Fesili Mai le ʻAufaitau

O le ā na uiga i ai Iesu ina ua fetalai: “Aua tou te manatu ua ou sau e avatu le filemu”?

Na talaʻia e Iesu se feʻau o le filemu. Peitaʻi i se tasi aso, na fetalai atu ai o ia i ona aposetolo: “Aua tou te manatu ua ou sau e avatu le filemu i le lalolagi; ou te leʻi sau e avatu le filemu a o le pelu. Auā ua ou sau e faatupu fevaevaeaʻiga: o le atalii ma lona tamā, o le tama teine ma lona tinā, o le avā foʻi ma le tinā o lana tane.” (Mata. 10:34, 35) O le ā na uiga i ai Iesu?

E leʻi finagalo Iesu e fevaevaeaʻi tagata o le aiga, ae na ia iloa o ana aʻoaʻoga o le a fevaevaeaʻi ai nisi aiga. O lea la, e tatau ona iloa e i latou e mananaʻo e avea ma soo o Keriso ma papatisoina, e oo faigatā iā i latou e filifili e faia faapea. O se luʻi le tumau faamaoni i aʻoaʻoga a Keriso, pe a latou feagai ma teteega mai i se paaga lē talitonu po o isi i le aiga.

Ua faalaeiauina e le Tusi Paia Kerisiano “ia nonofo filemu ma tagata uma.” (Roma 12:18) Ae e mafai ona pei o se “pelu” aʻoaʻoga a Iesu i nisi aiga. E tupu lenā mea pe a talia e se tasi o le aiga aʻoaʻoga a Iesu, ae e tetee i ai isi. O lea la, e avea tagata o le aiga ma “fili” o lē o loo aʻoaʻoina le upu moni.​—Mata. 10:36.

O nisi taimi e feagai soo o Keriso o loo nonofo i aiga e eseese tapuaʻiga, ma tofotofoga o lo latou alofa mo Ieova ma Iesu. O se faataʻitaʻiga, atonu e faamalosia e tauaiga lē talitonu i latou e faamanatu aso faamanatu a lotu. Pe a tofotofoina i latou, o ai o le a latou faafiafiaina? Na fetalai Iesu: “O lē ua sili lona alofa i lona tamā po o lona tinā nai lo o aʻu, e lē aogā o ia iā te aʻu.” (Mata. 10:37) E leʻi uiga atu Iesu e tatau iā i latou e aʻoaʻoina le upu moni ona lē toe alolofa i o latou mātua ina ia avea ai ma ona soo. Ae na ia aʻoaʻoina i latou ina ia iai le vaaiga saʻo i mea e sili ona tāua. Pe a tetee mai tauaiga lē talitonu ona o la tatou tapuaʻiga iā Ieova, e tatou te alolofa pea iā i latou, ae ua tatou iloa e faamuamua lo tatou alofa i le Atua.

E mautinoa e tatou te matuā faanoanoa pe a tetee mai aiga. Ae e ao ona manatua pea e soo o Iesu upu nei: “O lē na te lē talia le laau e faapuapuagatia ai o ia, ma mulimuli mai iā te aʻu, e lē aogā o ia iā te aʻu.” (Mata. 10:38) I nisi faaupuga, e vaai Kerisiano i teteega mai i tauaiga lē talitonu, o se vaega o puapuaga e lotomalilie soo o Keriso e talia. I le taimi e tasi, e latou te faamoemoe o a latou amioga lelei o le a suia ai mafaufau o tauaiga lē talitonu, ma uunaʻia ai i latou e talia le feʻau o le Tusi Paia.​—1 Pete. 3:1, 2.