le talanoaga. O a tatou taumafaiga e faaalia le naunau totino iā i latou nei, e avea foʻi lea ma molimau lelei i le lautele. (1 Pete. 2:12) Ina ua uma ona faamatala atu le fuafuaga o le suʻesuʻega, na faapea mai se tasi pule: “Aiseā na tuai ai ona tou asiasi mai? O afea e mafai ona amata ai?” Na tusi mai foʻi se isi pule o nei nofoaga: “Ou te matuā lagolagoina lava le faia o lenei suʻesuʻega faale-Tusi Paia i so o se nofoaga, e tausia ai tagata matutua i lenei aai. E faia e Molimau a Ieova lenei galuega tauofo o se vala o la latou auaunaga i le lautele.” Na avatu e se tasi nofoaga faapea i Hawaii se Faailoga mo Auaunaga Tauofo i Molimau a Ieova, ma na tusia ai o tagata tauofo o se “ʻoa tautele” i ē o loo tausia ai i inā.

14. Aiseā e tatou te taumafai ai e fesoasoani atu i tagata matutua i nei nofoaga?

¹⁴ Ua valaaulia e Ieova ē ua loa le soifua e vivii atu iā te ia. (Sala. 148:12, 13) O lenā valaaulia e aofia ai ma i latou o loo i nofoaga e tausia ai tagata matutua. Po o iai ni nofoaga faapena i lau oganuu, lea e mafai ai foʻi e tagata matutua ona maua aogā mai i le tala lelei? E ala i le fesoasoani mai o toeaina o le faapotopotoga ma pule o nei nofoaga, o le a mafai ai ona avatu se molimau lelei iā i latou o aumau ai i inā. O le a tatou faataʻitaʻi iā Ieova pe a tatou manatua i latou ua loa lo latou soifua.—Sala. 71:9, 18.