Taumafaiga e Faalauiloa le Tauaofiaga Itumalo, “Ia Mulimuli iā Iesu Keriso”

¹ I le tausaga ua teʻa, na iai se aafiaga lelei i tagata fiafia, o le tauiviga lea na faia i le lalolagi aoao e faalauiloa le Tauaofiaga Itumalo, “Ua i Faitotoʻa le Faaolataga!” Na vaaitino mo le uluaʻi taimi ē na talia le valaaulia faapitoa i se faigaʻai tele faaleagaga a Molimau a Ieova. (Isa. 65:13) Na latou olioli i le aufaatasiga māfana, ma autasi ma le ʻauuso Kerisiano. (Sala. 133:1) Ina ia fesoasoani i le tele o tagata e mafai ai e auai i le Tauaofiaga Itumalo “Ia Mulimuli iā Iesu Keriso,” o le a tatou toe tufaina atu i le lalolagi se tusi valaaulia faapitoa.

² Galueaʻiina o Oganuu: E mafai ona amata tufa atu tusi valaaulia i le tolu vaiaso a o leʻi faia le tauaofiaga. E ao ona faia taumafaiga uma e galueaʻiina le oganuu atoa a le faapotopotoga. O faapotopotoga e telē la latou oganuu, e mafai e tagata talaʻi ona tuu ma le faautauta le valaaulia i fale e lē o maua ai nisi, i le vaiaso mulimuli a o leʻi faia le tauaofiaga. E ao ona taumafai faapotopotoga e tufa atu tusi valaaulia uma ma ia galueaʻiina le tele o oganuu e mafai ai. O ni tusi e totoe e mafai ona faaaogā e paeonia o le faapotopotoga.

³ Le Tala e Fai Atu: E te ono faapea atu: “O loo matou faia se taumafaiga i le lalolagi aoao e tufa atu lenei valaaulia o se aso tāua o loo lumanaʻi nei. O lau tusi valaaulia lea. O le a e maua isi faamatalaga i le tusi.” O le faapuupuu o le taulimaga o le a tele ai tusi e tufa atu. A iai ni fesili a lē ona le fale, ia faaavanoa le taimi e tali ai. Afai e fiafia, ia fai se faamaumauga ma toe foʻi e asi i le vave e mafai ai.

⁴ Maʻeu le tāua o lo tatou taumafai e mulimuli iā Keriso! (Ioa. 3:36) O le a fesoasoani la tatou tauaofiaga itumalo o le a faia nei i ē uma e auai ina ia faia faapea. E tatou te mautinoa o le a toe avatu foʻi se isi molimau tele, pe a faia lenei taumafaiga filigā e faalauiloa le Tauaofiaga Itumalo, “Ia Mulimuli iā Iesu Keriso.” O lea la, ia filigā e valaaulia le tele o tagata e mafai ai e auai. Tau ina ia faamanuia Ieova i au taumafaiga, a o e faia se sao i lenei tauiviga e faia i le lalolagi aoao.