Se Valaaulia Tuusaʻo

1. O afea e amata ai le tauiviga mo le tufaina o le valaaulia?

¹ Pe afai e te saunia se taumafataga mo ou aiga po o uō, ma o se taumafataga e taugatā ma umi le taimi e saunia ai, o le a e naunau la e valaaulia tagata. E faapena foʻi le taumafataga faaleagaga lea o le a maua i le tauaofiaga lata mai nei, e tele galuega na faia ina ia saunia ai. I le tolu vaiaso a o lumanaʻi le tauaofiaga, ua tuu mai e Ieova le faaeaga e tatou te valaaulia ai isi tagata ina ia auai. O le ā e fesoasoani iā i tatou ina ia tufa atu ai ma le maelega lenei valaaulia?

2. O le ā e uunaʻia ai i tatou ia faia se sao atoatoa i le tauiviga?

² O le a uunaʻia i tatou e fai se sao atoatoa i lenei tauiviga, pe a tomānatu i le tele o aogā e tatou te maua mai i faatonuga a Ieova e faafouina ai, ia e maua mai i tauaofiaga. (Isa. 65:13, 14) E tatau ona tatou manatua, e tele aogā e maua mai i nei tauiviga i tausaga taʻitasi. (Tagaʻi i le pusa “Maua ni Iʻuga Lelei.”) O nisi e tatou te valaaulia o le a auai i le tauaofiaga, a o nisi o le a lē auai mai. Peitaʻi, po o le ā lava le toʻatele o tagata e tali mai, ae o a tatou taumafaiga filigā i le taimi o le tauiviga, o le a viia ai Ieova ma atagia atu ai lona agalelei.—Sala. 145:3, 7; Faaa. 22:17.

3. O le a faapefea ona tufatufa atu le valaaulia?

³ E tatau i toeaina ona filifili le auala e tufa atu ai le valaaulia i le tele e mafai ai, e aofia ai le filifili pe tuu valaaulia i fale e lē o maua atu ai nisi, pe tufa atu foʻi i nofoaga faitele i la latou oganuu. I faaiʻuga o vaiaso, e tatau ona ofo faatasi mekasini ma le valaaulia pe a talafeagai. Pe a māeʻa le tauiviga, o le a tatou fiafia i le iloaina na faia so tatou maelega ma na iai tagata na auai mai i le faigaʻai faaleagaga na saunia e Ieova!

Maua ni Iʻuga Lelei

I nai tausaga ua mavae, a o auai se tuafafine i le tauiviga e tufatufa ai le valaaulia, sa ia mafaufau po o aogā ana taumafaiga na fai. Sa ia faapea ifo, ʻPo o le a tali mai tagata ma auai i le tauaofiaga?’ I le taeao o le Aso Toonaʻi o le tauaofiaga, sa ia mātauina ai se tamāloa lotu Initia e taʻu o le Sikh, ma na ia faafeiloaʻi iā te ia. Na auai mai le tamāloa ona na ia maua se valaaulia mo le tauaofiaga. Sa iai ni ana fesili ma na mafai ona tali e le tuafafine. Sa taʻua e le tamāloa lona fiafia tele i le polokalame, ma le maofa i le auala na laʻei ma amioaʻi ai tagata na auai. Mulimuli ane i lenā lava aso, na talanoa ai le tuafafine ma se ulugalii na nonofo latalata ane iā te ia. Na maua foʻi se valaaulia a le ulugalii ma na ō atu i le tauaofiaga i le pasi. Sa fiafia i laʻua i le tauaofiaga ma fuafua e toe ō atu i le Aso Sa. O i inā na iloa ai e le tuafafine le tāua o nei tauiviga i tausaga taʻitasi.
I se tauaofiaga e leʻi leva atu, na faafeiloaʻi ai e se ulugalii paeonia sauatoa se ulugalii ua matutua. Na taʻua e le ulugalii ua matutua o le taimi muamua lea ua la auai ai i se tauaofiaga. Na fesili atu le ulugalii paeonia, “O ai na valaauliaina oulua?” Na la tali mai, “E ma te ō atu i le fale i le isi aso, o loo iai se valaaulia i lalo o le faitotoʻa.” Sa la faitau i le valaaulia ma faatumu le kuponi i le pito i tua. Na avatu e nisi na auai i le tauaofiaga ni meaʻai mo le ulugalii. Sa matuā fiafia i laʻua i le polokalame ma la fuafua ai e toe auai i le aso e sosoo ai. Na faia fuafuaga e toe asia i laʻua ma tuliloa lo la fiafia.