Māfuaaga e Tutupu ai Pea Taua ma Fevaevaeaʻiga

AGASALA

Na foafoaina e le Atua o tatou uluaʻi mātua o Atamu ma Eva i lona faatusa. (Kenese 1:27) O lona uiga la, e faigofie ona la faaalia uiga o le Atua e pei o le filemu ma le alofa. (1 Korinito 14:33; 1 Ioane 4:8) Peitaʻi, na lē usiusitaʻi Atamu ma Eva i le Atua ma la agasala ai. O le iʻuga, ua tatou aafia uma ai i le agasala ma le oti. (Roma 5:12) O le māfuaaga lenā ua toʻatele ai tagata e fiafia i faiga sauā, ma latou faaalia uiga sauā.—Kenese 6:5; Mareko 7:​21, 22.

FAIGĀMALO A TAGATA

Ua taʻua i le Tusi Paia: ʻE lē o i le tagata e savali ona faatonuina le mea e ui ai o ia.’ (Ieremia 10:23) E tatou te iloa mai ai, e leʻi foafoaina i tatou e le Atua ma le tomai e tatou te pulea ai i tatou lava. O le māfuaaga lea e lē mafai ai e faigāmalo a tagata ona aveesea atoatoa taua ma fevaevaeaʻiga.

SATANI MA ANA TEMONI

O loo faailoa mai i le Tusi Paia, “o le lalolagi atoa o loo nofo toʻilalo i le pule a lē o loo leaga.” (1 Ioane 5:19) O loo faasino atu “lē o loo leaga” iā Satani le Tiapolo, le fasioti tagata sili. (Ioane 8:44) Ua taaʻina e Satani ma ana temoni tagata e faapogaia taua ma fevaevaeaʻiga.—Faaaliga 12:​9, 12.