Ia Faaaogā la Tatou Upega Tafaʻilagi i le Talaʻiga—“Tali o Fesili Faale-Tusi Paia”

I le vaega i le jw.org e taʻua “Aʻoaʻoga a le Tusi Paia”, o loo iai le isi ona vaega e taʻua “Tali i Fesili Faale-Tusi Paia”. Pe a tatou faamasani i fesili o loo i lenei vaega, ia e masani ona lāgā e tagata, o le a mafai ona faasino saʻo tagata i la tatou upega tafaʻilagi mo se tali mai le Tusi Paia. E mafai foʻi ona faaaogā nei fesili e amata ai talanoaga i le talaʻiga. E mafai ona tatou filifili se fesili e fiafia i ai tagata o le oganuu, fesili i ai mo sona manatu, ona taʻu atu lea o le tali mai le Tusi Paia e faaaogā ai le jw.org. Pe a māeʻa, ona faasino atu lea pe faamatala i le tagata le mea na maua mai ai a tatou faamatalaga. O le isi mea e mafai ona fai, o le fai i le tagata e faitau mai le tali mai le upega tafaʻilagi. Na taulau le avā a se ovasia femalagaaʻi e ala i le faapea atu: “E toʻatele e tomānatu, ʻPe e tuuaʻia le Atua mo o tatou mafatiaga?’ Pe e te fia iloa le tali i le na o le 51 sekone?” Pe a uma, ona ia ta lea o le tali ua uma ona kopi i lana telefoni feaveaʻi, ma faaiʻu i le faaali atu o le mataupu e 11 o le tusi Aʻoaʻoga Moni.