Se Tauiviga Tāua
A o toe tolu vaiaso oo i le tauaofiaga, o le a auai faapotopotoga uma i se tauiviga e valaaulia tagata fiafia ina ia auai. E tāua tele lenei tauiviga faaletausaga. E masani ona maofa i latou e taliaina le valaaulia ma auai i le tauaofiaga, i lauga faale-Tusi Paia, le maopoopo o matagaluega a ē o loo galulue tauofo, ma lo tatou autasi ma amioga lelei. (Sala. 110:3; 133:1; Isa. 65:13, 14) Ae pe e iai ni iʻuga lelei o la tatou tauiviga, aemaise i oganuu o loo iai ē e fiafia, ae e mamao le mea e faimalaga mai ai ina ia auai?
Ina ua mavae le tauaofiaga itumalo 2011, na tusi atu i se ofisa o le lālā se fafine na mauaina se valaaulia i le faitotoʻa o lona fale. E masani ona lafi o ia pe a asiasi atu Molimau a Ieova. Sa ia tusi mai: “Sa ou manatu ou te maua le fiafia ona sa iai soʻu fale manaia ma se tane lelei. Peitaʻi, sa tumau pea ona ou lē fiafia, ma e leʻi iai se fuafuaga o loʻu olaga. O lea na ou filifili ai e faimalaga mo le 200 maila ina ia auai i le polokalame o le Aso Toonaʻi.” Sa fiafia tele o ia ma iʻu ina vili i lana tane o le a toe nofo e auai i le Aso Sa. Na ia taʻua: “Sa ou faalogologo i lauga uma, feiloaʻi i le toʻatele o Molimau a Ieova, ma ou te leʻi manaʻo e uma le tauaofiaga.” Ina ua toe foʻi i lona aiga, sa amata loa lana suʻesuʻega ma na avea ma tagata talaʻi e leʻi papatisoina ina ua mavae le fā masina. Na ia taʻua: “Ou te matuā fiafia ona na ou maua le valaaulia, auā ua maua ai se fuafuaga moni o loʻu olaga!”
E iai a nisi e mauaina le valaaulia o le a auai. O lea, ia fai se sao maelega i lenei tauiviga tāua. Ia alu i le tauaofiaga ma ave valaaulia o totoe, ma faaaogā e molimau atu ai lē fuafuaina.
[Pusa i le itulau 11]
Le Auala e Ofo ai le Valaaulia
Ina ia mafai ona galueaʻiina la tatou oganuu atoa, e tatau ona faapuupuu. E tatou te ono fai atu: “Talofa. O loo matou faia se tauiviga i le lalolagi aoao, i le tufatufaina atu o lenei tusi valaaulia. O lau valaaulia lea. O le a e maua nisi faamatalaga atili i le tusi valaaulia.” Ia maelega. Pe a auai i le tauiviga i faaiʻuga o vaiaso, e tatau foʻi ona ofo atu mekasini pe a talafeagai.